الەمدى ابىگەرگە سالعان قىتاي ىندەتى اتاقتىلارعا دا جەتتى. ولاردىڭ ىشىندە ايگىلى اكتەردان باستاپ, ساياساتكەر, سپورتشى, شەنەۋنىك, گەنەرال دا بار.
كوروناۆيرۋس جۇقپاسى قىتايدان ءارى اسىپ, ەۋروپاعا جەتكەندە العاشقى بولىپ جۇقتىرعان اتاقتىنىڭ ءبىرى – ايگىلى امەريكالىق اكتەر, «فوررەست گامپ» «جاسىل ميل», «شوۋشەنكتەن قاشۋ» سىندى نەبىر بىرەگەي فيلمدەردىڭ باستى رولدەرىن سومداعان توم حەنكس. ول اۆسترالياعا بەلگىلى كينورەجيسسەر باز لۋرماننىڭ ەلۆيس پرەسلي تۋرالى ءفيلمىنىڭ تۇسىرىلىمىنە بارعان ەكەن. توم حەنكسپەن ەرە كەلگەن ايەلى دە ۆيرۋستى جۇقتىرعانى بەلگىلى بولدى. قازىر ەكەۋى دە اۆستراليانىڭ اۋرۋحاناسىندا ەم قابىلداپ جاتىر.
وسىدان ءبىر اپتاداي بۇرىن الەمدىك اقپارات قۇرالدارى «چەلسيدىڭ» شابۋىلشىسى كاللۋم حادسون-ودوي دا كوروناۆيرۋس جۇقتىرعانىن جارىسا جازىپ جاتتى. اعىلشىن فۋتبول كلۋبىنىڭ مۇشەسى وزىنەن سۋىق تيۋ بەلگىلەرىن بايقاعان. ۆيرۋستى انىقتايتىن جەدەل تەست تاپسىرعان كەزدە ونىڭ اعزاسىندا ۆيرۋستىڭ بار ەكەنى انىقتالعان. قازىر ويىنشى ءوزىن جاقسى سەزىنەدى جانە جاقىن ارادا جاتتىعۋ الاڭىنا قايتا ورالاتىنىنا سەنىمدى.
ىندەت قۇرىعىنا العاش ىلىككەن فۋتبولشى –دانيەلە رۋگاني. ەم الىپ جاتقان «يۋۆەنتۋستىڭ» قورعاۋشىسى پورتۋگالياداعى ۇيىندە كارانتينگە وقشاۋلانعان. قازىرگى تاڭدا ونىڭ بويىندا ەشقانداي ۆيرۋس بەلگىلەرى جوق. كوڭىل-كۇيى دە, جاعدايى دا قالىپتى. «مەنىڭ دەنساۋلىعىم ءۇشىن الاڭداعان بارشاڭىزعا العىس ايتامىن. اسىرەسە, بەلگىسىز اۋرۋمەن كۇندىز-ءتۇنى كۇرەسىپ, ادامداردى امان الىپ قالۋ ءۇشىن بارىن سالىپ جاتقان دارىگەرلەر مەن مەدبيكەلەرگە ريزاشىلىعىم شەكسىز», دەپ جازدى فۋتبولشى ينستاگرامم پاراقشاسىندا.
كوروناۆيرۋس بيلىك باسىندا جۇرگەن شەندىلەردى دە اينالىپ وتپەدى. اۋرۋدىڭ تارالۋى جاعىنان العاشقى بەستىكتە تۇرعان يراندا قاراپايىم ادامدار عانا ەمەس, دەپۋتاتتار, ۇكىمەت مۇشەلەرى دە ۆيرۋس جۇقتىرعان. كەيىن باسقا ەلدەردىڭ شەنەۋنىكتەرىنەن دە ۆيرۋس تابىلا باستادى. مىسالى, امەريكانىڭ ەكى بىردەي كونگرەسمەنى, اۆستراليانىڭ ىشكى ىستەر ءمينيسترى, فرانتسيانىڭ مادەنيەت ءمينيسترى, پولشانىڭ گەنەرالى,كانادا پرەمەر-ءمينيسترىنىڭ ايەلى سوفي گرەگۋار تريۋدا...
قۋانىشتىسى, جوعارىدا اتى اتالعانداردىڭ ءبارى وزدەرىن جاقسى سەزىنەدى, سىرقاتى جەڭىل. ال ولارمەن جاقىن بايلانىستا بولعاندار وقشاۋلانىپ, كارانتين تارتىبىندە جاتىر.
ءيا, اۋرۋ ۇلتقا بولىنبەيدى, اتاق پەن شەنىڭە قارامايدى. قازىرگى ىندەت ادامزاتقا بەلگىسىزدىگىمەن قاۋىپتى بولىپ تۇر. دۇنيەجۇزى دەنساۋلىق ساقتاۋ ۇيىمىنىڭ ونى پاندەميا دەپ جاريالاۋى دا بەكەر ەمەس. سوندىقتان اركىم وزىنە جاۋاپكەرشىلىكپەن قاراپ, ساقتانىپ جۇرگەنى ابزال.
قىمبات توقتامۇرات