قاسات قار ءسال عانا ءجىبىپ, قىزىل سۋ ازداپ ءجۇرىپ ەدى, قالانى قاق جارىپ وتەتىن قىلشاقتى وزەنى ارناسىنان اسا باستادى. وبلىس ورتالىعىنداعى بايكەن ءاشىموۆ كوشەسىنىڭ بويىنداعى اۆتوكولىك قاتىنايتىن كوپىردى سۋ باسىپ قالدى.
وزەنگە يۆانوۆكا سۋ قويماسىنان سۋ جىبەرىلگەن ەكەن. قازىر اپاتتىڭ سالدارىن جويۋ جۇمىستارى جۇرگىزىلۋدە. وزەندەگى سۋ دەڭگەيى سوڭعى تاۋلىكتەردە كۇرت كوتەرىلگەن. بۋراباي, زەرەندى اۋداندارىنان اققان قار سۋى وزەن دەڭگەيىن شامامەن 1,5 مەترگە مولايتتى. وعان قوسا, ىرگەدەگى يۆانوۆكا سۋ قويماسىنان قالىپتى مولشەردەن تىس سۋ جىبەرىلگەن.
وقيعا ورنىندا توتەنشە جاعدايلار قىزمەتىنىڭ 67 تەحنيكاسى مەن 90-عا جۋىق قۇتقارۋشىسى جۇمىس ىستەۋدە. قىلشاقتى وزەنىنە تاياۋ ماڭدا 2 مەكتەپ پەن كوپقاباتتى بىرنەشە تۇرعىن ءۇي بار. مامانداردىڭ ايتۋىنشا, قازىر ولاردى سۋ باسۋ قاۋپى ءتونىپ تۇرعان جوق.
–قازىرگى كەزدە قىلشاقتى وزەنىنىڭ جيەگىندە ينەرتتى ماتەريال, توپىراقتارمەن كوتەرىپ جاتىرمىز. وزەن قوپا كولىنە قۇيادى. وزەن ارناسى جاقىن تاعى ءبىر ءبىلىم وشاعى بار. مىڭعا جۋىق ادام تۇراتىن 5-6 كوپقاباتتى ءۇي بار. وتكەن جىلدارى دا كوكتەمدە وسى ماڭدى سۋ باسىپ قالعان بولاتىن,–دەيدى وبلىستىق جەدەل-قۇتقارۋ جاساعىنىڭ باستىعى داۋلەت شاميعانوۆ.
قازىر زاستانتسيوننىي شاعىن اۋدانىنا وتەتىن كوپىر جابىلعان. كوپىردىڭ وتپەلى ارىقتارى قار مەن مۇزدان تازالانۋدا. ۇيلەر مەن مەكتەپتىڭ ماڭايى قۇم تولتىرىلعان 5 مىڭنان استام قاپپەن قورشالعان. وزەن ارناسىنداعى مۇز بەن قامىس قالدىقتارى اعىسقا كەدەرگى كەلتىرۋدە.
قىلشاقتى وزەنىنىڭ بويىندا ورنالاسقان تۇرعىن ۇيلەر مەن №12 جانە 8 مەكتەپ اۋماعى ەرەكشە باقىلاۋعا الىنعان.