بۇگىنگى تاڭدا مەديتسينالىق ماسكاعا سۇرانىس كوپ. حالىقتى قاجەتتى دۇنيەمەن قامتاماسىز ەتۋ ءۇشىن «انالار ۇيىندەگى» نازىك جاندىلار داكەدەن ماسكا تىگۋگە كىرىستى.
ولار 3 كۇننىڭ ىشىندە 600 بەتپەردە تىگىپ ۇلگەردى. باعاسى دا قىمبات ەمەس, نەبارى 120 تەڭگە. دايىن ونىمدەر جەرگىلىكتى بالاباقشالار, مەكتەپتەر مەن جەكە كاسىپورىندارعا جونەلتىلۋدە.
ماسكا تىگىپ, ونى ساتىلىمعا شىعارۋ «انا ءۇيىنىڭ» ۇيلەستىرۋشىسى قۇرالاي جۇمابەكوۆانىڭ باستاماسى. قۇرالايدىڭ ءوزى دە كوپبالالى انا. اۋەل باستا ماسكانى بالالارىنا تىگىپ بەرسە كەرەك. قولىنان كەلىپ-اق تۇر, ەش كەمدىگى جوق. كەيىن سۇرانىستى كورىپ, «انا ۇيىندەگى» ايەلدەردى دە وسى يگىلىكتى ىسكە جۇمىلدىردى. انالاردىڭ بۇل ىسىنە وڭىردەگى «جيزنەننىي پۋت» ۆولونتيورلار ۇيىمى دا كومەكتەسۋدە.
–مەنىڭ 4 بالام مەكتەپتە وقيدى. وقۋشىلاردان قازىر ماسكا كيىپ ءجۇرۋدى تالاپ ەتۋدە. وزدەرىنە دە كەرەك قوي. تابانىمدى توزدىرىپ, ىزدەمىن جۇرەمىن بە دەدىم دە, داكەدەن ءوزىم تىگىپ الدىم. ارادا كوپ ۋاقىت وتپەي اتا-انالار تاراپىنان ۇسىنىس تۇسە باستادى. مەن بىردەن كەلىستىم. ەگەر داكەنى وزدەرى اكەلسە, ماسكا باعاسى 60 تەڭگە, ال ەگەر مەنەن بولسا 120 تەڭگە. قازىردە وسى تالاپ بويىنشا جۇمىس ىستەيمىز,–دەيدى كوپبالالى انا قۇرالاي جۇمابەكوۆا.
بۇل جەردە جۇمىس قىزۋ جۇرۋدە. تاپسىرىس بەرۋشىلەر كوپ. انالار ەكى تىگىن ماشيناسىمەن اۋىسىپ جۇمىس ىستەپ جاتىر. وسىلايشا, قازىرگى ۋاقىتتا قالىپتاسقان قيىندىقتان شىعۋعا جاعدايعا انالار دا ءوز ۇلەستەرىن قوسۋدا.