ارال اۋدانىنىڭ اكىمى مۇحتار ورازباەۆ قالاعا كىرەبەرىس جولدارعا قويىلعان توسقاۋىل بەكەتىنە بارىپ, كارانتين جاعدايىندا جۇرگىزىلىپ جاتقان جۇمىستارمەن تانىستى.
بەكەتتە جۇمىلدىرىلعان قىزمەتكەرلەر اۋدان باسشىسىنا بەكىتىلگەن جۇمىس ىستەۋ ءتارتىبىن بايانداپ ءوتتى. اكىم ىندەتتەن ساقتانۋ شارالارىن بۇلجىتپاي قاداعالاپ, توتەنشە جاعداي تالاپتارىن بۇزعاندارعا ءتيىستى شارالار قابىلداۋدى تاپسىردى.
قالا بويىنشا 4 توسقاۋىل بەكەتى قويىلدى. ءار بەكەتتە اۋداندىق پوليتسيا ءبولىمى مەن دەنساۋلىق ساقتاۋ, جەرگىلىكتى اتقارۋشى ورگان جانە ۆەتيريناريا سالاسىنىڭ ماماندارى تاۋلىك بويى قىزمەت اتقارادى.