ەلباسى نۇرسۇلتان نازارباەۆ الماتى قالاسىنىڭ اكىمى باقىتجان ساعىنتاەۆتى قابىلدادى. بۇل تۋرالى تۇڭعىش پرەزيدەنتتىڭ رەسمي سايتى حابارلادى.
مەگاپوليس باسشىسى قالا دامۋىنىڭ 2020 جىلعى قاڭتار ايىنداعى نەگىزگى الەۋمەتتىك-ەكونوميكالىق كورسەتكىشتەرىنە توقتالىپ, ولاردىڭ ءارى قاراي ءوسۋ پەرسپەكتيۆالارى جايلى ايتىپ بەردى.
سونىمەن بىرگە, ب.ساعىنتاەۆ ەلباسىنا ءوندىرىستى دامىتۋ, قۇرىلىس, شاعىن جانە ورتا بيزنەس, سونداي-اق, ينۆەستيتسيا تارتۋ سالالارىنداعى مەملەكەتتىك جانە سالالىق باعدارلامالاردىڭ جۇزەگە اسۋ بارىسى تۋرالى مالىمەت بەردى. الماتى قالاسى اكىمىنىڭ مالىمەتىنشە, 2020 جىلدىڭ قاڭتار ايىندا ينۆەستيتسيا كولەمى 43,2 ملرد تەڭگەدەن استى. وتكەن جىلعى قاڭتارمەن سالىستىرعاندا ءوسىم 22 پايىزدى قۇرادى.
بولشەك ساۋدا كولەمى 7,5 پايىزعا ءوستى. وسى جىلدىڭ العاشقى ايىندا قالادا 84,4 مىڭ شارشى مەتر تۇرعىن ءۇي پايدالانۋعا بەرىلدى. بۇل بىلتىرعى قاڭتارداعى كورسەتكىشتەن 6,7 پايىزعا ارتىق.
ەلباسى قالا باسشىلىعىنىڭ اتقارىپ جاتقان جۇمىستارىنىڭ ماڭىزدىلىعىن اتاپ ءوتتى. «وتكەن جىل جاقسى كورسەتكىشتەرمەن اياقتالدى. الماتى – قازاقستانداعى ەڭ ۇلكەن مەگاپوليس. قالادا كوپتەگەن پروبلەما بار ەكەنىن بىلەمىن. ول – ەكولوگيا, كولىك, شاعىن جانە ورتا بيزنەستىڭ دامۋى, كوشى-قون ماسەلەسى مەن حالىقتى جۇمىسپەن قامتۋ. بۇل ماسەلەلەر بىزگە بۇرىننان بەلگىلى. ولاردى جۇيەلى تۇردە شەشۋ ماڭىزدى», - دەدى نۇرسۇلتان نازارباەۆ.
سونداي-اق, قازاقستاننىڭ تۇڭعىش پرەزيدەنتى ءوسىپ كەلە جاتقان قالا حالقىن الەۋمەتتىك نىساندارمەن – ەمحانالار, مەكتەپتەر جانە بالاباقشالارمەن قامتاماسىز ەتۋ قاجەتتىگىنە نازار اۋداردى.