الماتىداعى بۇگىنگى ەپيدەميولوگيالىق جاعداي قانداي؟

بۇگىندە قالادا كوروناۆيرۋستى جۇقتىرعان 17 جاعداي راستالىپ, تىركەلدى. سوڭعى ەكى مالىمەت بويىنشا ولار ىندەتتى جۇقتىرعاندار – 1974 جىلعى جانە 1998 جىلعى ايەلدەر. ماسكەۋ رەيسىمەن ۇشىپ كەلگەن العاشقى ناۋقاس جۇقپالى اۋرۋحانادا ەم الۋدا. 1998 جىلعى ناۋقاس 15 ناۋرىز كۇنى ستامبۋل-الماتى رەيسىمەن ۇشىپ كەلدى.

قازىرگى ۋاقىتتا ناۋقاستارمەن بايلانىستا بولعان ازاماتتارعا ىزدەۋ جۇمىستارى جۇرگىزىلۋدە. بۇگىندە قالالىق جۇقپالى اۋرۋلار اۋرۋحاناسىندا 14 ناۋقاس, بالالار جۇقپالى اۋرۋلارىندا 2 بالا جانە ءبىر بالانىڭ اناسى بار. ولارمەن بايلانىستا بولعان بارلىق ادامدار 14 كۇندىك كارانتينگە جابىلدى.

الماتى قوعامدىق دەنساۋلىق باسقارماسىنىڭ باسشىسى تىلەۋحان ابىلداەۆ قالانىڭ ستاتسيونارىندا قاجەتتى ءدارى-دارمەكتەر مەن دەزينفەكتسيالاۋ قۇرالدارى بار ەكەنىن اتاپ ءوتتى.

«كوروناۆيرۋستىق ينفەكتسيا بويىنشا ەمدەلىپ جاتقان ەكى بالانىڭ جاعدايى قاناعاتتانارلىق, دەنە قىزۋى جوق, اۋرۋ سيمپتومسىز وتۋدە. ەكى جاستاعى قىزدىڭ اناسىندا كوروناۆيرۋس راستالدى. جاساندى جەلدەتۋ اپپاراتىندا بىردە-ءبىر ناۋقاس جوق», – دەدى ت. ابىلداەۆ.

ول سونداي-اق, ىستامبۋلدان ۇشىپ كەلگەن قىز تۇندە جەدەل جاردەم شاقىرعان. بىراق اۋرۋدىڭ ايقىن بەلگىلەرى بولمادى. بىراق دارىگەرلەر اناليز الىپ, تاڭەرتەڭ ونىڭ دياگنوزىن راستادى. تۇركيا بۇرىن ءۇي كارانتينىنە جاتاتىن ەلدەر توبىنا كىرمەگەن ەدى.

كوروناۆيرۋسقا قارسى كۇرەسكە ۇكىمەت رەزەرۆىنەن 73,5 ملن. تەڭگە, جەرگىلىكتى بيۋدجەتتەن 94,5 ملن. تەڭگە ءبولىندى.

الماتى قالاسى بويىنشا باسقا وڭىرلەردەن كەلگەن ەمدەلۋشىلەردى جاتقىزۋ شەكتەۋلەرى بار. بىراق جالپى مەديتسينالىق ۇيىمدار بۇرىنعى كەستە بويىنشا جۇمىس ىستەيتىن بولادى.

كوروناۆيرۋستىق ينفەكتسيانىڭ تارالۋىمەن كۇرەسۋگە 1300-دەن استام مەديتسينا قىزمەتكەرى تارتىلدى. جۇقتىرعاندارمەن جۇمىس ىستەۋ كەزىندە ولار قاۋىپسىزدىك رەجيمىن ساقتايدى. قورعانىس كوستيۋمدەرىن كيەدى, كىرە بەرىستە تەمپەراتۋرا ولشەنەدى. قاۋىپتى جاعدايلارداعى جۇمىس ءۇشىن ولارعا قوسىمشا تولەم قاراستىرىلعان.

الماتى