قوستاناي وبلىسىندا #BizBirgemiz قايىرىمدىلىق اكتسياسى اياسىندا 60-تان استام ىسكەر ايەل وڭىردەگى تۇرمىسى تومەن, كوپ بالالى وتباسىلار مەن جالعىز باستى قارتتارعا, ءتىپتى باسىن قاتەرگە تىگىپ كوپشىلىك ورىنداردا ءتارتىپ كۇزەتىندە جۇرگەن پوليتسيا قىزمەتكەرلەرىنە دە كومەك كورسەتۋدە.
توتەنشە جاعداي عوي دەپ قازان-وشاق باسىندا قول قۋسىرىپ قاراپ وتىرماي, قوعامعا پايدالى ىزگىلىك اكتسياسىن قولعا العان ايەلدەردىڭ قاتارىندا كاسىپكەرلەر, قوعام بەلسەندىلەرى, ۇستازدار, ديقاندار بار.
- رەجىم ءتارتىبى ەنگىزىلگەلى ءبىز, ەڭ ءبىرىنشى كەزەكتە, جالعىز تۇراتىن سۇيەنىش-تىرەنىشى جوق زەينەتكەرلەرگە, بۇكىل وتباسىنىڭ اۋىرتپالىعىن ءوزى عانا كوتەرىپ جۇرگەن كوپ بالالى انالارعا ازىق-ت ۇلىك جانە تازالىققا قاجەت باسقا دا تاۋارلاردى اپارىپ بەرىپ جاتىرمىز. كەشە عانا «سۇلتان» اتەلەسىنىڭ ديرەكتورى ماليكا تولەمىسوۆا وبلىس ورتالىعىنداعى ۋچاسكەلىك ينسپەكتورلارعا 450, جىتىقارا پوليتسەيلەرىنە 150 ماسكا ۇلەستىرىپ بەردى. ءبىز قۇقىق قورعاۋ ورگاندارىنىڭ ءوزىن-ءوزى قامتاماسىز ەتە الاتىنىن جاقسى تۇسىنەمىز. بىراق قازىرگى جاعدايدا ماسكا ەشقاشان ارتىق بولمايدى. سونداي-اق, «سارىباي» اگروفيرماسىنىڭ باسشىسى سۆەتلانا ميحايلەنكو قوستاناي جانە بەيىمبەت مايلين اۋداندارىندا تۇراتىن 200 وتباسىعا ازىق-ت ۇلىك تۇرىندە كومەك كورسەتتى, - دەدى وبلىستىق ىسكەر ايەلدەر قاۋىمداستىعىنىڭ ءتورايىمى گۇلسارا جامانقۇلوۆا.
قاۋىمداستىق جەتەكشىسىنىڭ ايتۋىنشا, ىسكەر ايەلدەردىڭ يگى ءىسى ءالى دە جالعاسادى. قازىر ارداگەرلەر كەڭەسىنەن, الەۋمەتتىك قورعاۋ باسقارماسىنان كومەككە شىنىمەن مۇقتاج وتباسىلاردىڭ ءتىزىمى سۇراستىرىلىپ, ولاردىڭ مەكەنجايى انىقتالىپ جاتىر. جومارت جۇرەك كاسىپكەر انالار ولارعا وسى اپتانىڭ سوڭىنا قاراي ماتەريالدىق كومەك كورسەتپەك. ىسكەر ايەلدەر قاۋىمداستىعىنىڭ مۇشەلەرى ماتەريالدىق كومەككە قوسا, قازىرگى جاعدايدا كوپشىلىكتى مورالدىق تۇرعىدان قولداۋ اسا ماڭىزدى دەپ بىلەدى.
- قازىر قىزىم مەن نەمەرەم يتالياداعى باستى ىندەت وشاعىنا اينالعان لامبورديا پروۆينتسياسىندا تۇرادى. سوندىقتان بۇل ىندەتتىڭ ادامزات بالاسىنا قانشالىقتى قاۋىپتى ەكەنىن جاقسى تۇسىنەمىن. قىزىم مەن نەمەرممەن كۇن سايىن حابارلاسىپ وتىرامىن. ەندى ءوز ەلىم ءۇشىن نە ىستەي الامىن. وتانداستارىما قايتسەم, كومەكتەسەمىن؟ – دەگەن وي مازالاپ, اقىرى الەۋمەتتىك جەلىدەن جەكە پاراقشا اشىپ, ءوزىمنىڭ بالالارعا ارنالعان ەرتەگىلەرىمدى جاريالاي باستادىم. بايقايمىن, وقىلىمى جامان ەمەس سياقتى, - دەدى ارداگەر ۇستاز الەكساندرا سۋسلوۆا.
ساياساتكەر ايەلدەر كلۋبىنىڭ جەتەكشىسى ريما بەكتۇرعانوۆا دا قاراپ جاتقان جوق. قايراتكەر انا الەۋمەتتىك جەلى ارقىلى «الدىڭعى شەپتە» دەپ اتالاتىن چەللەندج باستاپ, كورىنبەيتىن دۇشپانعا قارسى مايداننىڭ الدىڭعى شەبىندە جۇرگەن بۇگىنگى كۇننىڭ قاھارماندارى - دارىگەرلەردىڭ ەرلىك ءىسىن دارىپتەپ جاتىر. - جىلى ءسوز جان جادىراتادى. قازىر ءبارىمىز جىلى اقپاراتقا, قۋانىشتى حابارعا, جاقسى سوزگە شولىركەدىك. سوندىقتان ءبىر-بىرىمىزگە ەڭ بولماسا جاقسى ءسوز ايتۋ ارقىلى قۋات بەرىپ, جاناشىرلىق تانىتۋىمىز كەرەك, - دەيدى ول.
قوستاناي وبلىسى