رەسەيدىڭ اتاقتى تەننيسشىسى, كوپتەگەن اسا ءىرى دودالاردىڭ جەڭىمپازى ماريا شاراپوۆا ۇلكەن سپورتپەن قوش ايتىساتىنىن رەسمي تۇردە مالىمدەدى.
32 جاستاعى تۇمەن وبلىسىنىڭ تۋماسى 2005 جىلى الەمنىڭ ءبىرىنشى راكەتكاسى اتانعان ەدى. ءار جىلدارى ول رولان گارروستى ەكى مارتە ۇتسا, اقش پەن اۋستراليانىڭ اشىق بىرىنشىلىكتەرى مەن ۋيمبلدوندا ءبىر رەتتەن توپ جاردى. WTA تۋرنيرلەرىندە 36 مارتە تەڭدەسسىز دەپ تانىلدى. 2012 جىلى لوندون وليمپياداسىنىڭ كۇمىس جۇلدەگەرى اتاندى. 2004 جىلى WTA قورىتىنىدى جارىسىندا دارا شىقتى. 2008 جىلى رەسەي قۇراماسى ساپىندا فەدەراتسيا كۋبوگىن جەڭىپ الدى.
كورتتا ونەر كورسەتكەن جىلدارى ماريا شاراپوۆا 40 ميلليون اقش دولارى شاماسىنا تابىس تاپتى. ودان بولەك, ءتۇرلى جارنامالارعا ءتۇسۋ ارقىلى ۇلدە مەن بۇلدەگە وراندى.
سوڭعى جىلدارى رەسەيلىك تەننيسشىنىڭ جولى بولمادى. قازىرگى كەزدە ول الەمدىك رەيتينگتە 373 ورىندا تۇر. سودان شاراپوۆا ۇلكەن سپورتپەن قوش ايتىسۋدى قۇپ كوردى.