بيىل 5 اقپاندا ىشكى ىستەر ءمينيسترى, پوليتسيا گەنەرال-لەيتەنانتى ەرلان تۇرعىمباەۆتىڭ باستاماسىمەن ۇلى جەڭىستىڭ 75 جىلدىعىنا وراي ء«بىز – جەڭىستىڭ مۇراگەرىمىز» اتتى ەستافەتا باستالعان بولاتىن.
تاياۋدا كوكشەتاۋ قالاسىنداعى 5510 اسكەري بولىمدە جاقسى ءۇردىس جالعاسىن تاۋىپ, اسكەري ءبولىمنىڭ ساپتىق الاڭىندا تاعىلىمدى ءىس-شارا بولىپ ءوتتى. جيىنعا كۇشتىك قۇرىلىمنىڭ باسشىلارى جانە ءىى دۇنيەجۇزىلىك سوعىسىنىڭ ارداگەرلەرى, تىڭ ەڭبەككەرلەرى مەن ساربازدار قاتىستى.
ءىس-شارا بارىسىندا كەڭەس وداعىنىڭ باتىرى, گەنەرال-مايور ي.ۆ.پانفيلوۆ باسقارعان ديۆيزيانىڭ جاۋىنگەرلىك تۋىنىڭ كوشىرمەسىن قوستاناي قالاسىنداعى 6697 اسكەري ءبولىمى كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, پودپولكوۆنيك باۋىرجان شوراەۆ كوكشەتاۋ قالاسىنداعى 5510 اسكەري ءبولىمىنىڭ كومانديرى, پودپولكوۆنيك اسقار فايزۋلينگە سالتاناتتى جاعدايدا تابىس ەتتى.
ءسويتىپ, قوستانايدان كوكشەتاۋعا جەتكەن بۇل ەستافەتانىڭ باستى ماقساتى - وتان ءۇشىن جانىن پيدا ەتكەن جاۋىنگەرلەردىڭ ەرلىگىنە قۇرمەت كورسەتۋ, ەسىمدەرىن ەل ەسىندە ساقتاۋ, جاستاردىڭ بويىندا وتانسۇيگىشتىك, ەلجاندىلىق, باتىرلىق سياقتى ابزال قاسيەتتەردى قالىپتاستىرۋ. جيىندا ءىى دۇنيەجۇزىلىك سوعىسىنىڭ ارداگەرى الىمگەرەي ماجەنوۆ ءسوز سويلەدى.
– سۇراپىل سوعىس جىلدارى ەلى ءۇشىن جانىن پيدا ەتكەن قانشا ەرجۇرەك جاۋىنگەر قان مايدان دالاسىنان ورالمادى. ولار كەلەشەك ۇرپاققا بەيبىت ءومىردى امانات ەتتى. بۇگىنگى ۇرپاق وسى ءومىردىڭ قادىرىن ءبىلۋى كەرەك. سوعىس ءورتى ءورشىپ تۇرعان جىلدارى ەڭكەيگەن قارتتان ەڭبەكتەگەن بالاعا دەيىن الا تاڭنان ەڭبەك دالاسىنان تابىلىپ, قارا جۇمىسقا جەگىلدى. ولاردىڭ دا وسى جەڭىسكە قوسقان ۇلەسى ولشەۋسىز. مۇنىڭ بارلىعى ۇرپاق ساناسىنان ەشقاشان وشپەۋى ءتيىس, – دەدى ارداگەر ءوز سوزىندە.
تاقىرىپتىق كەش سوڭى كونتسەرتتىك باعدارلاماعا ۇلاستى.
اقمولا وبلىسى