الماتى قالاسى اكىمدىگىنىڭ ءباسپاسوز ورتالىعىندا ءبىلىم باسقارماسى باسشىسىنىڭ ورىنباسارى گۇلنار ايتقۇلوۆا مەملەكەت باسشىسىنىڭ «قازاقستان رەسپۋبليكاسىندا توتەنشە جاعداي ەنگىزۋ تۋرالى» جارلىعىنىڭ ورىندالۋىنا وراي ءبىلىم بەرۋ سالاسىندا ىسكە اساتىن شارالار جايلى ايتتى.
بىرىنشىدەن, بالاباقشالاردىڭ جۇمىسىنا بايلانىستى. بۇگىنگە دەيىن بالاباقشالاردىڭ جۇمىسى توقتاعان جوق بولاتىن. الايدا, الماتى قالاسى مەن نۇرسۇلتان قالالارىندا كارانتين جاريالانعانىنا بايلانىستى ەرتەڭنەن باستاپ بالاباقشالار جۇمىسىن توقتاتادى.
ەكىنشىدەن, ورتا بىلىمگە بايلانىستى. 16 ناۋرىزدان باستاپ 5 ساۋىرگە دەيىن مەكتەپ وقۋشىلارى كوكتەمگى دەمالىسقا شىقتى. ول دەمالىس 5 ساۋىرگە دەيىن جالعاسادى.
قازىرگى كەزدە مەكتەپتە وقۋشىلار جوق جانە دە ۇستازدار ۇيلەرىندە بالالارمەن قاشىقتان قارىم-قاتىناستا جۇمىس ىستەيدى. دەمالىس كەزىندە بالالار ۇيگە ارنايى تاپسىرمالار الادى. سول تاپسىرمالارعا بايلانىستى مۇعالىمدەرمەن, سىنىپ جەتەكشىلەرمەن بايلانىستا بولادى.
- ەگەر كارانتين جالعاسىن تاباتىن بولسا, 5 ساۋىردە كانيكۋل اياقتالعان ساتتە وقۋشىلار قاشىقتان وقىتۋعا اۋىسادى. وسىعان بايلانىستى قازىرگى تاڭدا الماتى قالاسى ءبىلىم باسقارماسى مينيسترلىكپەن بىرىگىپ, دايىندىق جۇمىستارىن جاساپ جاتىر, – دەدى ءبىلىم باسقارماسى باسشىسىنىڭ ورىنباسارى.
ۇشىنشىدەن, كوللەدج ستۋدەنتتەرى 16 ناۋرىزدان باستاپ قاشىقتان وقۋعا كوشتى. ولارعا ارنايى باعدارلاما مەن ارنايى تەستپەن ەلەكتروندىق فورماتتا وقۋ ۇيىمداستىرىلدى.
- كوللەدجدىڭ جاتاقحانادا جاتقان ستۋدەنتتەرىنىڭ ۇيلەرىنە قايتۋىنا مۇمكىنشىلىگى بولماعان جاعدايدا, ولار جاتاقحانادا قالىپ, وقۋىن قاشىقتان جالعاستىرا بەرەدى, – دەپ ءتۇسىندىردى گ.ايتقۇلوۆا.