ەلوردانىڭ قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا 9 ساۋىردەن بەرى ەلوردادا 5 مىڭعا جۋىق ادامعا ەكسپرەسس-تەستىلەۋ جۇرگىزىلگەنىن مالىمدەدى.
«9-13 ءساۋىر ارالىعىندا نۇر-سۇلتان قالاسىندا 4 766 ادامعا كوروناۆيرۋس ينفەكتسياسىنا بايلانىستى ەكسپرەسس تەستىلەۋ جۇرگىزىلدى. ونىڭ 61 جاعدايىندا نەمەسە 1,2% تەستىلەۋ وڭ ناتيجە كورسەتتى. باس مەملەكەتتىك سانيتارلىق دارىگەردىڭ قاۋلىسىنا سايكەس, بۇل ادامدار ءارى قارايعى تەكسەرۋ جۇمىستارى ءۇشىن پروۆيزورلىق ستاتسيونارعا جاتقىزىلدى. ياعني, پوليمەرازدى-تىزبەكتى رەاكتسيا ادىسىمەن كوروناۆيرۋس ينفەكتسياسىنا تەكسەرۋ جۇرگىزىلەدى. 61 ادامنىڭ 30-ى تەرىس ناتيجەمەن اۋرۋحانادان شىعارىلدى», دەدى س. قيسىقوۆا.
سونىمەن قاتار ول كوروناۆيرۋس ينفەكتسياسىنان قايتىس بولعان ناۋقاس تۋرالى ايتىپ بەردى. ونىڭ ايتۋىنشا, 1950 جىلى تۋعان تۇرعىن 11 ساۋىردە جەدەل جاردەم قىزمەتى ارقىلى پروۆيزورلىق اۋرۋحاناعا اۋىر حالدە تۇسكەن.
«جاعدايى اۋىر بولعاندىقتان, ناۋقاس جەدەل تۇردە رەانيماتسياعا جاتقىزىلدى. تۋىستارىنىڭ ايتۋىنشا, مارقۇم ۇيدە 3 كۇن بويى اۋىرعان, دەنە قىزۋى 38 گرادۋسقا دەيىن كوتەرىلگەن. مەديتسينالىق كومەككە جۇگىنبەي, وزدىگىنەن قىزۋدى باساتىن دارىلەر ىشكەن. ەنتىگىپ, تىنىس الۋ قيىنداعان سوڭ ستاتسيونارعا جۇگىنگەن. ودان بولەك, ناۋقاس ارتەريالىق گيپەرتەنزيا, قانت ديابەتى, جۇرەك يشەمياسىمەن اۋىرعان. 2011 جىلى وعان اورتاكارانارلىق شۋنتتاۋ جاسالعان. ناۋقاستان كوروناۆيرۋستىق ينفەكتسيا تابىلدى, اۋرۋدى دياگنوستيكالاۋ مەن ەمدەۋدىڭ كلينيكالىق حاتتاماسىنا سايكەس ەم-دوم جۇرگىزىلدى. كاسىبي مامانداردىڭ قاتىسۋىمەن كونسيليۋم ءوتتى. بىراق قارقىندى تەراپياعا قاراماستان اعزالىق جەتىسپەۋشىلىك بەلگىلەرى كوبەيىپ, 13 ساۋىردە ساعات 23:40-تا ناۋقاس كوز جۇمدى. جۇرگىزىلگەن بارلىق رەانيماتسيالىق شارالار كومەكتەسپەدى. تۋىستارى اراسىنان جاقىن بايلانىستا بولعان ادامدار تەكسەرىلىپ, ءۇي جاعدايىندا كارانتينگە ورنالاستى», دەدى س.قيسىقوۆا.
قازىرگى ۋاقىتتا ەلوردادا ۆيرۋس جۇقتىرعاندار سانى 264 ادامعا جەتتى. سوڭعى ەكى كۇندە 12-13 ءساۋىر كۇندەرى 29 جاعداي تىركەلگەن.
«19 جاعداي – وكپەنىڭ ەكىجاقتى قابىنۋى, تىنىس الۋ قيىندىعى بويىنشا بىرنەشە كۇننەن بەرى ستاتسيوناردا جاتقان ناۋقاستاردان تابىلدى. ولاردىڭ العاشقى سىناماسىندا كوروناۆيرۋس ينفەكتسياسى تابىلماعان ەدى. بىراق كۆي دياگنوستيكالاۋ مەن ەمدەۋ حاتتاماسىندا اۋرۋ بەلگىلەرى (رەنتگەنوگراممادا نەمەسە كومپيۋتەرلىك توموگرافيادا وكپەنىڭ ەكىجاقتى وزگەرىسكە ۇشىراۋى) بايقالعان ادامداردان قايتا سىناما الۋ ۇسىنىلعان. وسىلايشا, دارىگەرلەر قايتا سىناما العان 19 ناۋقاستان ينفەكتسيا تابىلدى. بۇل ءادىس ارقىلى كوروناۆيرۋس ينفەكتسياسىن دياگنوستيكالاۋ مەن ەمدەۋ ءتيىمدى بولادى. تاعى 7 وقيعا – ناۋقاستارمەن بايلانىستا بولعاندار, وتباسى مۇشەلەرى نەمەسە بىرگە جۇمىس ىستەگەندەر اراسىنان تابىلدى. ولار بۇعان دەيىن وقشاۋلانىپ, تەكسەرۋدەن وتكەن جانە ينفەكتسيا راستالعاندىقتان, اۋرۋحاناعا جاتقىزىلدى. ال 3 وقيعا – كوروناۆيرۋس ينفەكتسياسى بويىنشا جۇرگىزىلگەن مونيتورينگ بارىسىندا تابىلدى», دەدى ساۋلە قيسىقوۆا.
جيىن بارىسىندا ول ەلوردادا كارانتينگە جابىلعان 23 نىساننىڭ 13-ءى اشىلاتىنىن مالىمدەدى.
«تۇتاس ەپيدەميالىق كەزەڭدە ەلوردادا 23 نىسان كارانتينگە جابىلدى. بۇل نىسانداردا ەپيدەمياعا قارسى بارلىق شەكتەۋ شارالارى جۇرگىزىلدى. قازىرگى ۋاقىتتا كارانتين رەجىمىندە 10 نىسان قالدى. اۋرۋدىڭ 267 وشاعىندا دەزينفەكتسيالىق شارالار جۇرگىزىلگەن. بۇل – ناۋقاستار تۇرعان ۇيلەر مەن جۇمىس ورىندارى. نۇر-سۇلتان قالاسى بويىنشا جالپى 17 414 جاعدايعا زەرتحانالىق تەكسەرۋ جۇمىستارى جۇرگىزىلدى», دەدى باسقارما باسشىسى.