كوروناۆيرۋسپەن كۇرەس بارىسىنا جاردەم بەرۋ ءۇشىن ەلىمىزگە قىتايدىڭ شىڭجاڭ وڭىرىنەن ءبىر توپ دارىگەر كەلگەنى بەلگىلى. 10 ادامنان تۇراتىن وسى دەلەگاتسيامەن بىرگە كورشى ەلدەن 5,5 توننا گۋمانيتارلىق كومەك – ءدارى-دارمەك, مەديتسينالىق ماسكا جانە باسقا دا مەديتسينالىق قۇرال-جابدىقتار جەتكىزىلگەن بولاتىن. ايتا كەتەيىك, بۇل كومەك ەكى ەلدىڭ مەملەكەت باسشىلارىنىڭ ۋاعدالاستىعىنا وراي جۇزەگە اسىپ وتىر.
وسى ساپاردى ۇيىمداستىرۋشىلاردىڭ ءبىرى كولۋمبيا ۋنيۆەرسيتەتى جانىنداعى ICAP ورتالىعىنىڭ ورتالىق ازيا بويىنشا ديرەكتورى اننا دەريابينانىڭ ايتۋىنشا, قىتاي دارىگەرلەرى مەن گۋمانيتارلىق كومەكتىڭ قازاقستانعا جەتكىزىلۋىنە "شەۆرون" كومپانياسى قارجىلاي جانە تەحنيكالىق قولداۋ كورسەتكەن.
«بيىل ءبىزدىڭ ورتالىق «شەۆرون» كومپانياسىنان گرانت الدى. جوبانىڭ باستى ماقساتى – دەنساۋلىق ساقتاۋ مينيسترلىگىمەن بىرلەسە وتىرا, ۆيرۋسقا قارسى كۇرەسىپ جاتقان قازاقستاندىق دارىگەرلەر مەن مەديتسينالىق ورتالىقتاردىڭ الەۋەتىن ارتتىرۋ ەدى. مىنەكەي, كوروناۆيرۋسكە قارسى كۇرەستە مول تاجىريبەسى بار قىتاي ماماندارىن قازاقستانعا شاقىرۋ – وسىناۋ جوبا اياسىندا وتكىزىلگەن العاشقى شارا بولدى», – دەيدى ول.
ال ەلىمىزگە تابان تىرەگەن قىتاي دارىگەرلەرى كوروناۆيرۋسپەن كۇرەستە ءوز تاجىريبەلەرىمەن بولىسەدى. ولار قازاقستاندا 15 كۇن بولادى.
«قىتايدان ارنايى كەلگەن مەدبريگادا شىڭجاڭدا كوروناۆيرۋسكە قارسى كۇرەسىپ, شىڭدالعان دارىگەرلەر. ولاردىڭ اراسىندا ازىرگى كۇنى اۋاداي قاجەت پۋلمونولوگتار, ەپيدەميولوگتار, ينفەكتسيونيستەر, نەۆرولوگتار جانە باسقا دا جوعارى ساناتتى ماماندار بار. 15 كۇن ىشىندە ولار نۇر-سۇلتان, الماتى جانە قاراعاندى قالالارىنداعى اۋرۋحانالارعا بارىپ, ونداعى قاۋىپسىزدىك شاراسىمەن تانىسادى ءارى دارىگەرلەرگە ارناپ ونلاين ءدارىس وتكىزەدى», – دەيدى اننا دەريابينا.
بۇدان بولەك قىتايدان جەتكەن ارنايى بريگادا كوروناۆيرۋستىڭ دارىگەرلەر اراسىندا تارالۋىنا توسقاۋىل بولاتىن ءادىس-امالدارمەن بولىسپەك. «ۆيرۋس قىتايدا 3 مىڭنان اسا دارىگەرگە جۇقتى. ونىڭ 90 پايىزى ۋحاننان انىقتالدى. كەيىننەن دارىگەرلەر اراسىندا ءتۇسىندىرۋ جۇمىسىن جۇرگىزىپ, ولاردىڭ ناۋقاسپان بايلانىس ورناتۋعا قاتىستى ساۋاتىن ارتتىرىپ, قاجەتتى كەرەك-جاراقپەن قامتاماسىز ەتتىك. سونىڭ ناتيجەسىندە ۆيرۋس جۇقتىرعان دارىگەرلەر سانىن ازايتتىق», – دەيدى وسى دەلەگاتسيا قۇرامىنداعى جۇقپالى اۋرۋلار دارىگەرى لۋ سياوبو.
قازاقستاندا كوروناۆيرۋس جۇقتىرعان دارىگەرلەر سانى 120, ولاردىڭ 67-ءى ۆيرۋس جۇقتىرعان ازاماتتارعا تىكەلەي كومەك كورسەتكەن.
ءىسار ورتالىعى مەديتسينا سالاسىندا يننوۆاتسيالىق جوبالار ازىرلەپ, ونى قولدانىسقا ەنگىزۋمەن اينالىسادى. 2011 جىلدان بەرى ءىسار قازاقستان دەنساۋلىق ساقتاۋ مينيسترلىگىمەن ۆيچ-ينفەكتسيا جوبالارىنىڭ ناتيجەسىن ارتتىرۋ بويىنشا بىرلەسىپ جۇمىس جۇرگىزۋدە.
ايتا كەتەلىك بۇدان بۇرىن «شەۆرون» كومپانيانىڭ قارجىلاي قولداۋىمەن الماتى قالاسىنداعى كلينيكالىق ينفەكتسيالىق بالالار اۋرۋحاناسىنا جالپى قۇنى 71,8 ملن تەڭگەنى قۇرايتىن جاڭا ەكى جاساندى تىنىس الۋ اپپاراتتارى تابىستالعان.