وتكەن جىلى «رۋحاني جاڭعىرۋ» باعدارلاماسىنىڭ اياسىندا ءوڭىردىڭ ءبىلىم بەرۋ سالاسىندا 124 جوبا جۇزەگە اسىرىلىپ, سالالىق ينفراقۇرىلىمدى دامىتۋعا, ماتەريالدىق-تەحنيكالىق جاعدايدى جاقسارتۋعا, اۋىلدىق ەلدى مەكەندەرگە جاس مامان مۇعالىمدەردى تارتۋعا جالپى قۇنى 289 ملن تەڭگە بولاتىن قوماقتى قارجى قۇيىلعان. وبلىستا بىلتىر تەك دەمەۋشىلەر كومەگىنىڭ ارقاسىندا عانا 65 ءىت سىنىپ, 30 روبوتوتەحنيكا كابينەتى اشىلدى.
وبلىس اكىمدىگىندە وتكەن جيىندا باعدارلامانىڭ اتالمىش سالادا جۇزەگە اسىرىلۋ بارىسى تالقىلاندى.
«رۋحاني جاڭعىرۋ» باعدارلاماسى بىزگە مەكتەپ مۋزەيلەرىنىڭ كوپتەپ اشىلۋىنا مۇمكىندىك بەرىپ وتىر. سوڭعى ءۇش جىلدىڭ ىشىندە مەكتەپ جانىنان اشىلعان مۋزەيلەر سانى ەكى ەسە كوبەيدى. ماسەلەن, قوستاناي قالاسىنداعى فيزيكا-ماتەماتيكا ليتسەيىنىڭ جانىنان بىلتىر عانا اشىلعان ولكەتانۋ مۋزەيى رەسپۋبليكالىق بايقاۋدا باس جۇلدەنى جەڭىپ الدى. بيىل ارقالىق قالاسىنداعى بالالار مەن جاسوسپىرىمدەرگە ارنالعان «جاس ۇلان» ورتالىعىندا تسيفرلىق مۋزەي اشىلادى, - دەدى وبلىستىق ءبىلىم بەرۋ باسقارماسىنىڭ باسشىسى ۆاسيلي تسىمباليۋك.
قوستاناي