ەستافەتا ەرەجەسى بويىنشا, 1941 جىلى جەتىسۋدا گەنەرال پانفيلوۆ جاساقتاعان ايگىلى 316-شى اتقىشتار ديۆيزياسىنىڭ جاۋىنگەرلىك تۋىنىڭ كوشىرمەسىن بۇكىل قازاق جەرىن ارالاپ شىعۋى كەرەك.
شاراعا جاۋاپتى اسكەري قۇرىلىم – ۇلتتىق ۇلان 5 مامىرعا دەيىن ەستافەتانى اياقتاۋى ءتيىس. جەڭىستىڭ 75 جىلدىعىنا ارنالعان تاعىلىمدى شارانىڭ باستى ماقساتى - تاريحقا تاعزىم ەتۋ, وتكەن عاسىردىڭ بەل ورتاسىندا بۇكىل ادامزات بالاسىنىڭ باسىنا قارا بۇلت بولىپ ۇيىرىلگەن فاشيزمگە قارسى قاندى سوعىستا ەرلىك كورسەتكەن مايدانگەرلەردىڭ ەرلىگىن وسكەلەڭ ۇرپاققا ونەگە ەتۋ.
ىشكى ىستەر مينيسترلىگىنىڭ باستاماسىمەن بيىل 5 اقپاندا ء«بىز – جەڭىستىڭ مۇراگەرىمىز» دەگەن ۇرانمەن باستالعان ەستافەتانى قارسى الۋ شاراسى بۇگىن قوستانايداعى جەڭىس ساياباعىندا ءوتتى. جيىندا قوستانايداعى ۇلتتىق ۇلان ساربازدارى اقتوبە قالاسىنان جەتكەن جاۋىنگەرلىك تۋدى سالتاناتتى تۇردە قابىلداپ الدى.
- جەڭىستىڭ مەرەيتويىنا بايلانىستى رەسپۋبليكا كولەمىندە 600-دەن استام شارالار ۇيىمداستىرۋ جوسپارلانعان. ال بۇل ەستافەتا ەلىمىز بويىنشا 11 مىڭ شاقىرىمدى ءجۇرىپ ءوتىپ, 40-تان استام اسكەري بولىمدە ايالداماق. قوستانايدا ءبىز جەكە قۇراممەن بىرگە تاربيەلىك ساعاتتار مەن تاعىلىمدى كەشتەر ۇيىمداستىرىپ, كوزى ءتىرى ارداگەرلەرمەن كەزدەسۋ وتكىزەمىز. سونداي-اق, قارت مايدانگەرلەردىڭ ۇيلەرىنە بارىپ قۇتتىقتاپ شىققىمىز كەلەدى. مەكتەپ قابىرعالارىندا پاتريوتتىق دارىستەر وتكىزبەكپىز, - دەدى ۇلتتىق ۇلاننىڭ «ورتالىق» وڭىرلىك قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك قانات بەلياكوۆ.
پانفيلوۆشىلار تۋىنىڭ كوشىرمەسى قوستانايدا ەكى كۇن بولىپ, كوكشەتاۋعا قاراي جول تارتادى.
قوستاناي