پنومپەن قالاسىندا قازاقستاننىڭ ۆەتنامداعى, سونداي-اق كامبودجا كورولدىگىندەگى ەلشىسى قىزمەتىن قوسا اتقارۋشى ەرلان بايجانوۆ ۇلى مارتەبەلى كامبودجا كورولى نورودوم سيامونيگە سەنىم گراموتالارىن تاپسىردى. بۇل تۋرالى ءسىم ءباسپاسوز قىزمەتى حابارلادى.
كورول سارايىندا وتكەن سەنىم گراموتالاردى تاپسىرۋ ءراسىمى بارىسىندا تاراپتار ءوز مەملەكەتتەرىنىڭ ەكىجاقتى ىنتىماقتاستىقتى جان-جاقتى دامىتۋ جانە تەرەڭدەتۋ نيەتىن راستادى.
قازاقستان وڭتۇستىك-شىعىس ازيا ەلدەرىمەن دوستىق قارىم-قاتىناستاردى, اسەان ايماعىنىڭ جاڭا ءوسىپ كەلە جاتقان نارىقتارىمەن ساۋدا-ەكونوميكالىق بايلانىستاردى دامىتۋعا ۇلكەن ءمان بەرەدى. بۇل تۋرالى قازاقستان پرەزيدەنتى قاسىم-جومارت توقاەۆ بىرنەشە رەت اتاپ وتكەن بولاتىن. قازاقستان سوڭعى جىلدارى ۇزدىك ەكونوميكالىق دامۋ ديناميكاسىن كورسەتەتىپ وتىرعان كامبودجامەن قارىم-قاتىناستى جانداندىرۋعا بەرىك نيەتتى, - دەپ مالىمدەدى قازاقستان ەلشىسى اۋديەنتسيا بارىسىندا.
كامبودجا كورولى نورودوم سياموني قازاقستاننىڭ الەۋمەتتىك-ەكونوميكالىق دامۋىنداعى جەتىستىكتەرىن جوعارى باعالاي وتىرىپ, قازاقستان-كامبودجا قارىم-قاتىناسى ۇدەمەلى تۇردە داميتىندىعىنا سەنىم ءبىلدىردى. كامبودجا مونارحى قازاقستان پرەزيدەنتى قاسىم-جومارت توقاەۆقا قوشەمەت سالەمىن جەتكىزۋ تۋرالى ءوتىنىش ءبىلدىرىپ, قازاقستان حالقىنا باق-بەرەكە مەن وركەندەۋ تىلەدى.
ول سونداي-اق قازاقستاندىق ديپلوماتقا قازاقستان-كامبودجا قارىم-قاتىناستارىن نىعايتۋ باعىتىندا تابىستى جانە جەمىستى ەڭبەك تىلەدى.
سول كۇنى ەرلان بايجانوۆ كامبودجانىڭ سىرتقى ىستەر جانە حالىقارالىق ىنتىماقتاستىق ءمينيسترىنىڭ ورىنباسارى يەت سوپحيامەن كەزدەستى.
تاراپتار ەكىجاقتى قارىم-قاتىناستاردىڭ اعىمداعى جاي-كۇيى مەن دامۋ پەرسپەكتيۆالارىن, شارتتىق-قۇقىقتىق بازانى نىعايتۋ قاجەتتىگىن تالقىلاپ, ساۋدا-ەكونوميكالىق جانە مادەني-گۋمانيتارلىق بايلانىستاردى كەڭەيتۋ ءۇشىن الەۋەتتىڭ بار ەكەنىن اتاپ كورسەتتى. حالىقارالىق ارەنادا, سونىڭ ىشىندە, اوسشك جانە «ازيا-ەۋروپا» فورۋمى شەڭبەرىندە ەكى ەلدىڭ ءوزارا ءىس-قيمىلى ماسەلەلەرىنە ەرەكشە نازار اۋدارىلدى.