27 ناۋرىزدا جانگەلدين اۋدانىنا قاراستى قاراسۋ اۋىلىنان 30 شاقىرىم جەردەگى سۇپىلى مەكەنىندە ۇستالعان ەكى براكونەر ارقالىق قالاسى مەن امانگەلدى اۋدانىنىڭ تۇرعىندارى بولىپ شىقتى. پوليتسەيلەر كۇدىكتىلەر مىنگەن «نيۆا» اۆتوكولىگىنەن ەكى اڭشى مىلتىعىن, 133 وق, 2 اقبوكەن ءمۇيىزىن الىپ شىققان. سونداي-اق, اۆتوكولىكتىڭ جۇكسالعىشىنان سپورت سومكەسى مەن ەگەۋ تابىلعان. تابيعات ساقشىلارى كولىك ىزىمەن ءجۇرىپ وتىرىپ, 3 اقبوكەن ولىگىنىڭ ۇستىنەن تۇسەدى.
- اقبوكەن ولىكتەرى ساراپتاماعا جىبەرىلدى. كۇدىكتىلەر قاماۋعا الىنىپ, ۇيالى تەلەفوندارى تەكسەرىلىپ جاتىر. قازىر تەرگەۋ امالدارى جۇرۋدە. مۇنداي وقيعا جىل باسىنان بەرى ەكىنشى رەت تىركەلىپ وتىر, - دەپ حابارلادى قوستاناي وبلىسى پوليتسيا دەپارتامەنتىنىڭ ءباسپاسوز قىزمەتى.
قوستاناي وبلىسى