بۇگىننەن باستاپ جامبىل وبلىسىنىڭ اۋماعىندا شەكتەۋ شارالارى ەنگىزىلدى. ءىرى ساۋدا ورىندارىنىڭ, كيىم بازارلارىنىڭ, مەيرامحانا, مونشا, شاشتاراز سياقتى الەۋمەتتىك نىسانداردىڭ جۇمىسى توقتاتىلدى. وبلىس اۋماعىنا كىرەتىن, شىعاتىن كولىك قوزعالىسى شەكتەلدى.
بۇگىنگى تاڭدا وبلىستىڭ بارلىق اۋداندارىندا ساقتىق شارالارى كۇشەيتىلۋدە. حالىقارالىق «الماتى-تاشكەنت» تاسجولىنىڭ بويىندا ورنالاسقان ت.رىسقۇلوۆ اۋدانىندا حالىق كوپ شوعىرلانعان كوشەلەردە ارنايى داۋىس زورايتقىشپەن جۇرتشىلىققا ۇيدەن شىقپاۋ, وقشاۋلانۋ تالاپتارى, كوروناۆيرۋس ينفەكتسياسىنىڭ الدىن-الۋ شارالارى تۋرالى ءتۇسىندىرۋ جۇمىستارىن جۇرگىزۋدە. كوروناۆيرۋس ينفەكتسياسىنىڭ الدىن الۋ شارالارى اياسىندا اۋداندا 3 جەردە بلوك-پوستتار جابدىقتالىپ, ءتيىستى ماماندار تاۋلىكتىك جۇمىستارىن باستاپ تا كەتتى. ال, ەلىمىزدىڭ الماتى وبلىسى جانە كورشى قىرعىز رەسپۋبليكاسىمەن شەكتەسەتىن قورداي اۋدانىندا دا بۇگىننەن باستاپ شەكتەۋ شارالارى ەنگىزىلدى. سول سياقتى ەلىمىزدىڭ تۇركىستان وبلىسىمەن شەكتەسەتىن سارىسۋ اۋدانىندا دا كۇن سايىن شتاب وتىرىسى وتكىزىلىپ, اتى جامان ىندەتتىڭ الدىن الۋعا ءتيىستى مۇمكىندىكتەر جاسالۋدا. تۇركىستان وبلىسىنا شىعا بەرىستە ورنالاسقان جايىلما اۋىلىنىڭ تۇسىنا سانيتارلىق بەكەت ورناتىلعان. اكىمدىكتىڭ مالىمەتىنشە, ونىڭ جۇمىسى قاتاڭ باقىلاۋدا. سونىمەن قاتار, اۋدان بويىنشا 8 مەيرامحانا-تويحانالار جۇمىسىن توقتاتقان. ەرىكتىلەردىڭ باستاماسىمەن اۋدان ورتالىعى جاڭاتاس قالاسى مەن اۋىلدىق وكرۋگتەردە 21 تىگىن تسەحى ءوز جۇمىسىن باستاپ, حالىققا 3500-دەن استام مەديتسينالىق ماسكا تاراتىلعان. ال, ەلىمىزدىڭ قاراعاندى وبلىسىمەن شەكتەسەتىن مويىنقۇم اۋدانىندا دەزينفەكتسيالىق جۇمىستار جۇيەلى جۇرگىزىلۋدە. اۋدان ورتالىعى مويىنقۇم اۋىلىنداعى بىرقاتار جەرلەرگە كوروناۆيرۋس ىندەتىنەن ساقتانۋ جولدارى تۋرالى جازىلعان تۇسىندىرمە جۇمىستارى ىلىنگەن. سونداي-اق, اۋدانداعى مەيرامحانالار جابىلعان. ايتا كەتەيىك, تۇرعىنداردىڭ قاۋىپسىزدىگىن قامتاماسىز ەتۋ ماقساتىندا بۇگىندە جامبىل وبلىسى بويىنشا 16 بلوك-بەكەت جۇمىس ىستەيدى.
جامبىل وبلىسى