بەتى اۋلاق, دەگەنمەن ساقتانعان ءجون. بۇل ورايدا تۇركىستان وبلىسى بويىنشا كوروناۆيرۋستىق ينفەكتسيامەن اۋىرعان ناۋقاستاردى جاتقىزۋ ءۇشىن ينفەكتسيالىق ستاتسيونارلاردا 100 توسەك-ورىن دايىندالعان.
كوروناۆيرۋستىق ينفەكتسياعا ۇقساس كلينيكاسى بار ناۋقاستاردى جاتقىزۋ, دياگنوزدارىن انىقتاۋ ماقساتىندا 240 توسەك-ورىنعا پروۆيزورلىق ستاتسيونارلار قاراستىرىلعان. بارلىعى – 340 ورىن. ودان بولەك بارلىق اۋداندار مەن قالالارداعى ينفەكتسيالىق اۋرۋلار بولىمدەرى دايىندىق جاعدايىنا كەلتىرىلگەن. قارىم-قاتىناستا بولعانداردى وقشاۋلاۋ ءۇشىن وبلىس اۋماعىنا 505 ورىنعا وبسەرۆاتسيالىق گوسپيتالدار جوسپارلانعان.
تۇركىستان وبلىسى تاۋارلار مەن كورسەتىلەتىن قىزمەتتەردىڭ ساپاسىن, قاۋىپسىزدىگىن باقىلاۋ دەپارتامەنتىنىڭ باسشىسى نۇربەك نىشانوۆ وڭىرلىك كوممۋنيكاتسيالار قىزمەتىندە وتكەن بريفينگتە وسىنداي دەرەكتەر كەلتىردى. بۇگىنگە دەيىن وبلىس اۋماعىنا كەلۋشىلەر اراسىندا كۆي-عا كۇدىكتى ناۋقاستار تىركەلمەگەنىن مالىمدەدى.
بريفينگتە, سونداي-اق وبلىس اكىمىنىڭ ورىنباسارى جولدىمۇرات امانباەۆ ءوڭىر تۇرعىندارىن كوپشىلىك جينالاتىن جەرلەردە ساقتىق شارالارىن ساقتاۋعا شاقىردى. جيىن, كەزدەسۋلەردى ازايتىپ, داۋرىقپاۋ كەرەكتىگىن ايتتى. «بۇگىنگى تاڭدا وبلىستىق تۇراقتاندىرۋ قورىندا 6546,6 توننا تاۋار ونىمدەرى بار. وبلىس اۋماعىنداعى قويمالار مەن ءىرى ساۋدا نىساندارىندا 11 اتاۋلى تاۋاردان 18 567 توننا ءونىم بار. ياعني, ازىق-ت ۇلىك قورى جەتكىلىكتى, بازارلار مەن ساۋدا ورىندارىنان كوپتەپ الىپ, دۇربەلەڭ تۋعىزۋعا نەگىز جوق»,– دەدى ج.امانباەۆ.
ال وبلىس اكىمىنىڭ ورىنباسارى ساكەن قالقامانوۆ وڭىردە 13 ناۋرىزدان باستاپ وتكىزىلەتىن بارلىق مەرەكەلىك, سپورتتىق, مادەني, تانىمدىق ءىس-شارالار توقتاتىلاتىنىن جەتكىزدى. «الەۋمەتتىك جەلىلەردە الىپ-قاشپا قاۋەسەت سوزدەر كوپ تارالۋدا. بۇل رەتتە بارلىق ازاماتتارعا تەك رەسمي اقپاراتقا سەنۋدى وتىنەمىن», – دەدى ساكەن امانگەلدى ۇلى.