مەملەكەتتىك كوميسسيا شەشىمىمەن 20 ساۋىردەن باستاپ نۇر-سۇلتان جانە الماتى قالالارىنداعى بىرقاتار ەكونوميكا سەكتورلارىنىڭ جۇمىسى قالپىنا كەلتىرىلەدى. ولاردىڭ ناقتى ءتىزىمى 15 ساۋىردە بەلگىلى بولادى. كەشە «حابار 24» تەلەارناسىنىڭ تىكەلەي ەفيرى ارقىلى اقپارات جانە قوعامدىق دامۋ ءمينيسترى داۋرەن اباەۆ جۇمىسىن جالعاستىرۋى مۇمكىن سەكتورلار تۋرالى اقپارات بەردى.
«بىرىنشىدەن, اتالعان وزگەرىس نۇر-سۇلتان مەن الماتى قالالارىندا ءبىر ۋاقىتتا ەنگىزىلگەنمەن, ەكى قالاداعى جۇمىس پروتسەسىندە ايىرماشىلىق بولۋى مۇمكىن. ونىڭ سەبەبى وسى قالالاردىڭ ەپيدەميولوگيالىق جاعدايىنىڭ جانە ەكونوميكاسىنىڭ ايىرماشىلىعىنا بايلانىستى. سوندىقتان بارلىق نيۋانستاردى اكىمدىكتەر تۇرعىندارعا الدىن الا حابارلاپ, ءتۇسىندىرىپ وتىرادى. ەكىنشىدەن, كارانتين تالاپتارىنىڭ وزگەرىسى بىردەن ەمەس, كەزەڭ-كەزەڭمەن جۇزەگە اسىرىلادى. ءار كەزەڭدە دەنساۋلىق ساقتاۋ مينيسترلىگىنىڭ قورىتىندىسى ەسەپكە الىنادى» دەگەن مينيستر قازىر تەك ءبىرىنشى كەزەڭ تۋرالى ايتىلىپ وتىرعانىن ءتۇسىندىردى.
ونىڭ ايتۋىنشا, بۇل كەزەڭدە اۋرۋ جۇقتىرۋ قاۋپى ەڭ از دەگەن كاسىپورىندار عانا ىسكە قوسىلادى. مۇنداي كاسىپورىندارعا سانيتارلىق نورمالاردى ساقتاۋ بويىنشا ارنايى حاتتامالار دايىندالىپ, ونىڭ ورىندالۋى تۇراقتى تۇردە تەكسەرىلەدى. ەگەر كاسىپورىن تالاپتاردى بۇزسا قاتاڭ شەكتەۋ شارالارى قولدانىلادى.
كەشە نۇر-سۇلتان قالاسىنىڭ اكىمى 20 ساۋىردەن باستاپ جۇمىسىن جالعاستىراتىن كاسىپورىنداردىڭ ءتىزىمىن ۇسىنعان. اتاپ ايتقاندا, ولار: ونەركاسىپتىك جانە يندۋستريالىق كاسىپورىندار, قۇرىلىس سالاسىنداعى كاسىپورىندار, قىستان كەيىن جولداردى جوندەيتىن اسفالت-بەتون زاۋىتتارى, زەينەتاقى مەن جاردەماقى بەرۋ ءۇشىن ەكىنشى دەڭگەيدەگى بانكتەر. داۋرەن اباەۆ ولاردىڭ ساعات 16:00-گە دەيىن قىسقا جۇمىس كەستەسىمەن جۇمىس ىستەيتىنىن اتاپ ءوتتى.
سونداي-اق بۇل تىزىمگە جەكە قوسالقى قىزمەت كورسەتۋ سەكتورىنىڭ كەيبىر ۇيىمدارى دا كىرەدى. ياعني حيميالىق تازالاۋ جانە كىر جۋ ورىندارى, شينومونتاج, ارنايى تەحنيكالاردى جوندەۋ جانە كولىك جۋ ستانسالارى. بۇعان قوسا قوعامدىق تاماقتانۋ ورنىنان تاماق جەتكىزۋ مۇمكىندىگىن كەشكى ساعات 10-عا دەيىن ۇزارتۋ ۇسىنىلعان. وسىلايشا اتالعان كاسىپورىندار بويىنشا 90-100 مىڭعا جۋىق ادام جۇمىسىن جالعاستىرادى. بۇل ەلوردادا جۇمىس ىستەيتىن حالىقتىڭ شامامەن 20%-ى.
مينيستر الماتى قالاسىندا ءساۋىردىڭ ءۇشىنشى دەكاداسىندا (سوڭعى ون كۇنىندە) ونەركاسىپتىڭ بارلىق سالالارى – قويمالاۋ, قۇرىلىس, ەكىنشى دەڭگەيدەگى بانك قىزمەتكەرلەرىنىڭ 50%-عا دەيىن, قىزمەت كورسەتۋ سالاسىنىڭ كەيبىر سەكتورلارى تولىق جۇمىس كۇنى رەجىمىنە كوشەتىنىن حابارلادى. ناتيجەسىندە بۇل قالادا 128 مىڭ ادام جۇمىسىن جالعاستىرادى.