الماتىداعى قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆا وقۋ ورنىنىڭ ستۋدەنتتەرى جانە ماگيسترانتتارىمەن كەزدەسىپ, قاشىقتان وقىتۋعا بايلانىستى سۇراقتارعا جاۋاپ بەردى, دەپ حابارلادى وقۋ ورنىنىڭ ءباسپاسوز قىزمەتى.
Zoom پلاتفورماسىندا ۇيىمداستىرىلعان ونلاين فورماتتاعى كەزدەسۋگە پەداگوگيكا-پسيحولوگيا فاكۋلتەتى, قازاق فيلولوگياسى جانە الەم تىلدەرى فاكۋلتەتى, الەۋمەتتىك-گۋمانيتارلىق فاكۋلتەتى, جاراتىلىستانۋ فاكۋلتەتى, فيزيكا-ماتەماتيكا فاكۋلتەتى مەن ونەر جانە مادەنيەت فاكۋلتەتىنىڭ 600-گە جۋىق ءبىلىم الۋشىسى قاتىستى.
كەزدەسۋ بارىسىندا ستۋدەنتتەر ۋنيۆەرسيتەت رەكتورىنا قاشىقتان وقۋدى ۇيىمداستىرۋداعى كەيبىر ماسەلەلەر, ەمتيحان تاپسىرۋ, ديپلومدىق جۇمىستى قورعاۋ تۋرالى ساۋالدار قويدى. سونىمەن قاتار بىلىمگەرلەر سەسسيا, وقۋ اقىسى, انتيپلاگيات جايىندا دا كوتەردى.
قويىلعان سۇراقتارعا رەكتور گاۋحار الدامبەرگەنوۆا, وقۋ جانە وقۋ-ادىستەمەلىك ماسەلەلەر جونىندەگى پرورەكتورى ەركىن جۇمانقۇلوۆا كەڭىنەن جاۋاپ بەردى.
ەكى ساعاتتان استام ۋاقىتقا سوزىلعان كەزدەسۋدە جالپى سانى 60-تان استام ساۋال قويىلىپ, ولارعا ءتيىستى جاۋاپتار بەرىلدى.
باسقوسۋ بارىسىندا وقۋ ورنىنىڭ باسشىسى ستۋدەنتتەرگە كارانتين ۋاقىتىندا ۋنيۆەرسيتەت تاراپىنان قولعا الىنعان بىرقاتار جۇمىستاردى دا اتاپ ءوتتى.
– ەلىمىزدە قالىپتاسقان جاعدايعا بايلانىستى قىزدار ۋنيۆەرسيتەتىندە بىرنەشە جوبا جۇزەگە اسىرىلىپ جاتىر. بىرىنشىدەن, ءبىلىم الۋشىلارعا جەدەلدەتىلگەن ادىستەمەلىك كومەك كورسەتۋ ماقساتىندا «اكادەميالىق ساعات» جوباسى باستاۋ الدى. ماقسات – ۋنيۆەرسيتەتتىڭ وقىتۋشىلارى, ءبىلىم الۋشىلارى جانە اكىمشىلىك قىزمەتكەرلەرىمەن قاشىقتان وقۋ بويىنشا تىعىز بايلانىس جاساۋ. «اكادەميالىق ساعات» كەزىندە ءبىلىم الۋشىلار پرورەكتورلارعا, دەكاندارعا, كافەدرا مەڭگەرۋشىلەرىنە قاشىقتان وقىتۋ بارىسىندا تۋىنداپ جاتقان سۇراقتاردى قويا الادى. ەكىنشىدەن, «تسيفرلى ۆولونتەر» جوباسى. ول پروفەسسور-وقىتۋشىلارعا ادىستەمەلىك جانە اقپاراتتىق كومەك كورسەتۋگە باعىتتالعان. ال ۇشىنشىدەن, ۋنيۆەرسيتەتتە پسيحولوگيالىق قولداۋ قىزمەتى اشىلدى. وقۋ ورنىنىڭ بىلىكتى پسيحولوگ ماماندارىنان قۇرىلعان توپ كارانتين ۋاقىتىندا ەل تۇرعىندارىن قولداۋ ماقساتىندا جانە ءوز-ءوزىن وقشاۋلاۋ سيتۋاتسياسىندا سترەسستىك جاعدايعا ءتۇسۋدىڭ الدىن الۋ بويىنشا كەڭەستەر بەرەدى. قىزمەتتەردىڭ بارلىعى تەگىن. بارلىق اقپاراتتار ۋنيۆەرسيتەتتىڭ رەسمي ينتەرنەت رەسۋرسى مەن الەۋمەتتىك جەلىدەگى رەسمي پاراقشالارىندا جاريالانعان, – دەپ اتاپ ءوتتى ۋنيۆەرسيتەت رەكتورى گاۋحار الدامبەرگەنوۆا.
ايتا كەتەيىك, قىزدار ۋنيۆەرسيتەتىندە وقىتۋشىلار مەن ستۋدەنتتەرگە قاشىقتان وقىتۋ بويىنشا ادىستەمەلىك جانە تەحنيكالىق قولداۋ كورسەتەتىن Call-ورتالىعى دا جۇمىس ىستەۋدە. قىزمەتتىڭ باستى ارتىقشىلىعى – قاشىقتان وقىتۋ تەحنولوگياسى بويىنشا اتقارىلىپ جاتقان جۇمىستار تۋرالى تولىققاندى مالىمەتپەن قامتاماسىز ەتۋ جانە وسى تاراپتاعى وزگە دە ساۋالدارعا كەڭىنەن جاۋاپ بەرۋ.
Call-ورتالىق دۇيسەنبى-جۇما كۇندەرى ساعات 9:00-18:00, سەنبى كۇنى ساعات 09:00-13:00 ارالىعىندا جۇمىس ىستەيدى.
بايلانىس تەلەفونى: 8 (727) 237-00-77.