22 ناۋرىزدا 00:00 ساعاتتان باستاپ نۇر-سۇلتان جانە الماتى قالالارىندا ۆيرۋستىق ينفەكتسيانىڭ ولان ءارى تارالۋىنا جول بەرمەۋگە باعىتتالعان شەكتەۋ شارالارى كۇشىنە ەنەدى. بۇل تۋرالى ءىىم ءباسپاسوز قىزمەت حابارلادى.
ازىق-ت ۇلىك, تاۋارلار, ءدارى-دارمەكتەر جانە ءبىرىنشى كەزەكتە قاجەتتى زاتتاردى جەتكىزەتىن اۆتوكولىككە, سونداي-اق جۇك جانە ترانزيتتىك تاسىمالداردى جۇزەگە اسىراتىن كولىكتەرگە شەكتەۋ بولمايدى.
كارانتين باستالعانان بەرى بەكەتتەردەگى جاعداي قالىپتى. ازاماتتار قابىلدانعان شەكتەۋ شارالارىنا تۇسىنىستىكپەن قاراۋدا.
سونىمەن بىرگە قاساقانا جالعان اقپارات, ونىڭ ىشىندە ارانداتۋشىلىق سيپاتتاعى اقپارات تاراتۋ فاكتىلەرى كەزدەسۋدە. مىسالى, الەۋمەتتىك جەلىلەردىڭ بىرىندە پايدالانۋشى تاكسي جۇرگىزۋشىسىمەن اڭگىمەلەسۋ بەينەجازباسىن ورنالاستىرعان, وندا تاكسي جۇرگىزۋشىسى بەلگىلى ءبىر اقى ءۇشىن قۇجاتتاردى تەكسەرتپەستەن, بلوك-بەكەتتەرى ارقىلى كەدەرگىسىز وتكىزۋگە ۋادە بەرەدى.
مۇنداي فاكتىلەردىڭ جولى قاتاڭ كەسىلەدى. بۇل ءۇشىن قۇقىق قورعاۋ كۇشتەرى قاجەتتى پارمەندى شارالار قابىلداۋدا. نۇر-سۇلتان جانە الماتى قالالارىندا بلوك-بەكەتتەردە پاترۋلدىك پوليتسەيلەرمەن جانە اسكەري قىزمەتشىلەرمەن قاتار وزىندىك قاۋىپسىزدىك قىزمەتكەرلەرى دە جۇمىس ىستەيدى. ولار زاڭدىلىقتىڭ ساقتالۋىن جانە سىبايلاس جەمقورلىققا جول بەرمەۋ ءۇشىن باقىلاۋدى قامتاماسىز ەتەدى.
ارانداتۋشىلىق بەينەجازباسىن تاراتۋ فاكتىسى بويىنشا ءتيىستى تەكسەرۋ جۇرگىزىلۋدە. وسىعان بايلانىستى ءىىم جالعان اقپارات تاراتقانى ءۇشىن جاۋاپكەرشىلىك بارى تۋرالى ەسكەرتەدى جانە ازاماتتاردان جالعان سوزگە سەنبەۋدى, ال نۇر-سۇلتان جانە الماتى قالالارىنان شىعۋ جانە كىرۋگە بايلانىستى بارلىق قۇقىق بۇزۋشىلىقتار تۋرالى پوليتسياعا حابارلاۋدى سۇرايدى (تەلەفوندارى: نۇر-سۇلتان قالاسىندا – 71-60-20, الماتى قالاسىندا – 254-40-07, ءىىم وزىندىك قاۋىپسىزدىك دەپارتامەنتىنىڭ سەنىم تەلەفونى – 1402). كارانتيندىك ءىس-شارالارعا قاتىستى وزگە سۇراقتار بويىنشا اكىمدىكتەرگە حابارلاساۋ قاجەت (نۇر-سۇلتان قالاسى: 109, الماتى قالاسى: 1309).