كۇمىس القا يەگەرى قۇرالاي عابدۇلقامارقىزى – مىناۋ جارىق دۇنيەدەگى پەندەنىڭ پەشەنەسىنە جازىلار باقىتىن تاپقان ادام. كوڭىلىنىڭ تەرەڭ ءبىر تۇكپىرىندە ادامدارعا القاۋسىز جاقسىلىق جاساسام, كىشكەنتاي عانا قارەكەتىممەن كوڭىلدەرىن جاز گ ۇلىندەي جايناتىپ, نۇر شۋاعىن سەبەزگىلەسەم دەگەن مۇراتى تولايىم ورىندالىپ كەلەدى. وقىرمانعا تۇسىنىكتى بولۋ ءۇشىن ول قانداي ماقسات ەكەنىن دە ايتا كەتەلىك.
قۇرالاي عابدۇلقامارقىزى بالا اسىراپ العان وتباسىلاردى قولداۋ ورتالىعىندا ەڭبەك ەتتى. جۇمىس بابىمەن بالالار ۇيىنە ءجيى بارىپ تۇراتىن. بارعان سايىن كوڭىلى قۇلازىپ قايتادى. جۇزدەرى ءاپ-ادەمى, قىلىقتارى ءتاپ-ءتاتتى كىشكەنتاي سابيلەردى كورگەن سايىن ەت جۇرەگى بۇلك ەتە قالاتىن. تاعدىردىڭ تالكەگىمەن بالالار ۇيىنەن پانا تاپقان الگى سابيلەردىڭ ۋىلجىعان كۇلكىسى كوپكە دەيىن كوز الدىندا تۇراتىن. جاراتقان يەم-اۋ, مىنانداي پەرىشتەلەردى قالاي تاستاپ كەتتى ەكەن دەپ ويلاۋشى ەدى. سابيلەردىڭ كوپشىلىگى تاستاندى. سابيلەر عانا ەمەس, ەرەسەكتەرى دە بار.
– بالا, شىركىن, بويىڭداعى جىلىلىقتى سەزىپ تۇرادى عوي. بارعان سايىن قازدىڭ بالاپاندارى سياقتى مەنىڭ جانىما اينالىپ-ءۇيىرىلىپ كەلە بەرەتىن. ەس ءبىلىپ قالعاندارىمەن ەمەن-جارقىن سويلەسىپ, سىرلاسامىن. ولار دا ماعان رياسىز كوڭىلمەن جان-دۇنيەسىنىڭ تەرەڭ ءبىر تۇكپىرىندەگى جان سىرلارىن اقتارىپ سالاتىن, – دەيدى قۇرالاي عابدۇلقامارقىزى, – اسىرەسە, تاتيانا ەسىمدى قىزدى ۇناتىپ قالدىم. ءبىر قاراعاندا, وتە ۇقىپتى بالا. بولاشاق تۋرالى وي تولعاعاندا, وقىعىسى كەلەتىنىن, ءبىلىم العىسى كەلەتىنىن ايتۋشى ەدى. قول بايلاۋ ءىنىسى. ول دا وسى بالالار ۇيىندە تاربيەلەنىپ جاتىر ەكەن. تاستاپ كەتكىسى كەلمەيدى.
تاستاندى بالالار وزدەرىنىڭ اتا-انالارى تۋرالى ءجيى ايتاتىن. قايىرىلماي كەتسە دە, ءىلتيپاتىن تانىتاتىن. باقپاسا دا, باعالاپ تۇراتىن. ءتىپتى كەزدەسكىلەرى دە كەلەدى. تاعدىر ونداي ءساتتى بۇيىرتسا, اتا-انالارىنىڭ قىلمىسقا پارا-پار كەلەڭسىزدىكتەرىن بەتتەرىنە باسپاق ەمەس. ءبارىن دە تۇسىنەدى. مۇنىڭ بارلىعى تاعدىردىڭ جازۋى دەپ ۇعادى. ال اتا-انالارى بولسا, باۋىر ەتى بالالارىن تاستاپ كەتكەن سەبەپتەرى تۇرمىستىڭ قيىندىعىنان دەسەدى.
شىن مانىندە قۇرالايدىڭ پايىمداۋىنشا, اكەلىك, انالىق سەزىمنىڭ جوقتىعىنان, ايتپەسە, ون ەكى مۇشەسى ساۋ, اياق-قولى بالعاداي ادامدار ءوزى ومىرگە اكەلگەن سابيلەرىن اسىراي الماۋشى ما ەدى. كوڭىلدەرىنە تىرشىلىكتىڭ مۇزى قاتقان الگى بالالاردىڭ ءسال سالقىن تارتقان جۇرەگىن انالىق ابزال پەيىلمەن, اق ماحابباتپەن ءجىبىتۋدى ۇيعارعان قۇرالاي جولداسى راشيد ەكەۋى 2017 جىلى ساندىقتاۋداعى بالالار ۇيىنەن 10-15 جاس ارالىعىنداعى ۆيكتوريا, تاتيانا, البينا, ماكسيم جانە اندرەي ەسىمدى بەس بالانى اسىراپ الدى. شاڭىراق شاتتىققا تولدى, قۋانىش ەسەلەپ كوبەيدى. ماقساتىنا جەتكەن قۇرالايدىڭ قۋانىشىندا شەك جوق ەدى. وسى ءبىر ءسات شىنىمەن راشيدتىڭ شاڭىراعىندا اق تۇيەنىڭ قارنى جارىلعان كۇن بولدى.
