كوروناۆيرۋستىڭ انىقتالۋىنا بايلانىستى, سوڭعى كۇندەرى الماتىدا بىرقاتار ءباسپاسوز بريفينگى ءوتتى.
«قازاقستان رەسپۋبليكاسىندا كوروناۆيرۋستىق ينفەكتسياسى تارالۋىنىڭ الدىن الۋ شارالارىن كۇشەيتۋ تۋرالى» ۇكىمەت شەشىمىنە سايكەس ەل اۋماعىندا, ونىڭ ىشىندە الماتى قالاسىندا بۇرىن جوسپارلانعان ءىس-شارالاردى كوشىرۋ نەمەسە توقتاتۋ تۋرالى شەشىم قابىلداندى. قالالىق مادەنيەت باسقارماسى بىرقاتار شەكتەۋلەردى ەنگىزدى.
2020 جىلدىڭ 13 ناۋرىزىنان باستاپ قالا اۋماعىندا بارلىق بۇقارالىق مادەني ءىس-شارالار, كونفەرەنتسيا, سەمينارلار, كورمەلەردى وتكىزۋگە ۋاقىتشا تىيىم سالىندى. حالىقارالىق مادەني ءىس-شارالارعا بارۋ ماقساتىندا 1ا, 1ب, 2 جانە 3 ساناتتاعى ەلدەرگە شىعۋعا شەكتەۋ ەنگىزىلدى. شاھاردىڭ بارلىق ءتيىستى ۇيىمى مەن مادەنيەت مەكەمەلەرىنە ءوز ۇيىمدارىنىڭ اۋماعىندا قاجەتتى قۇرالدارمەن: سانيتايزەرلەر, انتيسەپتيكتەر جانە كوروناۆيرۋستىق ينفەكتسيانىڭ الدىن الۋ جونىندەگى جادىنامالارمەن قامتاماسىز ەتۋدە سانيتارلىق-پروفيلاكتيكالىق ءىس-شارالاردى كۇشەيتۋ جونىندە ۇسىنىستار ءبىلدىردى.
قالادا 2020 جىلدىڭ ءبىرىنشى جارتىجىلدىعىنا 40-تان استام ءىس-شارا جوسپارلانعان. ونىڭ ىشىندە, بۇگىنگى تاڭدا 14-ءى توقتاتىلسا, قالعان 26 شارا اعىمداعى جىلدىڭ ەكىنشى جارتىجىلدىعىنا اۋىستىرىلدى. مادەني-بۇقارالىق ءىس-شارالاردىڭ كۇنتىزبەلىك جوسپارىنا سايكەس مونيتورينگتىڭ قورىتىندىسى بويىنشا ناۋرىز-ءساۋىر ايلارىندا مادەني ويىن-ساۋىق ۇيىمدارى بويىنشا 211, ال تەاترلاردا 383 ءىس-شاراعا شەكتەۋ قويىلدى. قالا بويىنشا بارلىعى 608 ءىس-شارا توقتاتىلدى.
سونداي-اق بۇگىندە قالادا بارلىق كينوتەاترلار, حايۋاناتتار باعى, مۇراجايلار, كىتاپحانالار جۇمىسىن توقتاتتى.
ء بىلىم بەرۋ مەكەمەلەرىنىڭ جۇمىس ىستەۋ فورماتى ءتۇسىندىرىلدى
ەپيدەميولوگيالىق جاعداي تۇراقتانعانعا دەيىن قوسىمشا ءبىلىم بەرۋ نىساندارىندا (وقۋشىلار ءۇيى, مۋزىكالىق مەكتەپتەر) ءبىلىم بەرۋ پروتسەسىن جۇرگىزۋگە تىيىم سالىندى. سونىمەن قاتار بالالاردىڭ ورنى ساقتالادى, اتا-انالاردان وقۋ اقىسى الىنبايدى. جالپى, الماتىدا 266 مەكتەپ, 80 كوللەدج بار. 16 ناۋرىزدان باستاپ مەكتەپتەردە دەمالىس جاريالاندى. وقۋشىلارعا دەمالىس كەزىندە ەكسكۋرسياعا بارۋعا تىيىم سالىندى. كوللەدج ستۋدەنتتەرى 16 ناۋرىزدان باستاپ قاشىقتان ءبىلىم الۋعا كوشەدى.
