اتىراۋ وبلىسى ەكونوميكالىق كورسەتكىشتەر بويىنشا ەلىمىزدەگى كوش باستاۋشى وڭىرلەردىڭ ءبىرى. نەگىزىنەن — كومىرسۋتەك شيكىزاتىن ءوندىرۋ جانە وڭدەۋ ەسەبىنەن. 2019 جىلدىڭ جازىندا قازاقستان پرەزيدەنتى ق. توقاەۆ ءوڭىردىڭ جۇرتشىلىعىمەن كەزدەسۋ كەزىندە اتىراۋ وبلىسىنىڭ ەكونوميكاسىن ءارتاراپتاندىرۋ ءۇشىن شارالار قابىلداۋدى تاپسىردى, مۇناي-گاز جانە مۇناي-حيميا كەشەندەرىنەن باسقا, جەرگىلىكتى ەكونوميكانىڭ باسقا دا سالالارىن قولداۋ قاجەتتىگىن اتاپ ءوتتى. وڭىردە جاڭا وندىرىستەر اشۋ جانە جۇمىس ىستەپ تۇرعاندارىن جاڭعىرتۋ بويىنشا ۇلكەن جۇمىس اتقارىلدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
اتىراۋ ءوڭىرى — قازاقستان رەسپۋبليكاسىنىڭ ءىرى يندۋستريالدى اۋداندارىنىڭ ءبىرى. وبلىس ەكونوميكاسىن دامىتۋدىڭ باسىم باعىتتارى – مۇناي-گاز ءوندىرۋ ونەركاسىبى, قۇرىلىس ماتەريالدارى ءوندىرىسى, وڭدەۋ, اگروونەركاسىپ جانە بالىق سالالارى. ەگەر 1991 جىلى جالپى وڭىرلىك ءونىم كولەمى 4,6 ملرد تەڭگەنى قۇراعان بولسا, 2019 جىلدىڭ 9 ايىنىڭ قورىتىندىسى بويىنشا وبلىستىڭ جالپى وڭىرلىك ءونىمى 5,8 ترلن تەڭگەنى قۇرادى. حالىقتىڭ جان باسىنا شاققانداعى جالپى وڭىرلىك ءونىم 9 ملن تەڭگەگە جەتتى.
اتىراۋ وبلىسى اكىمدىگىنىڭ حابارلاۋىنشا, 2019 جىلى ءوڭىردىڭ الەۋمەتتىك-ەكونوميكالىق دامۋىنىڭ بارلىق كورسەتكىشتەرى بويىنشا وڭ قارقىن ساقتالدى.