ەڭبەك جانە حالىقتى الەۋمەتتىك قورعاۋ مينيسترلىگى دەنساۋلىق ساقتاۋ مينيسترلىگىمەن بىرلەسىپ قامقورلىقتاعى ادامداردىڭ ەگدە ادامدار مەن مۇگەدەكتىگى بار ادامدارعا ارنالعان مەديتسينالىق-الەۋمەتتىك مەكەمەلەرگە, سونداي-اق ۋاقىتشا بولۋ ۇيىمدارىنا بارۋىنا تىيىم سالادى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
بۇل شارا ۇيىمداردا كوروناۆيرۋستىق ينفەكتسيانىڭ تارالۋىنا جول بەرمەۋ ماقساتىندا قابىلدانۋدا. بۇل رەتتە الەۋمەتتىك مەكەمەلەر قىزمەت كورسەتۋدى جالعاستىرادى. مەكەمەلەردە سانيتارلىق-دەزينفيكاتسيالىق رەجيم كۇشەيتىلەدى. اتاپ ايتقاندا, قىزمەتكەرلەر مەن قامقورلىقتاعى ادامداردى ماسكالارمەن, انتيسەپتيكالىق قۇرالدارمەن, قولعاپتارمەن جانە باسقا دا قورعانىس قۇرالدارىمەن قامتاماسىز ەتىلەدى. قامقورلىقتاعىلاردىڭ قاتىسۋىمەن ۇيىمدار ىشىندە دە, ولاردان تىس تا بۇقارالىق سپورتتىق جانە مادەني ءىس-شارالار وتكىزىلمەيتىن بولدى.
سونداي-اق رەسپۋبليكاداعى ەپيدەميولوگيالىق جاعداي تۇراقتانعانعا دەيىن ساناتوريالىق-كۋرورتتىق ەمدەۋ قىزمەتىن كورسەتۋدى توقتاتا تۇرۋ ۇسىنىلدى.
بۇل شارالار قازاقستاندا توتەنشە جاعداي اياقتالعانعا دەيىن جالعاسادى. بۇدان باسقا, جەكە كومەكشىلەر مەن ىمداۋ ءتىلى ماماندارى كورسەتكەن قىزمەتتەر بويىنشا قۇجاتتاردى (ورىندالعان جۇمىستار اكتىسى, سۇيەمەلدەۋ پاراقتارى) قابىلداۋ ەلەكتروندىق فورماتتا جۇزەگە اسىرىلادى.