توبىل وڭىرىندە ءدال كەرەك كەزىندە پوليتسياعا قول ۇشىن سوزىپ, كومەككە كەلۋشىلەردىڭ سانى جىل ساناپ ەسەلەنىپ كەلەدى. تۇرعىنداردىڭ قوعامدىق جاۋاپكەرشىلىگى مەن قۇقىقتىق ساۋاتىنىڭ ارتىپ كەلە جاتقانىن ساقشىلار دا ايتىپ وتىر. ماسەلەن, وتكەن جىلى وبلىستاعى ءتارتىپ ساقتاۋ شارالارىنا مىڭنان استام ەرىكتى قاتىسىپ, 12 قىلمىستىڭ اشىلۋىنا, 517 اكىمشىلىك قۇقىق بۇزۋشىنىڭ ۇستالۋىنا اتسالىسقان.
ەرىكتىلەردىڭ كومەگىمەن ۇشتى-كۇيلى حابار-وشارسىز كەتكەن جۇزگە جۋىق ازامات تابىلعان. پوليتسيا دەپارتامەنتى قوعام تىنىشتىعى ءۇشىن باسىن قاتەرگە تىگىپ, دەر كەزىندە ءتارتىپ ساقشىلارىنا كومەك قولىن سوزعان 255 ەرىكتىگە ءبىر جىلدىڭ ىشىندە 5 ميلليون تەڭگەدەن استام اقشالاي سىيلىق تاعايىنداعان.
بىرنەشە الەۋمەتتىك جەلىلەردە تىكەلەي بايلانىس ارقىلى تۇرعىندارعا ەسەپ بەرگەن وبلىستىق پوليتسيا دەپارتامەنتىنىڭ باستىعى بەكەت ايماعامبەتوۆ وسى جانە بۇدان باسقا دا ماسەلەلەر توڭىرەگىندە ءسوز قوزعادى.
– مەن بۇل ەسەپتىك كەزدەسۋدى ازاماتتاردى قابىلداۋ, ولاردىڭ وزەكتى ماسەلەلەرىن شەشۋ الاڭى رەتىندە قاراستىرامىن, – دەگەن وڭىرلىك پوليتسيا باسشىسى بۇگىندە قۇقىق قورعاۋ ورگاندارى حالىققا قىزمەت كورسەتۋدىڭ جاڭا ۇلگىسىنە كوشىپ جاتقانىن ايتا كەلىپ. – سوڭعى جىلدارى حالىقتىڭ پوليتسياعا دەگەن سەنىمى ارتىپ كەلەدى. بۇل ءوز مىندەتىن مۇلتىكسىز اتقاراتىن انتىنا ادال ءتارتىپ ساقشىلارىنىڭ جۇمىس ناتيجەسىندە قول جەتكەن تابىس. ماسەلەن, وتكەن جىلى وبلىس ورتالىعىندا بىرنەشە پاتەر توناۋ قىلمىسى تىركەلگەن بولاتىن. بۇگىنگە دەيىن سولاردىڭ بارلىعى اشىلدى. قىلمىسكەرلەر جازاسىن الىپ, 1 ميلليون تەڭگەدەن استام قولدى بولعان قارجى يەلەرىنە قايتارىلدى. پوليتسيا قىزمەتكەرلەرى وتكەن جىلى سوت پەن تەرگەۋدەن قاشىپ جۇرگەن 104 قىلمىسكەردى ىزدەپ تاۋىپ, ادىلەتتى زاڭنىڭ ۇستەمدىك الۋىنا قول جەتكىزدى, – دەدى.
گەنەرالدىڭ ايتۋىنشا, وبلىستىڭ ىرگەلى ەلدى مەكەندەرىندەگى تۇرعىن ءۇي اۋلالارىن بيىل ەكىنشى جىل جاياۋ پاترۋلدىك قىزمەت كۇزەتەدى. وسىنىڭ ارقاسىندا كوشە قىلمىسى 22%, ال قوعامدىق ورىندارداعى قىلمىس دەڭگەيى ەكى ەسە ازايعان. وڭىردە, اسىرەسە, ادام ءولتىرۋ, زورلىق-زومبىلىق جاساۋ, ۇرلىق, توناۋ, بوپسالاۋ سياقتى اۋىر جانە اسا اۋىر قىلمىس تۇرلەرى ەداۋىر ازايعانى بايقالادى.
بيىل اقپان ايىنىڭ باسىندا وبلىس پوليتسەيلەرى ىشىمدىك ءىشىپ الىپ رۋلگە وتىرعان جۇرگىزۋشىلەرگە قارسى ىمىراسىز كۇرەس باستاعان. باس پوليتسەي بۇل جونىندە دە اقپار بەردى. ءبىر اي ىشىندە ءتارتىپ ساقشىلارى ماساڭ كۇيىندە كولىك جۇرگىزگەن 197 ادامدى ۇستاعان. ونىڭ 138-ءى 7 جىلعا اۆتوكولىك جۇرگىزۋ قۇقىنان ايىرىلىپتى. قالعاندارىنىڭ ءىسى سوت قاراۋىندا جاتىر.
قوستاناي