مەڭدىقارا اۋدانىنا قاراستى قاسقات ەلدى مەكەنىندە تۇراتىن 28 جاستاعى ەر ادام ۆاتساپ مەسسەندجەرى ارقىلى 29 ناۋرىزدان باستاپ قوستاناي, ليساكوۆ, رۋدنىي, توبىل قالالارى كارانتينگە جابىلىپ, وبلىستىڭ بارلىق كۇرە جولدارىنداعى كولىك قوزعالىسىنا تىيىم سالىنادى دەگەن جەل ءسوز تاراتقان. قازىرگى اھۋال مۇنداي قۇيتىرقىلىقتى كوتەرمەيدى. ونسىز دا كوڭىلىن الاڭ باسقان ەل جاقسى لەپەسكە سۋساپ وتىر. پوليتسيا اشىق اۋىزدىڭ كىم ەكەنىن انىقتاپ, توتەنشە جاعداي كەزىندە جالعان اقپارات تاراتقانى ءۇشىن قر قك-ءنىڭ 274 بابى بويىنشا سوتقا دەيىنگى تەرگەۋ امالدارىن باستادى. ەندى بۇل ازامات 3 جىلدان 7 جىلعا دەيىن باس بوستاندىعىنان ايىرىلۋى مۇمكىن.
جەرگىلىكتى پوليتسيا قىزمەتىنىڭ باستىعى قۇرمەت ماجىكەنوۆ توتەنشە جاعداي رەجىمى جاريالانعالى, جالعان اقپارات تاراتقانى ءۇشىن وسىمەن ءتورتىنشى ادام قىلمىستىق جاۋاپقا تارتىلىپ وتىرعانىن اتاپ ءوتتى. ونىڭ اتسيتۋىنشا, وبلىستا كولىك قوزعالىسىنا ەشقانداي شەكتەۋ قويىلماعان. تەك قوستاناي-نۇر-سۇلتان-الماتى باعىتىنداعى كۇرە جولدىڭ بويىنا پاترۋل قىزمەتى قويىلىپ, ءتارتىپ ساقشىلارى جولاۋشىلارعا جۇقپالى ىندەتكە قارسى ەل ىشىندە جۇرگىزىلىپ جاتقان ءىس-شارالاردىڭ ءمان-جايىن ءتۇسىندىرىپ, اتالعان ەكى قالاعا كىرۋگە جانە شىعۋعا تىيىم سالىنعانىن ءتۇسىندىرۋ جۇمىستارىن جۇرگىزۋدە.
پوليتسيا وبلىس تۇرعىندارىن الەۋمەتتىك جەلىلەر ارقىلى تولاسسىز تاراپ جاتقان جەل سوزگە يلانىپ, بەكەرگە دۇرلىگۋدەن ساقتانۋعا ۇندەدى. سونداي-اق, رەسمي اقپاراتقا عانا سەنۋ كەرەكتىگىن ەسكەرتتى.
قوستاناي وبلىسى