كوروناۆيرۋس ىندەتىن جۇقتىرعان ناۋقاسپەن بايلانىستا بولعان جامبىل وبلىسىنىڭ 10 تۇرعىنىنىڭ قان تالداۋى تەرىس ناتيجە كورسەتتى. وسى ۋاقىتقا دەيىن حابارلانعانداي, 20 ناۋرىز كۇنى الماتى وبلىسىنىڭ تۇرعىنى «كوروناۆيرۋستىق ينفەكتسيا» دياگنوزىمەن قاراساي اۋداندىق اۋرۋحاناسىنا جاتقىزىلعان بولاتىن.
ناۋقاسپەن بۇعان دەيىن بايلانىستا بولعان جامبىل وبلىسىنىڭ 10 تۇرعىنى انىقتالىپ, كارانتينگە جاتقىزىلدى. ال, جامبىل وبلىسىنىڭ اكىمدىگى ولاردان كوروناۆيرۋسقا الىنعان قان تالداۋلار قورىتىندىسى تەرىس ناتيجە كورسەتكەنىن مالىمدەدى.
«كارانتيندەگى ادامداردىڭ ەشبىرىنەن شاعىم جوق. جاعدايلارى قاناعاتتانارلىق. ولارعا مەديتسينالىق باقىلاۋ جۇرگىزىلۋدە. سونىمەن قاتار كوروناۆيرۋستىق ينفەكتسيانىڭ الدىن الۋ ماقساتىندا قوعامدىق ورىندارعا بارۋدان باس تارتۋدىڭ, جەكە گيگيەنا شارالارىن ساقتاۋدىڭ, قول الىسىپ امانداسۋدىڭ جانە باسقا دا جاقىن قارىم-قاتىناستاردا بولماۋدىڭ ماڭىزدىلىعىن ەسكەرتەمىز. تۇرعىنداردى تەك رەسمي اقپارات كوزدەرىنە سەنۋگە, جالعان اقپاراتتار مەن حابارلامالاردى تاراتپاۋعا شاقىرامىز. ول ءۇشىن قىلمىستىق جاۋاپكەرشىلىك قارالعانىن جەتكىزەمىز», دەلىنگەن جامبىل وبلىسىنىڭ اكىمدىگى تاراتقان اقپاراتتا.
جامبىل وبلىسى