دۇنيەجۇزىنە جاپپاي تارالىپ جاتقان كوروناۆيرۋسقا قارسى ۆاكتسينا ويلاستىرىپ, ىندەتتى جىلدام انىقتايتىن ەكسپرەسس-تەستەر شىعارىپ جاتقانىن قازىر كوپتەگەن ەلدەر جارىسا ايتۋدا. كۇنى كەشە يزرايل عالىمدارى ادام بويىنداعى ۆيرۋس جۇقپاسىن جارتى مينۋتتا انىقتايتىن باعدارلاما ويلاپ تاپقانىن قۋانا جاريالادى.
جاساندى ينتەللەكتۋالدىق جوبالارمەن اينالىساتىن RADLogics كومپانياسى وزدەرى ويلاپ تاپقان باعدارلاما COVID-19 ۆيرۋسىن كومپيۋتەرلىك توموگرافيا ساراپتامالارى نەگىزىندە انىقتايتىنىن ايتادى. «اناليز ناتيجەسىنىڭ دالدىگى وتە جوعارى دەپ سەنىممەن ايتا الامىز. اۆتوماتتاندىرىلعان جۇيە اۋرۋدى باستاپقى ساتىسىندا انىقتاپ قانا قويماي, ونىڭ ءارى قاراي قالاي ءورشيتىنىن, ەمدەلۋشى ءۇشىن قانشالىقتى اۋىر بولاتىنىن دا بولجاي الادى» دەيدى ماماندار. جاڭا جوبانى سۇزگىدەن وتكىزۋ ءۇشىن قىتاي مەن امەريكاداعى 157 پاتسيەنتتىڭ سىرقات تاريحى باعدارلاماعا ەنگىزىلىپ, جۇيە ءبارىنىڭ دياگنوزىن 98,2 پايىز دالدىكپەن دۇرىس انىقتاعان.
جاڭا ينتەللەكتۋالدىق كومپيۋتەرلىك جۇيەنى ءارى قاراي دامىتۋ جۇمىستارى جالعاسا بەرەدى. بىراق قازىردىڭ وزىندە ونى كوروناۆيرۋستى العاشقى كەزەڭدە انىقتاۋ ءۇشىن پايدالانۋعا بولاتىن كورىنەدى.
قىمبات نۇرعالي