تۇركىستان وبلىستىق كلينيكالىق اۋرۋحاناسىمەن قاتار وڭىردەگى بارلىق مەديتسينالىق ۇيىمدار پاتسيەنتتەردى قابىلداۋعا دايىن, قاجەتتى ءدارى-دارمەكتەرمەن قامتىلعان.
بۇل تۋرالى وبلىستىق كلينيكالىق اۋرۋحاناسىنىڭ ينفەكتسيونيست-دارىگەرى تاتيانا قاسىموۆا مالىمدەدى. ال وبلىستىق قوعامدىق دەنساۋلىق باسقارماسىنىڭ شتاتتان تىس باس ەپيدەميولوگ - دارىگەرى گۇلنار تولەپوۆا كوروناۆيرۋستىڭ تارالۋىنا جول بەرمەۋ ءۇشىن تۇرعىندار ۇستانۋلارى ءتيىس پروفيلاكتيكالىق شارالاردى, ياعني ساقتانۋ جولدارىن ءتۇسىندىردى.
«الەمدى الاڭداتىپ وتىرعان ۆيرۋسپەن كۇرەستە قولدى سابىنمەن ءجيى جانە مۇقيات جۋ, ادامدار كوپ جينالاتىن جەرلەرگە بارماۋ, ناۋقاس ادامدارمەن (جرۆي) قارىم-قاتىناستا بولماۋ, دەنە قىزۋىنىڭ كوتەرىلۋى, جوتەلۋ, قيىن دەمالۋ بەلگىلەرى بولسا 103 ءنومىرى ارقىلى جەدەل مەديتسينالىق كومەك شاقىرۋ قاجەت» دەدى گ.تولەپوۆا.
قوعامدىق دەنساۋلىق باسقارماسىنىڭ شتاتتان تىس رەانيماتولوگى ۆياچەسلاۆ تساي دارىگەرلەر بۇكىل الەمدى دۇرلىكتىرگەن ىندەتكە قارسى بىرنەشە رەت وقۋ كۋرستارىنان وتكەنىن ايتىپ ءوتتى. سونداي-اق قوسىمشا سۇراقتار تۋىنداعان جاعدايدا تۇرعىندارعا 1406 تەلەفونى جانە ءوڭىر بويىنشا 109 ءنومىرى ارقىلى شۇعىل اقپاراتتىق ورتالىعىنا حابارلاسۋلارىنا بولاتىنىن جەتكىزدى.
تۇركىستان وبلىسى