بۇل تۋرالى الماتىدا “نۇر وتان” حالىقتىق-دەموكراتيالىق پارتياسى الماتى قالالىق فيليالى باستاۋىش ۇيىمدارىنىڭ فورۋمىندا ءسوز سويلەگەن “نۇر وتان” حدپ توراعاسىنىڭ ءبىرىنشى ورىنباسارى نۇرلان نىعماتۋلين جاريا ەتتى. بۇگىندە جوعارى پارتيا مەكتەبىن قۇرۋ بويىنشا ۇيىمداستىرۋ-تەحنيكالىق جۇمىستارى جۇرگىزىلۋدە.
الماتىعا العاش كەلىپ, فورۋم جۇمىسىنا قاتىسقان نۇرلان نىعماتۋلين الدىمەن پارتيا باسشىلىعى مەملەكەت باسشىسى قويعان مىندەتتەردى ورىنداۋداعى نەگىزگى ىستەردى اتقاراتىن باستاۋىش بۋىنداردىڭ جۇمىسىنا ۇلكەن ماڭىز بەرە كەتتى.
– الداعى ۋاقىتتا دا پرەزيدەنتىمىز, پارتيامىزدىڭ ءتوراعاسى ن.نازارباەۆتىڭ بيىلعى تاريحي جولداۋىن باسشىلىققا الا وتىرىپ, جاڭا قادامدار جاساۋىمىز كەرەك. ول جۇمىستاردى اتقارۋدا باستاۋىش پارتيا ۇيىمدارىنىڭ ءرولى ەرەكشە ەكەنى ءوزدەرىڭىزگە بەلگىلى. بۇگىنگى كۇنى ەلىمىز بويىنشا پارتيانىڭ 6 مىڭنان استام باستاۋىش ۇيىمى بولسا, سونىڭ 612-ءسى الماتى قالاسىندا. ولاردىڭ بارلىعى تىكەلەي حالىقپەن بىرگە جۇرەتىن, ەلگە كومەك كورسەتەتىن, قاتارىمىزدى جاڭارتىپ وتىراتىن “نۇر وتاننىڭ” نەگىزگى كۇشى دەۋگە بولادى, – دەدى نۇرلان زايرۋللا ۇلى.
ودان ءارى ول پارتيا جۇمىسى نەگىزگى ءۇش باسىمدىقتان تۇراتىنىن, ونىڭ ءبىرىنشىسى – پرەزيدەنتتىڭ ستراتەگياسىن جۇزەگە اسىرۋعا جۇمىلا كىرىسۋ, ەكىنشىسى – تومەننەن باستاما كوتەرۋ, سوعان سايكەس جوسپارلارىن قايتا قاراۋ, ءۇشىنشىسى – پارتيالىق ۇيىمدار جوعارىدان نۇسقاۋ كۇتپەي, تۋىنداعان ماسەلەلەرگە دەرەۋ نازار اۋدارىپ, ناقتى ناتيجەگە قول جەتكىزۋ ەكەندىگىن العا تارتتى. سونىمەن قاتار, باستاۋىش ۇيىم جەتەكشىلەرىن وقىتۋ مەن دايىنداۋ اسا ماڭىزدى ماسەلەنىڭ ءبىرى ەكەندىگىن, ول تۋرالى پارتيا باسشىسىنىڭ پارتيالىق-ساياسي وقۋ جونىندە تاپسىرماسىن ورىنداۋ بارىسىندا “نۇر وتان” پارتياسىنىڭ جوعارى پارتيالىق مەكتەبىن قۇرۋ بويىنشا ۇيىمداستىرۋ-تەحنيكالىق جۇمىستارىنىڭ باستالىپ كەتكەنىن, بۇل مەكتەپ ەلدىڭ پارتيالىق-ساياسي ەليتاسىن قالىپتاستىرۋ ورتالىعىنا اينالۋى تيىستىگىن اتاپ كورسەتتى.
– وندا ورتالىقتىڭ عانا ەمەس, ايماقتىق پارتيا باسشىلارى دا ءدارىس الاتىن بولادى. مەكتەپ بىرنەشە كەزەڭنەن وتەدى. بيىلدىڭ وزىندە ورتالىق دەڭگەيدە پارتيا اپپاراتى مەن شتات قىزمەتكەرلەرىن, باستاۋىش پارتيا ۇيىمى باسشىلارىن وقىتۋدى باستاماقپىز. ال كۇزدە ايماقتىق ورتالىقتار اشىلادى. ونىڭ العاشقىسىن باتىس ءوڭىرى ءۇشىن اقتوبەدە اشۋ كوزدەلىپ وتىر. 2011 جىلى تاعى دا 4 پارتيا وقىتۋ ورتالىعى جۇمىس ىستەيتىن بولادى, – دەدى پارتيا توراعانىڭ ءبىرىنشى ورىنباسارى.