سپورتتىق ۇيىمدار وقىتۋ-جاتتىعۋ پروتسەستەرىن توقتاتتى
الماتىدا بارلىعى 14 كوممۋنالدىق سپورت نىسانى بار. ونىڭ ىشىندە 9-ى بالالار مەن جاسوسپىرىمدەرگە ارنالعان سپورت مەكتەبى. سپورتپەن شۇعىلداناتىندار 12 مىڭنان استام ادامدى قۇرايدى. 13 ناۋرىزدان باستاپ بارلىق مەملەكەتتىك سپورت مەكتەپتەرىندە وقۋ-جاتتىعۋ پروتسەسى توقتاتىلدى.
جەرگىلىكتى جانە رەسپۋبليكالىق بيۋدجەت قاراجاتىنان قارجىلاندىرىلاتىن سپورت كاسىپورىندارىنداعى وقۋ-جاتتىعۋلارى, فيزيكالىق-ساۋىقتىرۋ قىزمەتتەرىن ۇسىنۋ جانە سپورت سالاسىنداعى الەۋمەتتىك جوبالاردى ىسكە اسىرۋعا دا شەكتەۋ قويىلدى.
جەكە سپورت ۇيىمدارىنا سپورت سالاسىندا كورسەتىلەتىن قىزمەتتەردى ۋاقىتشا توقتاتۋ جونىندە ۇسىنىمدار بەرىلدى. اتاپ وتەتىن جايت, بىرقاتار ۇيىمدار, سونىڭ ىشىندە, قالا تۇرعىندارى دا بۇل ۇسىنىستارعا تۇسىنىستىك ءبىلدىردى.
سونىمەن قاتار بارلىق سپورت تۇرلەرى بويىنشا قالالىق قۇراما كوماندالارىنىڭ مۇشەلەرى قازاقستان رەسپۋبليكاسىنان تىس جەرلەرگە شىعۋىنا شەكتەۋ قويىلدى. سونداي-اق مەگاپوليس اۋماعىندا حالىقارالىق سپورتتىق شارالار دا توقتاتىلدى.
الماتىداعى 4 ناۋقاستىڭ بىرەۋى ورتاشا اۋىر جاعدايدا
بۇل تۋرالى الماتى قالاسى قوعامدىق دەنساۋلىق ساقتاۋ باسقارماسىنىڭ جەتەكشىسى تىلەۋحان ابىلداەۆ بريفينگ بارىسىندا ايتتى.
«ناۋقاستاردىڭ بارلىعى قازاقستان ازاماتتارى. ءبىرىنشى ناۋقاس 10 ناۋرىز كۇنى قازاقستانعا كەلىپ, ءۇي كارانتينىندە بولعان. كوروناۆيرۋس انىقتالعان تاعى ءبىر ازامات 13 ناۋرىزعا قاراعان ءتۇنى بەرلين-الماتى باعىتىندا چارتەرلىك رەيسپەن كەلگەن. بورتتاعى بارلىق جولاۋشىلار مەن ەكيپاج مۇشەلەرى بىردەن كارانتينگە جاتقىزىلىپ, ءتيىستى مەديتسينالىق زەرتتەۋلەر جاسالدى. ال ۆيرۋس جۇقتىردى دەگەن ءۇشىنشى ازامات چارتەرلىك رەيسپەن كەلگەن ناۋقاستىڭ جۇبايى. بۇگىن انىقتالعان ءتورتىنشى ناۋقاس ماسكەۋ-الماتى رەيسىمەن 10 ناۋرىز كۇنى ۇشىپ كەلگەن. بايلانىستا بولعان بارلىق ادامدار قازىر انىقتالىپ جاتىر» دەدى تىلەۋحان ابىلداەۆ.
«3 ناۋقاستىڭ جاعدايى قاناعاتتانارلىق. بىرەۋى ورتاشا اۋىر جاعدايدا. ۆيرۋسقا قارسى جانە سيمپتوماتيكالىق تەراپيا ەرەجەگە سايكەس ۋاقىتىندا باستالدى» دەدى تىلەۋحان ابىلداەۆ.
الماتى