الماتىلىق 5 جاسار بۇلدىرشىندەر تۇرمىستىق قالدىقتاردى كادەگە جاراتىپ, كىلەمدەر, ويىنشىقتار مەن فيگۋرالار جاسادى. الاتاۋ اۋدانىنداعى بالاباقشادا مۇعالىمدەر جاس ونەرتاپقىشتار ءۇشىن شەبەرحانا اشىپ, بالالارعا پلاستيكتەن ءتۇرلى بۇيىمدار جاساۋدى ۇيرەتۋدە.
وندا نەگىزىنەن بوس بوتەلكەلەر مەن قاقپاقتاردى پايدالانادى ەكەن. قازاقتىڭ ويۋ-ورنەگىمەن ناقىشتالعان كىلەمدى جاساۋ ءۇشىن مەكتەپ جاسىنا دەيىنگى بالالار مەن تاربيەشىلەر 7 مىڭنان استام پلاستيكالىق قاقپاقتى قولدانعان. جاسالۋ تەحنولوگياسى دا كۇردەلى ەمەس, دەلىنگەن الماتى قالاسى «رۋحاني جاڭعىرۋ»جوبالىق كەڭسەسى ۇسىنعان اقپاراتتا. الدىمەن ۇستازدار ارنايى ماتەريالعا ەسكيزدى بەينەلەيدى, سودان كەيىن وعان بالالار قاقپاقتاردى جابىستىرادى. بارلىق جۇمىس ورتا ەسەپپەن ەكى اپتاعا سوزىلعان.
ەرەكشە كىلەم ماسساجدىڭ ءرولىن ورىندايدى. بالالار تۇسكى ۇيقىدان ويانعان سوڭ, جالاڭ اياق جۇرەدى, بۇل ماي تابان بولدىرمايدى جانە جۇيكە جۇيەسىنە جاقسى اسەر ەتەدى دەيدى ۇستازدار. كىلەمنەن بولەك, جاس شەبەرلەر ويىنشىقتار, فيگۋرالار, ساعاتتار مەن ءۇيدىڭ مودەلدەرىن دە جاسايدى. سونداي-اق, بالاباقشادا قاقپاقتار قالاشىعى بولمەسى دە بار. وندا تاربيەلەنۋشىلەر قاقپاقتاردى تۇستەرگە سايكەس جيناۋ قاجەت. بۇل ساۋساقتاردىڭ موتوريكاسىن دامىتۋعا, سونىمەن قاتار كۇن سايىن جاڭا نارسەنى ۇيرەنۋگە مۇمكىندىك بەرەدى. وتكەن جىلى مەكتەپكە دەيىنگى مەكەمەدە 50 مىڭنان استام قاقپاق جينالعان. اتا-انالاردىڭ ايتۋىنشا, مۇنداي جاڭاشىلدىق بالالارىنا قاتتى ۇنايدى ەكەن. ءتىپتى, بۇلدىرشىندەر ۇيدە جۇرگەندە دە كەرەكسىز قالعان زاتتاردان بىرنارسە قۇراستىرىپ شىعارۋدى ويلايدى دەيدى. ودان وزگە بالاباقشا تاربيەشىلەرى ادەتتەگى اعاش ۇستەلدەر مەن ورىندىقتاردى ساتىپ الۋدان باس تارتۋدى جوسپارلاپ وتىر. ەندى ولار پلاستيك بۇيىمداردى قايتا وڭدەۋدى جالعاستىرىپ, ودان بالالار جيھازدارىن جاساۋدى قولعا الماق.