وبلىستاعى ەپيدەميولوگيالىق احۋال تۇراقتى. ايماقتىڭ باس سانيتارلىق دارىگەرى جاعداي باقىلاۋعا الىنعاندىعىن ايتۋدا.
– وڭىردە كوروناۆيرۋستىق ينفەكتسيا جۇقتىرعاندار تىركەلگەن جوق. وبلىس اۋماعىنا كەلگەن ازاماتتارعا مونيتورينگ جۇرگىزىلۋدە. مەديتسينالىق مەكەمەلەردىڭ دايىندىعى پىسىقتالىپ جاتىر. جەڭىل جانە اۋىر ءتۇرىن جۇقتىرعان ناۋقاستارعا اۋرۋحانالاردان ورىن جابدىقتالدى. كوروناۆيرۋس تىركەلگەن شەتەلدەردەن كەلگەن ازاماتتارعا ارنالعان كارانتين ورنى دا ازىرلەندى,–دەيدى وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ جەتەكشىسى ايناگۇل مۋسينا.
پرەزيدەنت تاپسىرماسىنا سايكەس 50-دەن ارتىق ادامدىڭ ءبىر جەردە شوعىرلانۋىنا تىيىم سالىنادى. وسىعان وراي, وبلىس اكىمى ەرمەك بورانباي ۇلى حالىققا قىزمەت كورسەتۋ ورتالىقتارى مەن بانك قىزمەتكەرلەرىنىڭ جۇمىسىن مۇمكىندىگىنشە تسيفرلاندىرۋدى تاپسىردى. وسى ارقىلى ادامداردىڭ كوپ جينالۋىنا جول بەرىلمەيدى. ويىن-ساۋىق ورتالىقتارى مەن ساۋدا ۇيلەرىنىڭ جۇمىستارى شەكتەلگەنىمەن, ازىق-ت ۇلىك دۇكەندەرى شتاتتىق رەجيمدە ساعات 10-نان كەشكى 6-عا دەيىن جۇمىس ىستەيدى. بۇگىنگى اقپارات بويىنشا بالاباقشاعا 38 پروتسەنت قانا ءبۇلدىرشىن كەلگەن.
– بۇگىننەن باستاپ بارلىق ستۋدەنتتەر ۇيلەرىنە قايتارىلدى. بارلىق ۇستازدار قاۋىمى قاشىقتىقتان ءبىلىم بەرۋ جۇيەسىنە اۋىستىرىلدى. مەكتەپ وقۋشىلارى 16 ناۋرىزدان 5 ساۋىرگە دەيىن كانيكۋلعا جىبەرىلدى. وقۋ جانە مەديتسينالىق مەكەمەلەر كارانتينگە جابىلدى,–دەيدى اقمولا وبلىسى اكىمىنىڭ ورىنباسارى اينا ءمىسىرالىموۆا.
جەدەل ارەكەت ەتۋ شتابىنىڭ وتىرىسىندا مەديتسينالىق ماسكالاردىڭ جەتىسپەۋشىلىگى تاعى دا كوتەرىلدى. «تىنىس» زاۋىتى ەرتەڭگە دەيىن 7 مىڭ ماسكانى دايىنداماق. ودان بولەك 4 كاسىپورىن مەديتسينالىق قىزمەتكەرلەردى ماسكالار جانە قورعانىس كيىمدەرىمەن جابدىقتايدى.
وتىرىستا كوكتەمگى سۋ تاسقىنىنىڭ الدىن-الۋ ماسەلەسى دە نازاردان تىس قالمادى. اۋدان اكىمدەرىنە اپاتتى جاعدايدىڭ ورىن الۋى مۇمكىن وڭىرلەردى ازىق-ت ۇلىكپەن قامتاماسىز ەتۋ مىندەتتەلدى.
اقمولا وبلىسى