بۇگىن الماتىدا COVID-2019 جۇقتىرعان 18-ءشى زەرتحانالىق - راستالعان وقيعا تىركەلگەن. قوعامدىق دەنساۋلىق باسقارماسى كوروناۆيرۋس ينفەكتسياسىنىڭ 18-ءشى وقيعاسى تۋرالى حابارلادى. ول - 37 جاستاعى ايەل, فرانكفۋرت - نۇر-سۇلتان - الماتى باعىتى بويىنشا 16 ناۋرىزدا ۇشىپ كەلگەن.
دەرت جۇقتىرعان ايەل 14 كۇندىك ءۇي كارانتينىنە الىندى. ايەل 18 ناۋرىزدا دەنە تەمپەراتۋراسىنىڭ 37 گرادۋسقا دەيىن كوتەرىلۋى جانە تاماعىنىڭ اۋرۋى سالدارىنان ءوزىن جايسىز سەزىنىپ, جەدەل جاردەم شاقىرعان جانە قالالىق كلينيكالىق ينفەكتسيالىق اۋرۋحاناعا جەتكىزىلگەن. قازىر ونىڭ جاعدايى قاناعاتتانارلىق دەپ باعالانۋدا.
الماتى قالاسى اۋماعىندا ايەلمەن بايلانىستا بولعان ادامدار وقشاۋلاندى. قازىرگى كەزدە الماتىنىڭ ينفەكتسيالىق اۋرۋحاناسىندا 15 پاتسيەنت بار, ال بالالاردىڭ ينفەكتسيالىق اۋرۋحاناسىندا 2 بالا مەن سونداعى ءبىر بالانىڭ اناسى ەم الۋدا. ولاردىڭ بارلىعى بەكىتىلگەن حاتتاماعا سايكەس ەمدەلۋدە, ۆيرۋسقا قارسى جانە سيمپتوماتيالىق تەراپيا ۋاقتىلى جۇرگىزىلۋدە.بارلىق پاتسيەنتتەردىڭ جاعدايلارى قاناعاتتانارلىق ەكەنى حابارلاندى.
كوروناۆيرۋس ينفەكتسياسىنىڭ تارالۋىنا جول بەرمەۋ ءۇشىن مىنا نۇسقاۋلاردى مۇلتىكسىز ورىنداۋ قاجەت:
- قولدى ءجيى جۋىپ, انتيسەپتيكتەردى قولدانعان ءجون. قولدى سابىنمەن ءاربىر جارتى ساعات بويىنا 20 سەكۋند بويى جۋ كەرەك. ەگەر جاقىن ماڭدا قول جۋاتىن ورىن, سابىن بولماسا, وندا ميكروبتاردى كادىمگى انتيسەپتيكپەن جويۋعا بولادى;
- بولمەنى ءجيى جەلدەتۋ قاجەت;
- قوعامدىق ورىنداردان اۋلاق بولعان ءجون;
- قول الىسۋعا جانە باسقا دا جاقىن بايلانىس جاساۋعا بولمايدى;
- يممۋنيتەتتى كۇشەيتۋ قاجەت;
- سۇيىق تيۋ جانە تۇماۋ اۋرۋلارىنىڭ بەلگىلەرى (سيمپتومدارى)بايقالسا, ءوزىن جايسىز سەزىنسە, قۇرعاق جوتەل بولسا, وندا بىردەن ەمحانادان دارىگەردى نەمەسە جەدەل جاردەمدى شاقىرۋ قاجەت ءارى ماسكا كيگەن ءجون.
انىقتاما ءۇشىن 1406 ءنومىرى بويىنشا Call- ورتالىق تاۋلىك بويىنا جۇمىس ىستەيدى.
رەسمي اقپاراتتى الەۋمەتتىك جەلىدەگى الماتى قالاسى اكىمدىگىنىڭ سايتى مەن رەسمي پاراقشالاردان الۋعا بولادى. قوسىمشا اقپارات Telegram-كانالداعى Stopcov Almaty جەدەل جاريالانادى.