قازاقستان ديپلوماتتارىنىڭ كۇش-جىگەرىمەن ءۇندىستان جانە وڭتۇستىك-شىعىس ازيانىڭ بىرقاتار ەلىنەن قازاقستان ازاماتتارى ەلگە ورالدى. بۇل تۋرالى ءسىم ءباسپاسوز قىزمەتى حابارلادى.
ءۇندىستان بيلىگىنىڭ حالىقارالىق رەيستەردى جۇزەگە اسىرۋعا تىيىم سالعانىنا قاراماستان, 17-22 ناۋرىز ارالىعىندا دەليدەگى قازاقستان ەلشىلىگىنىڭ ديپلوماتتارى ءبىزدىڭ 538 ازاماتىمىزعا قازاقستانعا قايتۋعا قولعابىس كورسەتتى.
17 ناۋرىزدا قازاقستاندىق «Kompas Tour» تۋروپەراتورىنىڭ چارتەرلىك رەيسىمەن گوا شتاتىنان الماتىعا 204 قازاقستان ازاماتى كەلدى. قالعان 77 جولاۋشى گوا - دەلي - الماتى باعىتىمەن ەلگە ورالدى. سونىمەن قاتار, 204 قازاقستاندىق شري-لانكادان «تۋريستىك قامقور» قورى ۇيىمداستىرعان چارتەرلىك رەيسپەن شىعارىلدى. تاعى ەكى وتانداسىمىز وسى ەلدىڭ استاناسى كولومبودان التەرناتيۆتى باعىتىمەن ۇشىپ شىعۋعا جاردەم كورسەتىلدى. 10 قازاقستاندىق تۋريست مالديۆ رەسپۋبليكاسىنان مالي - ماسكەۋ - الماتى باعىتىمەن ۇشىپ كەتتى.
قازاقستاننىڭ مالايزياداعى ەلشىلىگى ءبىزدىڭ ازاماتتارىمىزعا قانداي دا ءبىر ايىپپۇل سانكتسيالارىن تولەمەي, اۋەبيلەت مەرزىمىن اۋىستىرۋعا كومەك كورسەتتى.
سونىمەن قاتار, مالايزياداعى ديپلوماتارىمىزدىڭ كومەگىمەن 22 ناۋرىزدا Air Astana اۋەكومپانياسىنىڭ كۋالا-لۋمپۋر - الماتى باعىتى بويىنشا تۇراقتى رەيسىمەن 158 جولاۋشى, ونىڭ ىشىندە يندونەزيا مەن سينگاپۋردان 80 ترانزيتتىك جولاۋشى ورالدى.
ەلشىلىك پەن Air Astana اۋەكومپانياسىنىڭ قىزمەتكەرلەرى اۋەجايدا اتالمىش جولاۋشىلارعا ىستىق تاماق ۇيىمداستىردى. اۋەكومپانيانىڭ اقپاراتى بويىنشا, كۋالا-لۋمپۋر - الماتى باعىتىنداعى سوڭعى رەيس 29 ناۋرىزعا جوسپارلانعان.