فورۋمدا “نۇر وتان” حدپ الماتى قالالىق فيليالىنىڭ ءتوراعاسى, الماتى قالاسىنىڭ اكىمى احمەتجان ەسىموۆ پارتيا قۇرىلعاننان بەرگى ۋاقىتتا قالاداعى باستاۋىش پارتيا ۇيىمدارىنىڭ قوعامداعى تەرىس ارەكەتتەرمەن كۇرەس جۇرگىزۋدەگى بەلسەندىلىگىنە, پارتيا توراعاسىنىڭ قويعان مىندەتتەرىن ورىنداۋدا ونەركاسىپ دەڭگەيىن قۇلدىراتپاۋ, جاپپاي جۇمىسسىزدىققا جول بەرمەۋ, الەۋمەتتىك قاقتىعىستاردىڭ الدىن الۋ, ت.ب. ماسەلەلەرگە كەڭىنەن توقتالدى. سونىمەن قاتار, دەر كەزىندە قابىلدانعان داعدارىسقا قارسى باعدارلامانىڭ ارقاسىندا الماتىدا ءوندىرىس توقتاماي, كۇتىلگەن جاپپاي جۇمىسسىزدىق بولماعانىنا نازار اۋداردى. كەرىسىنشە, “جول كارتاسى” ارقىلى 50 مىڭ الماتىلىق جۇمىسپەن قامتىلىپتى. ۇلەسكەرلەر ماسەلەسى دە قازىر بۇرىنعىداي وتكىر تۇرعان جوق.
سونداي-اق, احمەتجان سماعۇل ۇلى دەموكراتيالىق ەل بولعاندىقتان, وپپونەنتتەر مەن وپپوزيتسيانىڭ بار ەكەنىن اشىق ايتا كەلە, شاھار باسشىسى رەتىندە ولاردىڭ اراسىندا بايسالدى ۇسىنىستارمەن شىعاتىندارىمەن كەلىسۋگە تۋرا كەلەتىنىن, جاقىندا ولاردىڭ باسشىلارىمەن كەزدەسكەندە تۇرعىن ءۇي-كوممۋنالدىق شارۋاشىلىق جۇيەسىن جەتىلدىرۋدە اكىمدىكتىڭ قىزمەتكەرلەرى مەن وپپوزيتسيا وكىلدەرىنەن تۇراتىن جۇمىس توبىن قۇراتىندارىن, ماسەلەن, “شاڭىراققا” قاتىستى ولارمەن ءوزارا تۇسىنىستىك تاۋىپ وتىرعانىن دا تىلگە تيەك ەتتى.
– سىن – جاقسى نارسە. بۇرىن جوعارىدان عانا ەمەس, تومەننەن دە سىن ايتىلاتىن. پارتيالىق قىزمەتتە وسى قۇرالدى دا پايدالانۋىمىز كەرەك. تەك سىن وبەكتيۆتى جاعدايدا بولعاندا عانا جالپى مۇددەگە قىزمەت ەتەتىن بولادى, – دەدى قالا اكىمى.
پارتيانىڭ سايلاۋ ورگاندارىنىڭ شەشىمدەرىن جۇزەگە اسىرۋدا 48 مىڭعا جۋىق مۇشەسى بار الماتى قالالىق فيليالىنىڭ باستاۋىش پارتيا ۇيىمدارىنىڭ ءرولى مەن جۇمىسىنىڭ تيىمدىلىگىن ارتتىرۋ جولدارى جونىندە بايان ەتكەن “نۇر وتان” حدپ الماتى قالالىق فيليالى توراعاسىنىڭ ءبىرىنشى ورىنباسارى امانگەلدى كارىموللين ءسوز رەتىندە كەيبىر باستاۋىش پارتيا ۇيىمدارىنىڭ كوزبوياۋشىلىقتان اسا الماي وتىرعانىن سىنعا الدى.
“نۇر وتان” حدپ الماتى قالالىق ماسليحاتىنداعى دەپۋتاتتار فراكتسياسىنىڭ باسشىسى, قازاق ۇلتتىق اگرارالىق ۋنيۆەرسيتەتىنىڭ رەكتورى تىلەكتەس ەسپولوۆ بۇگىنگى كەزدەگى ەڭ جوعارى جاۋاپكەرشىلىك, ەڭ نەگىزگى پارتيانىڭ مىندەتى – باستاۋىش پارتيا ۇيىمدارىنىڭ بەلسەندىلىگىندە ەكەندىگىنە توقتالا كەلىپ, ءىرى مەگاپوليس رەتىندە الماتى قالاسىنىڭ دامۋى قازاقستاننىڭ يندۋستريالىق-يننوۆاتسيالىق باعدارلاماسىنا تىكەلەي بايلانىستىلىعىن, وسى رەتتە دەپۋتاتتىق فراكتسيا وڭتۇستىك استانادا ەل ەكونوميكاسىنىڭ لوكوموتيۆى مارتەبەسىن ويداعىداي ورىنداپ وتىرعانىن جەتكىزدى.
بيلىك پارتياسىنىڭ ايماقتارداعى جۇمىسىن ۇيلەستىرىپ, ناقتى ءىس-ارەكەت ەتۋدە باستاۋىش پارتيا ۇيىمدارى – حالىقپەن بىرگە ءجۇرەتىن, ونىڭ مۇڭ-مۇقتاجىن تىڭداپ, كومەك كورسەتەتىن نەگىزگى كۇش. وسى رەتتە, اسىرەسە, اۋداندىق, اۋىلدىق دەڭگەيدەگى پارتيا ءبولىمشەلەرىنە ۇلكەن سالماق جۇكتەلەدى.
فورۋم سوڭىندا بەلسەندىلىگىمەن ەرەكشە كوزگە تۇسكەن “لوكوموتيۆ” اق, “راحات” اق جانە ءال-فارابي اتىنداعى قازۇۋ باستاۋىش پارتيا ۇيىمدارى العىس حاتپەن, باعالى سىيلىقتارمەن ماراپاتتالدى.
گۇلزەينەپ سادىرقىزى.