اتىراۋ وبلىسىنىڭ اكىمى ماحامبەت دوسمۇحامبەتوۆ ءوڭىر تۇرعىندارىنا ساقتىق ەرەجەلەرىن ساقتاۋعا بايلانىستى ۇندەۋىن جولدادى.
اكىمنىڭ جۇرتشىلىققا ۇندەۋ جولداۋىنا اتىراۋدا كوروناۆيرۋس ينفەكتسياسىن جۇقتىرۋشىلاردىڭ 13-كە جەتۋى سەبەپ بولىپ وتىر. وسىعان وراي اتىراۋ وبلىسىنىڭ باس مەملەكەتتىك سانيتارلىق دارىگەرى مەيىرجان ەسىمباەۆتىڭ قاۋلىسىمەن 30 ناۋرىزدان باستاپ اتىراۋ قالاسىندا كارانتين, ال, وبلىس اۋماعىندا شەكتەۋ شارالارى قابىلداندى.
ء«بىز سىزدەردىڭ اماندىقتارىڭىز بەن قاۋىپسىزدىكتەرىڭىز ءۇشىن وسىنداي قادامعا باردىق. ماقساتىمىز قاۋىپتى ۆيرۋستىڭ تارالۋىنىڭ الدىن الۋ.
ساقتانساڭ ساقتايدى! بۇل ۆيرۋستى جەڭۋدىڭ توتە جولى — گيگيەنالىق تازالىقتىڭ مىنسىزدىگى مەن ۇيدەن شىقپاۋ. توي-تومالاققا, ادام كوپ جەرلەرگە بارماۋ ء–وز ءومىرىڭدى ساقتاۋ. وزگەنىڭ ومىرىنە قاۋىپ توندىرمەۋ ەكەنى ەستەرىڭىزدە بولسىن. الەمدە كوروناۆيرۋستى جەڭۋدىڭ بۇدان اسقان ەمى تابىلعان جوق.
قوناققا بارۋ, بازار مەن دۇكەندەردە توپىرلاپ ءجۇرۋ ەڭ ۇلكەن قاۋىپ ەكەنىن ەسكەرتەمىن. سەبەبى, ءجۇرىس كوبەيگەن سايىن ۆيرۋس كوبەيەدى. شۇبىرىپ ءارى-بەرى جۇرگەندى قويىڭىزدار.
ءوزىڭىزدى, بالا-شاعاڭىزدى, اۋلەتىڭىزدى ويلاساڭىز, ۇيدەن كوپ شىقپاڭىزدار. قازىنا قاريالارىمىزعا دا قاتەر توندىرمەۋدى ويلاڭىزدار.
كۇندەلىكتى ءبىر ادام عانا كەرەك-جاراقتى اكەلىپ تۇرسا, بۇدان اسقان قورعانىس جوق. سابىرمەن, اقىلمەن از عانا ۋاقىت شىداساق, كۇندەلىكتى ومىرىمىزگە قايتا ورالامىز. سوندا عانا اۋرۋدىڭ تاراۋى تەز تىيىلىپ, جۇقتىرعانداردى جىلدام ەمدەي الامىز.
«قامىستى بوس ۇستاساڭ قولىڭدى كەسەدى» دەيدى اتام قازاق. سوندىقتان قازىر اسىرەسە, جاستاردى قاتتى ۇستاڭىزدار. ويتكەنى, الەمنىڭ كوپتەگەن ەلىندە ينفەكتسيانى تاسۋشى ءارى وزگەلەرگە جۇقتىرۋشىلاردىڭ باسىم كوبى جاستار ەكەنى ايتىلۋدا.
قازىر بۇرىنعى زامان ەمەس, بايلانىس قۇرالدارى دامىعان. الەۋمەتتىك جەلىلەر مەن مەسسەندجەرلەر ارقىلى تۋما-تۋىس, كورشى-قولاڭمەن ەش قيىندىقسىز تىلدەسە الاسىزدار. ۇيدە كىتاپ وقىپ, كينو كورىپ, بالالارىڭىز بەن وتباسىلارىڭىزعا كوبىرەك كوڭىل بولىڭىزدەر. بۇل كۇندەردى – سول ءۇشىن تاپتىرماس مۇمكىندىك رەتىندە كورىڭىزدەر.
ءتارتىپ بۇزعاندارعا ءتيىستى قۇقىق قورعاۋ قىزمەتتەرى قاتاڭ شارالار قولداناتىنىن ەسكەرتەمىن. سىزدەردى دە ءتارتىپتى بولۋعا عانا ەمەس, ءتارتىپتى بىرگە قورعاۋعا شاقىرامىن. سەبەبى, بۇل –بارشامىزدىڭ قاۋىپسىزدىگىمىز ءۇشىن جاسالىپ جاتقان شارالار», -دەدى وبلىس اكىمى ماحامبەت دوسمۇحامبەتوۆ جۇرتشىلىققا ارناعان ۇندەۋىندە.
جۇماسات عازيز