ءبىزدىڭ اۋرۋحانا قىتايدا COVID-19 انىقتالىپ, تارالا باستاعان كەزدەن باستاپ وقۋ-جاتتىعۋدان ءوتىپ, ساقاداي ساي بولدىق دەپ ايتۋعا بولادى. جالپى ءبىزدىڭ ماماندىق ءتۇرلى جۇقپالى اۋرۋلارمەن تىكەلەي كۇرەسەتىندىكتەن باسىمىزدى قاۋىپ-قاتەرگە تىگىپ, كەز كەلگەن جاعدايعا دايىن جۇرەمىز. سوندىقتان دا ەش ۋاقىتتا قورىقپاي, قىزمەتىمىزدى ادال اتقارۋعا كۇش سالامىز.
ىندەتتى جۇقتىرعان ناۋقاستارمەن تىكەلەي قارىم-قاتىناستا جۇمىس ىستەدىك. قورعانىش قۇرالدارىن تولىق پايدالانعاننىڭ ناتيجەسىندە ارىپتەستەرىمنىڭ ەشقايسىسىنا اۋرۋ جۇققان جوق. 22 ناۋرىزدان 5 ساۋىرگە دەيىن دەمالماستان, تاۋلىك بويى اۋرۋحانادا قىزمەت ەتتىك. بيىل 55 جاستامىن. ءۇش بالام بار. 13 جاستاعى كەنجەمىز قازىر اكەسىمەن بىرگە ۇيدە. بىزگە ۇيگە قايتۋعا بولمايدى. قازىر دەمالىس ورتالىعىندامىز. بۇل جەردە دەمالۋىمىزعا بارلىق جاعداي جاسالعان. جۇمىسقا بارىپ جۇرگەن مەديتسينا قىزمەتكەرلەرى وسىندا ورنالاستىرىلعان.
مەن مەديتسينا قىزمەتكەرلەرىنىڭ قاۋىپتىلىگى اسا جوعارى 1-توبىنا كىرەمىن. پرەزيدەنت بەكىتكەن قاراجاتتى تولىق الدىم. بىراق ءبىز باستاپقىدا اقشا بەرىلەدى دەپ ويلاعان دا, دامەتكەن دە جوقپىز. تەك ناۋقاستاردى ەمدەپ, اۋرۋدىڭ ورشىمەۋى ءۇشىن بارىمىزدى سالىپ ەڭبەك ەتۋدى عانا ويلادىق. ويتكەنى بۇل – ءبىزدىڭ مىندەتىمىز. ەڭبەگىمىزدى باعالاپ جاتقان مەملەكەت باسشىسىنا شەكسىز ريزاشىلىعىمدى بىلدىرەمىن. بۇل بىزگە دەگەن ۇلكەن قۇرمەت, قامقورلىق. مۇنداي قولداۋلار ءوز ىسىمىزگە دەگەن جاۋاپكەرشىلىكتى دە ارتتىراتىنى ءسوزسىز.
مايرا نۇرعاليەۆا,
اقتوبە وبلىستىق ينفەكتسيالىق اۋرۋحاناسىنىڭ ينفەكتسيونيست دارىگەرى