جاڭا شاڭىراقتاعى تۇرمىستارى جايلى, نە ىشەمىن, نە كيەمىن دەمەيدى. ءتورت قۇبىلالارى تەڭەلگەن ءتارىزدى. باق قۇسى ماڭدايعا ەندى قوندى دەگەندە, ورنى تولماس وقىس وقيعانىڭ ورىن الدى. اكەلەرى راشيد مەزگىلسىز, قايتپاس ساپارعا اتتاندى. ءسال جادىراپ, كوكتەمگى جاۋقازىن گۇلدەي ءبۇر جارىپ كەلە جاتقاندا, تۇلا بويلارىن تىتىرەنتەر, توڭدىرار, جاۋراتار ىزعار قايتا سوقتى. ءوزىنىڭ التى بالاسى مەن ساندىقتاۋداعى بالالار ۇيىنەن باۋىرىنا باسقان بەس بالا – ءبىر قاۋىم جۇرت سەڭ سوققان بالىقتاي ابدىراپ قالدى. جاراتقان يە ءبىر جىلاتقان پەندەسىن قايتا-قايتا جىلاتا بەرۋشى مە ەدى, بۇلت ارتىنان كۇن شىقپاي ما؟..
راشيدتىڭ قارا شاڭىراعىندا قۋانىشتى كۇندەر قايتا باستالعان. ۇلدارى فارحاد پەن راسۋل وتباسىلى بولىپ, ءبىر قىزىن ۇزاتتى. قالعان سەگىز بالا ءبىر ءۇيدىڭ بالالارىنداي ءوسىپ-ءونىپ كەلەدى. ەلدار شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ مەديتسينا فاكۋلتەتىندە وقيدى. ال البينا جوعارى تەحنيكالىق كوللەدجدە تىگىنشى ماماندىعىن يگەرۋدە. قالعاندارى مەكتەپ وقۋشىلارى.
قۇرالايدىڭ باۋىرىنا باسقان بالالارى ءار ۇلتتىڭ وكىلدەرى. ماسەلەن, ماكسيم مولدوۆان, ۆيكتوريا ۋكراين, البينا چەشەن, اندرەي مەن تاتيانا ورىس. ون ءبىر بالانىڭ ءبارى ءبىر اتا-انادان تۋعانداي. شاڭىراقتىڭ شاتتىعىن شالقىتىپ تۇرعان بىرلىك. بىلاي قاراعاندا, ارقايسىسى قازاقتىڭ كيىز ءۇيىنىڭ ۋىعى ءتارىزدى. تىرشىلىكتىڭ جاۋىنى مەن داۋىلىندا ورتاق شاڭىراقتى ءمىز باقپاي كوتەرىپ تۇر. ۇيدەگى بەرەكە-بىرلىك انانىڭ ماحابباتىنان, ءبىر-بىرىنە دەگەن سىپايى سىيلاستىق پەن قالتقىسىز قۇرمەتتەن تۋىندايدى.
بۇگىندە قۇرالاي جۇمابەكوۆا «انا ءۇيى» قوعامدىق قورى داعدارىس ورتالىعىنىڭ ۇيلەستىرۋشىسى بولىپ ەڭبەك ەتەدى. كوپ بالانى باۋىرىنا باسقان تاجىريبەسى بار. ءوزى جالعىزباستى بولسا دا, جارىم كوڭىل انالارعا قولۇشىن بەرمەي قالعان كەزى جوق. انالار ۇيىندە التى جالعىزباستى انا, جەتى بالا تۇرىپ جاتىر ەكەن. قانشاما تاعدىر؟!
ەندى ءبىر اۋىز ءسوز كەيىپكەرىمىز حاقىندا. سولتۇستىك قازاقستان وبلىسىنا قاراستى نوۆويشيمكا ەلدىمەكەنىندە قايىن اعاسىمەن بىرگە بالالاردى ونەرگە باۋلۋ ماقساتىندا شىعارماشىلىق ءۇيىن اشىپ, ەڭبەك ەتتى. كەيىن اۋداندىق مادەنيەت ءۇيىنىڭ ديرەكتورى بولعان. كوكشەتاۋ قالاسىنا كوشىپ كەلگەننەن كەيىن ورتا مەكتەپ ديرەكتورىنىڭ ورىنباسارى قىزمەتىن اتقاردى. وبلىستىق ءبىلىم باسقارماسىندا بەس جىل قىزمەت ەتتى. وبلىستا العاش رەت قۇرالاي عابدۇلقامارقىزى بالا اسىراپ العان وتباسىلاردى قولداۋ ورتالىعىن ۇيىمداستىرىپ, بالالار ۇيىندە ءتالىم-تاربيە الىپ جاتقان ءجۇز بالانى جاڭا وتباسىلارعا تابىستادى.
تاياۋدا قۇرالاي عابدۇلقامارقىزى Nur Otan پارتياسىنىڭ مۇشەلىگىنە قابىلداندى. قالا اكىمى امانگەلدى سمايىلوۆ كۇمىس القا تاقتى. وسى ءبىر جاقسىلىق شاراپاتى جاناشىر جاننىڭ كوڭىلىنە قانات ءبىتىرىپ, مەرەيىن ءوسىرىپ تاستادى. الدا قانشا عۇمىر بار. جاناشىرلىق جاساۋعا جانى قۇشتار انامىز ءالى دە قولىنان كەلگەنىنشە مۇقتاج جانداردىڭ مەرەيىن ءوسىرىپ, قوس قولتىقتارىنان دەمەۋگە ءازىر.
كوكشەتاۋ