قىزىلوردادا كوروناۆيرۋس بەلگىسىن جۇقتىرعان العاشقى تۇرعىن 28 ناۋرىزدا انىقتالعان ەدى. ىلە-شالا وڭتۇستىك كورەيادا جۇمىس ىستەپ كەلگەن 65 جاستاعى وسى تۇرعىننىڭ دەنساۋلىعىن تەكسەرگەن ەمحاناداعى مەدبيكەنىڭ دە ىندەتكە شالدىققانى بەلگىلى بولدى. ال 30 ناۋرىز كۇنى بويى ۆيرۋس بەلگىسى تابىلعان تاعى 3 تۇرعىن تىركەلدى.
وسىدان كەيىن-اق قاۋىپتى ىندەتتىڭ تارالىپ كەتۋىنىڭ الدىن الۋ ماقساتىندا كارانتين جاريالاندى. وبلىستىڭ باس سانيتارلىق دارىگەرىنىڭ 30 ناۋرىز كۇنگى №4 قاۋلىسىنا سايكەس كەشە ساعات 00:00-دەن باستاپ قالا اۋماعىنا كولىكتىڭ بارلىق تۇرلەرىنىڭ كىرۋىنە جانە شىعۋىنا تىيىم سالىنىپ وتىر.
قاۋلىعا سايكەس ءدىني ۇيلەردىڭ, بالاباقشالاردىڭ, بازارلاردىڭ, ساۋدا ۇيلەرىنىڭ, جەكە تۇرعان ازىق-ت ۇلىك ەمەس دۇكەندەردىڭ باسقا دا حالىق كوپ شوعىرلاناتىن نىسانداردىڭ جۇمىسى ۋاقىتشا توقتاتىلدى.
ازىق-ت ۇلىك تاۋارلارىن, دارىلىك زاتتاردى, مەديتسينالىق بۇيىمداردى, سونداي-اق حالىقتىڭ تىنىس-تىرشىلىگىن قامتاماسىز ەتۋگە ارنالعان زاتتاردى تاسىمالدايتىن جانە ونەركاسىپتىك, اۋىل شارۋاشىلىعى كاسىپورىندارىنىڭ قىزمەتىن قامتاماسىز ەتەتىن اۆتوكولىكتەرگە شەكتەۋ قويىلمايدى. ال جولاۋشىلار تاسىمالىمەن اينالىساتىن اۆتو جانە اۋە كولىكتەرىنە 14 تاۋلىككە دەيىن قالا اۋماعىنا كىرىپ-شىعۋعا تىيىم سالىنادى. سوڭعى ستانساسى قىزىلوردا قالاسى بولىپ تابىلاتىن پويىزداردان باسقا باعىت جولاۋشىلارى قالاعا كىرىپ-شىعا المايدى. وبلىس ورتالىعىنا كەلەتىن ترانزيتتىك جولاۋشىلار تەرەڭوزەك جانە شيەلى ستانسالارىنان ءتۇسىپ, جول بويىنداعى بلوك-بەكەتتەرگە كۋالاندىرۋشى قۇجاتتاردى ۇسىنا وتىرىپ قالاعا جەتە الادى.
ازىق-ت ۇلىك ساتۋمەن اينالىساتىن ساۋدا ورىندارىنىڭ, ءدارىحانالاردىڭ جانە ءبىرىنشى كەزەكتە قاجەتتى تاۋارلار ساتاتىن ورىندار كۇشەيتىلگەن سانيتارلىق-دەزينفەكتسيالىق رەجىمدە جۇمىس ىستەيدى. «كليەنتتەرگە دەيىن جەتكىزۋ» قاعيداتى بويىنشا جۇمىس ىستەۋگە كوشەتىن مەيرامحانالار مەن ءدامحانالار, قوعامدىق تاماقتانۋ ورىندارىنىڭ سانيتارلىق تالاپتى قاتاڭ ساقتاۋى تاپسىرىلدى.
جاعدايعا بايلانىستى وبلىس اكىمى گۇلشارا ابدىقالىقوۆا تۇرعىندارعا ۇندەۋ جاريالاپ, ارتىنشا جەدەل شتاب وتىرىسىن وتكىزدى. وتىرىستا ءتيىستى ورىندارعا مەديتسينالىق بەتپەردە, وزگە دە قۇرال-جابدىق, انتيسەپتيكتەرگە قاجەتتى قارجى كولەمىن ناقتىلاپ, ەسەبىن وبلىستىق ەكونوميكا جانە بيۋدجەتتىك جوسپارلاۋ باسقارماسىنا ۇسىنۋ تاپسىرىلدى. قاشىقتان وقىتۋ بويىنشا ءبىلىم بەرۋ ۇيىمدارى مەن وقۋشىلاردىڭ دايىندىعىن قامتاماسىز ەتۋ دە پىسىقتالدى.
وبلىستىق يندۋستريالىق-يننوۆاتسيالىق دامۋ باسقارماسى ايماقتاعى ءىرى كومپانيالاردىڭ ءوز قاراجاتى ەسەبىنەن بارلىق جۇمىسشىسىن كوروناۆيرۋستى انىقتايتىن تەستەن وتكىزۋىنە ىقپال ەتۋى قاجەت.
ازىق-ت ۇلىك قورىن مولايتىپ, ونى جەرگىلىكتى جەرلەرگە جەتكىزۋ ماسەلەسىن رەتتەي وتىرىپ, الەۋمەتتىك ماڭىزى بار تاۋار باعالارىنىڭ شارىقتاۋىنا جول بەرمەۋ اسا ماڭىزدى. وسى ماقساتتا وبلىستىق اۋىل شارۋاشىلىعى باسقارماسىنا وبلىستىق تۇراقتاندىرۋ قورىن تولىقتىرۋ جۇكتەلىپ وتىر.
وبلىس باسشىسى قالا جانە اۋدان اكىمدەرىنە, ءتيىستى ورىندار باسشىلارىنا توتەنشە جاعداي رەجىمىنە سايكەس قاۋىرت جۇمىس كۇتىپ تۇرعانىن ەسكەرتىپ, انىقتالعان دەرەكتەر بويىنشا جۇرتشىلىقتى دەرەۋ حاباردار ەتۋدى تاپسىردى.
وسىنداي قيىن ۋاقىتتاعى كۇردەلى ماسەلەنىڭ ءبىرى جۇمىس ورىندارىن ساقتاپ قالۋ.
– وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى قالا جانە اۋدان اكىمدەرىمەن بىرلەسىپ, وڭىرلەردەگى بوس جۇمىس ورىندارىنا كۇندەلىكتى مونيتورينگ جۇرگىزۋى ءتيىس. توتەنشە جاعدايدىڭ ەنگىزىلۋىنە بايلانىستى حالىقتىڭ الەۋمەتتىك وسال توپتارىن قولداۋ ساپالى ءارى ۋاقتىلى جۇرگىزىلۋى كەرەك, – دەدى گۇلشارا ناۋشاقىزى.
كەشە, ياعني 31 ناۋرىز كۇنى وبلىستاعى جاڭاقورعان اۋدانىنىڭ وزىندە تاعى 8 تۇرعىننىڭ بويىنان ۆيرۋس بەلگىسى تابىلدى. وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدىسامەتوۆ ولاردىڭ اۋداندىق اۋرۋحاناعا جاتقىزىلعانىن مالىمدەدى.
قىزىلوردا