باس قالادان بۋراباي باعىتىنا قاراي جۇرگەندە شاماسى 80-90 شاقىرىم جەردە سول جاعىندا ەڭبەك اتتى ەلدى مەكەن قالادى. سول جەردەن تالاي ءوتىپ جۇرگەندە وزىممەن بىرگە كەلە جاتقان جولاۋشىلاردان «بۇل كىمنىڭ اۋىلى» دەپ سۇرايمىن. سوندا كوپشىلىگىنەن «بىلمەيمىز» دەگەن جاۋاپ الامىن. سودان اتاقتى جەرلەسىمىزدىڭ كىندىك قانى تامعان ەلدى مەكەندى ەلگە تانىستىرۋدىڭ قانداي جولى بار دەگەن وي كەلدى.
ول – كەڭەس وداعىنىڭ باتىرى, تۇڭعىش حالىق قاھارمانى, ەلىمىزدىڭ تۇڭعىش قورعانىس ءمينيسترى, ارميا گەنەرالى ساعادات قوجاحمەت ۇلى نۇرماعامبەتوۆ. بۇل وي بۇدان ءبىر جىلداي بۇرىن كەلدى. ۇلكەن تاس جولدىڭ بويىنا بيلبورد قويۋ كەرەك. اۋىلدى باتىردىڭ اتىنا ساي بولاتىنداي جاعدايعا كەلتىرۋ قاجەت. بۇل ءۇشىن مادەنيەت ءۇيىن كۇردەلى جوندەۋدەن وتكىزىپ, الدىنا ەسكەرتكىشىن قويىپ, مۋزەي اشۋ كەرەك. ورتا مەكتەپكە قاھارماننىڭ ەسىمىن بەرگەن دۇرىس بولار ەدى. بىراق وسى مەكەمە دە كۇردەلى جوندەۋدى قاجەت ەتىپ تۇر. وعان قوماقتى قارجى قاجەت. «ىزدەگەنگە – سۇراعان» دەگەندەي قازاقستاندا س.ق.نۇرماعامبەتوۆ اتىنداعى حالىقارالىق قور بار ەكەنىن ءبىلدىم. قوردىڭ پرەزيدەنتى ماحمۋت نىلىباەۆ مىرزاعا جولىقتىم. ول كىسى قولدايتىنىن جانە مۇمكىندىگىنشە كومەكتەسەتىنىن ايتتى. بۇل قوردىڭ وكىلى قالي قامباروۆ ەكەۋمىز سول ەلگە بارىپ, اۋىل اكىمى ساعىندىق اباحانوۆ ۇشەۋمىز اۋىلدى كوركەيتۋ تۋرالى جوسپار جاساپ, اۋدان اكىمىنىڭ كەلىسىمىن الىپ, وبلىس اكىمىنە شىقتىق. وبلىس اكىمى مادەنيەت ءۇيى مەن مەكتەپتى كۇردەلى جوندەۋگە قارجى ءبولىپ, بۇل ءىستى قانداي قۇرىلىس ۇيىمى ورىندايتىنى انىقتالۋدا ەكەن. تاياۋدا اقكول اۋدانىنىڭ اكىمدىگىندە بيلبورد ورناتۋ, مۋزەي اشۋ, مەكتەپكە باتىردىڭ ەسىمىن بەرۋ, بيۋست جاساۋ ت.ب. ماسەلەلەر قارالىپ, ءاربىر سالاعا تاپسىرما بەرىلدى. ۇلى جەڭىستىڭ 75 جىلدىعىنا جانە «رۋحاني جاڭعىرۋ» باعدارلاماسىنا سايكەس اقكولدىكتەر, ونىڭ ىشىندە ەڭبەك اۋىلى 2020 جىلدى س.ق.نۇرماعامبەتوۆ جىلى دەپ اتاپ وتىر. بۇل ەردىڭ ارۋاعىنا ەلىنىڭ كورسەتكەن قۇرمەتى جانە ونىمەن قوسا وسكەلەڭ ۇرپاققا پاتريوتتىق تاربيە بەرۋگە قوسىلعان زور ۇلەس دەر ەدىك.
ەركىن داۋەشوۆ,
اقكول اۋدانىنىڭ قۇرمەتتى ازاماتى
اقمولا وبلىسى