جاقىندا بىرىككەن ۇلتتار ۇيىمىنىڭ 6 تىلىنە (اعىلشىن, اراب, فرانتسۋز, قىتاي, يسپان, ورىس) اۋدارىلعان زاماناۋي قازاق پروزاسىنىڭ انتولوگياسى جارىق كوردى. انتولوگيا 60 مىڭ دانامەن شىعىپ, الەمنىڭ 93 ەلىنىڭ كىتاپحانا, ۋنيۆەرسيتەت, زەرتتەۋ ورتالىقتارىنا جەتكىزىلدى. وسىلايشا دۇنيەجۇزى وقىرماندارى قازاق حالقىنىڭ تىنىس-تىرشىلىگىمەن, بولمىس-بىتىمىمەن تانىساتىن بولادى.
اتالعان انتولوگياعا تانىمال جازۋشى-جۋرناليست, حالىقارالىق «الاش» ادەبي سىيلىعىنىڭ لاۋرەاتى مارحابات بايعۇتتىڭ شىعارمالارى دا ەندى. قازاق پروزاسىندا الار ورنى ەرەكشە, ادەبيەتسۇيەر قاۋىمعا قىسقا دا تەرەڭ ماعىنالى اڭگىمەلەرىمەن تانىمال مارحابات بايعۇتتىڭ وزگەلەرگە ۇقسامايتىن مانەرى وقىرماندى وزىنە بىردەن باۋراپ الادى. «مەنىڭ ويىما ورىستىڭ كلاسسيك جازۋشىسى اندرەي پلاتونوۆتىڭ «ا بەز مەنيا نارود نە پولنىي» دەگەن ءسوزى ەسكە تۇسەدى. «مەنسىز حالىق تولىق ەمەس» دەگەنى عوي. وسى سەكىلدى مارحابات بولماسا قازاق پروزاسى تولىق ەمەس», دەيدى تانىمال اقىن نارماحان بەگالى قالامداسىنىڭ ادەبيەتتەگى ورنى تۋرالى.
زاماناۋي قازاق پروزاسىنىڭ انتولوگياسىنا مارحابات بايعۇت تۋىندىلارىنىڭ ەنگىزىلۋى – اتالعان جيناقتىڭ قۇندىلىعىن ارتتىرىپ وتىر. جازۋشىنىڭ شىعارمالارىندا قازاق ۇلتىنىڭ دارحان پەيىلى, اق-ەدىل كوڭىلى, قۋلىق-سۇمدىق, ارامدىعى جوق بولمىسى, جانىنىڭ كىرشىكسىز تازالىعى كورىنىس تابادى. الەم حالقى قازاق ەلىنىڭ تىرشىلىگىنە مارحابات بايعۇتتىڭ «كوزىمەن» قارايتىنى ءبىزدى قۋانتىپ وتىر. قازاق ەلىنىڭ ءيميدجىن ارتتىرۋدا, باي تاريحىن ناسيحاتتاۋدا, كەشەگىسى مەن بۇگىنىن تانىتۋدا, ۇلى دالا تۇرعىندارىنىڭ ەكزوتيكالىق مىنەزىن اشۋدا جازۋشى شىعارمالارىنىڭ الار ورنى ەرەكشە. جازۋشىنىڭ كەيىپكەرلەرى سان الۋان. قاراپايىم اۋىل تۇرعىندارىنان باستاپ اكىمدەرگە دەيىن اڭگىمەلەرىنەن تابىلادى. 2012 جىلى جازۋشى «اكىمنىڭ ايەلى» دەگەن اڭگىمە جازعان بولاتىن. وسى اڭگىمە بىلتىر تاشكەنتتە وزبەكشەگە اۋدارىلىپ «جاھون ادابيەتي» جۋرنالىندا باسىلدى. وزبەكستان پرەزيدەنتى شاۆحات ميرزيەەۆ «حوكيمنينگ حوتيني» اڭگىمەسىن وقىپ, اكىمدەرمەن وتكەن جيىندا «قازاق جازۋشىسىنىڭ مىنا اڭگىمەسىن ايەلدەرىڭىزبەن بىرگە وقىڭىزدار», دەپتى. اڭگىمەنى اۋدارعان مەحمونكۋل يسلومكۋلوۆ وزبەكستاندا «جىلدىڭ ۇزدىك اۋدارماشىسى» اتالىمىنا يە بولعان. وسىلايشا مارحابات بايعۇتتىڭ اڭگىمەسى وزبەك ءتارجىماشىسىنىڭ باعىن اشتى.
تۇركىستان وبلىسى