ەلدەگى توتەنشە جاعداي كەزىندە كوكتەمگى ەگىس ناۋقانىن شەكتەمەگەنىمىز ءجون. سەبەبى ەكونوميكامىزدىڭ ورلەۋىنە اۋىل شارۋاشىلىعىنىڭ تيگىزەر پايداسى كول-كوسىر.
وسىعان وراي بيۋدجەتتەن 70 ميلليارد تەڭگە ءبولىندى. بۇل قاراجات شارۋالارعا «اگرارلىق نەسيە كورپوراتسياسى» اق ارقىلى بەرىلەدى. ونىڭ ۇستەمەاقىسى 5 پايىزدان اسپايدى. بۇل كاسىپكەرلەرگە ۇلكەن كومەك. ودان دا بولەك ماڭىزدى باعدارلامالار ىسكە اسىرىلىپ جاتىر. ماسەلەن, ديزەل وتىنى باعاسىنىڭ تومەندەۋى شارۋاشىلىقتاردىڭ قارجى ۇنەمدەۋىنە سەپ. ونى جەتكىزەتىن وپەراتورلاردىڭ جۇمىسى تولىعىمەن اشىق بولاتىنىن ەسكەرسەك شارۋاشىلىقتاردىڭ الاڭداۋىنا نەگىز جوق دەپ ويلايمىن.
پرەزيدەنتىمىز قاسىم-جومارت توقاەۆ اۋىل شارۋاشىلىعىنا ۇلكەن قولداۋ كورسەتتى. توتەنشە جاعداي كەزىندە اتقارىلىپ جاتقان شارالار ەكونوميكامىزدىڭ كۇنى ەرتەڭ كوتەرىلۋىنە ىقپال ەتەدى. ماسەلەن كوكتەمگى ەگىس ناۋقانىن ەرەكشە باقىلاۋعا الۋى بولاشاقتا ازىق-ت ۇلىك قاۋىپسىزدىگىن قامتاماسىز ەتۋ تۇرعىسىنان ماڭىزى زور ءىس.
شىندىعىندا كۇشەيتىلگەن كارانتين كوپتەگەن كاسىپكەردىڭ قولىن بايلاپ وتىر. سوندىقتان مەملەكەتتىڭ قولداۋى زاڭدىلىق. الايدا بيزنەس وكىلدەرى ۇكىمەتتەن بەرىلگەن كومەكتى ءتيىمدى پايدالانىپ, كۇندىز-ءتۇنى تىنباي ەڭبەكتەنۋى شارت. بەرىلگەن قارجىنى وڭتايلى پايدالانسا عانا ءىس العا باسپاق.
قازىر فەرمەرلەر ۋاقىتپەن ساناسپاي كوكتەمگى دالا جۇمىستارىن جۇرگىزىپ جاتىر. ەگەر ءبىز دە قالا تۇرعىندارىنداي ۇيدە وتىراتىن بولساق, جاعدايىمىز تىپتەن كۇردەلەنىپ كەتپەك. سول سەبەپتى اۋىلشارۋاشىلىق قىزمەتكەرلەرى توتەنشە جاعدايعا قاراماي مىندەتتەرىن اتقارۋدا.
جيگۋلي دايراباەۆ,
قازاقستان فەرمەرلەرى وداعىنىڭ توراعاسى