«سۇرانىس ۇسىنىستى تۋدىرادى» دەگەن راس ءسوز. مەديتسينالىق ماسكاعا دەگەن قاجەتتىلىك قاراعاندىلىق ىسمەرلەردى تىڭ ىزدەنىستەرگە بارۋعا يتەرمەلەدى. مىسالى, وبلىستاعى اباي قالاسىنىڭ تىگىنشىلەرى «كەت, COVID-19!», «دەنىمىز ساۋ بولسىن!»جانە باسقا دا جالت قاراتار جازۋلارى بار بەتپەردەلەر تىگە باستادى.
– قيىن كەزەڭدە ءوز-ءوزىمىزدى سابىرعا كەلتىرىپ, ءوپتيميزمدى ساقتاۋ وتە ماڭىزدى, – دەيدى اباي تىگىن فابريكاسى شەبەرلەرىنىڭ جەتەكشىسى يرينا ماليۋك.
كاسىپورىن ىسمەرلەرى تازا ماقتا ماتاسىن پايدالانىپ, ساپالى ماسكالار تىگەدى. ءبىر ەرەكشەلىگى, ولاردى جۋىپ, ۇتىكتەپ, قايتا پايدالانۋعا بولادى.
ونىمگە زاۋىتتار, قۇرىلىس كومپانيالارى, ناۋبايحانالار, مەديتسينالىق مەكەمەلەر جانە وبلىس تۇرعىندارى تاپسىرىس بەرەدى. يرينا ماليۋكتىڭ ايتۋىنشا, فابريكا كۇنىنە 2 مىڭنان 4 مىڭ داناعا دەيىن ماسكا تىگەدى ەكەن.
وندىرىلگەن تاۋار تۇتىنۋشىلاردىڭ كوڭىلىنەن شىعۋى ءۇشىن, تىگىنشىلەر اق جانە قارا ءتۇستى ماسكالارمەن قاتار كوڭىلدى باستىرمالارى, كەستە, ءپوزيتيۆتى جازۋلارى بار بەتپەردەلەردى دە ۇسىناباستادى.