ەلىمىزدە 7 قاڭتاردان باستاپ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي-كوممۋنالدىق شارۋاشىلىق ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قولدانىسقا ەندى. زاڭ شەڭبەرىندە قوسىمشا نورماتيۆتىك-قۇقىقتىق اكتىلەر قابىلدانادى. ونىڭ ىشىندە تۇرعىن ۇيگە قاتىستى 3 قاۋلى جانە 17 بۇيرىق, جالپى سانى 20 قۇجات دايىندىقتا. قۇجاتتار ناۋرىز ايىنىڭ سوڭىنا دەيىن بەكىتىلەدى.
پاتەر يەلەرى كووپەراتيۆتەرىنىڭ (پيك) ورنىنا قۇرىلاتىن مەنشىك يەلەرىنىڭ بىرلەستىگىن (ميب) قۇرۋ بويىنشا نورماتيۆتىك-قۇقىقتىق قۇجاتتار ناۋرىز ايىنىڭ سوڭىنا دەيىن تولىق بەكىتىلەتىن بولادى. Primeminister.kz مالىمەتتەرىنە سۇيەنسەك, «تۇرعىن ءۇي-كوممۋنالدىق شارۋاشىلىعىن جاڭعىرتۋ مەن دامىتۋدىڭ قازاقستاندىق ورتالىعى» اق مەتودولوگيا جانە وڭىرلىك دامۋ دەپارتامەنتى باسشىسىنىڭ ورىنباسارى م. ابدىكارىموۆ: «مەنشىك يەلەرىنىڭ بىرلەستىگى – تۇرعىنداردىڭ ءوز ىشىنەن قۇرىلاتىن كوممەرتسيالىق ەمەس ۇيىم. تۇرعىندار جينالىسىندا ءۇش جىل مەرزىمگە كوپپاتەرلى تۇرعىن ءۇي كەڭەسى جانە رەۆيزيالىق كوميسسيا سايلانادى, ءبىر جىل مەرزىمگە بىرلەستىك توراعاسى بەلگىلەنەدى», - دەپ ءتۇسىندىردى.
ونىڭ ايتۋىنشا, زاڭ كۇشىنە ەنگەن كۇننەن باستاپ ءبىر جىل ىشىندە كوپپاتەرلى تۇرعىن ءۇي يەلەرى جينالىس وتكىزۋلەرى ءتيىس. جينالىسقا سول تۇرعىن ۇيدەگى مەنشىك يەلەرىنىڭ كەمىندە 51 پايىزىنىڭ قاتىسۋى مىندەتتى. ماسەلەن, ءبىر تۇرعىن ۇيدە 100 پاتەر بولسا, جينالىسقا كەمىندە 51 پاتەر يەسى قاتىسۋى كەرەك, ال ۇسىنىلعان شەشىمدى كەمى 26 مەنشىك يەسى (پاتەر يەسى) قولداۋى ءتيىس.
بىرلەستىك توراعاسى تۇرعىنداردىڭ اراسىنان سايلانا الادى. وعان جالاقى تولەنەدى. توراعا بىرلەستىكتى زاڭدى تۇلعا رەتىندە تىركەيدى, سەرۆيستىك ۇيىمدارمەن كەلىسىمشارتقا وتىرادى. جينالىستا ءۇي كەڭەسى مۇشەلەرىمەن كلينينگ, سانتەحنيكالىق جوندەۋ جۇرگىزەتىن سەرۆيستىك ۇيىمداردى تارتۋ, ت.ب. ماسەلەلەر رەتتەلەدى. سونىمەن قاتار بىرلەستىكتىڭ اتىنان ەسەپشوت اشىلادى. اي سايىن سەرۆيستىك ۇيىمدار جۇمىستارىن اتقارعان سوڭ, اكتى بويىنشا قاراجات بىرلەستىكتىڭ اتىنان سەرۆيستىك ۇيىمعا اۋدارىلادى.
مەنشىك يەلەرى بىرلەستىگىندە پاتەر يەلەرىنىڭ ءوز قاراجاتىن ءوزى باسقارا الۋ مۇمكىندىگى بار. ماسەلەن, قازىرگى ۋاقىتتا قاراماعىندا 10, ءتىپتى 100-گە جۋىق كوپپاتەرلى تۇرعىن ءۇيى بار پاتەر يەلەرى كووپەراتيۆتەرى جۇمىس ىستەيدى. بۇل جاعدايدا, ارينە, قاراجات ورتاق ەسەپشوتقا جينالادى. سايكەسىنشە, تۇرعىندار قاراجاتتىڭ قايدا جۇمسالىپ جاتقانىن بىلمەۋى دە مۇمكىن. ال مەنشىك يەلەرى بىرلەستىگى قۇرىلعان ۋاقىتتان باستاپ اي سايىنعى تولەمدەر پاتەر يەلەرى كووپەراتيۆتەرىنە ەمەس, سول بىرلەستىكتىڭ ەسەپشوتىنا اۋدارىلاتىن بولادى.
ەسكەرە كەتەتىن جايت, قازىر جۇمىس ىستەپ جاتقان پاتەر يەلەرى كووپەراتيۆتەرى تۇرعىنداردىڭ كوڭىلىنەن شىققان بولسا, ءوز جۇمىسىن جالعاستىرۋعا مۇمكىندىكتەرى بار. «جاڭا زاڭعا سايكەس, ولار پاتەر يەلەرى كووپەراتيۆى رەتىندە 2022 جىلدىڭ 1 شىلدەسىنە دەيىن عانا جۇمىس ىستەي الادى. ال ودان كەيىن قىزمەتىن جالعاستىرۋى ءۇشىن باسقارۋشى كومپانيا نەمەسە سەرۆيستىك ۇيىم رەتىندە قايتا قۇرىلۋى كەرەك» دەپ اتاپ ءوتتى م.ابدىكارىموۆ.