«Bek Air» كومپانياسىنا جۇرگىزىلگەن جوسپاردان تىس تەكسەرۋ قورىتىندىسى جاريالاندى. يندۋستريا جانە ينفراقۇرىلىمدىق دامۋ مينيسترلىگىنىڭ ازاماتتىق اۆياتسيا كوميتەتىنىڭ حابارلاۋىنشا, كومپانيادا اۋە ساپارىن جانە ۇشۋعا جارامدىلىقتى ۇيىمداستىرۋ, مۇزداۋعا قارسى وڭدەۋ پروتسەدۋرالارى, ۇشۋ قاۋىپسىزدىگىن باسقارۋ جۇيەسىنىڭ ستاندارتتارىنا سايكەستىگى, سونداي-اق اۆياتسيالىق قاۋىپسىزدىك نورمالارىن ساقتاۋ ءتارتىبى تەكسەرىلگەن.
«2020 جىلدىڭ 20 قاڭتارىندا قازاقستاننىڭ اۆياتسيالىق اكىمشىلىگى تەكسەرۋدىڭ ارالىق ناتيجەلەرى مەن سول كەزدە انىقتالعان بۇزۋشىلىقتار تۋرالى حابارلاعان بولاتىن. اۆياتسيالىق قوزعالتقىشتاردى پايدالانۋدا ورەسكەل بۇزۋشىلىقتار تۋرالى ايتىلدى. بىراق ولار قوزعالتقىشتىڭ شىعۋ تەگىن, وندا ورناتىلعان اگرەگاتتاردىڭ جۇمىس ىستەۋىن جانە اقاۋلار تۋرالى جازبالاردى انىقتاۋعا مۇمكىندىك بەرمەيدى. سونداي-اق فيۋزەلياجدىڭ جانە اۋە كەمەلەرىنىڭ باسقا دا بولىكتەرىنىڭ زاقىمدانۋى بولدى. ولارعا تەحنيكالىق قىزمەت كورسەتۋ جانە جوندەلۋى تۋرالى جالعان قۇجاتتار راسىمدەلىپ كەلگەن», - دەپ حابارلادى كوميتەتتەن.
اتاپ وتىلگەندەي, اۋە كومپانياسى ينجەنەرلىك قىزمەتتىڭ جانە ۇشۋ ەكيپاجىنىڭ مۇزدانۋ فاكتىسىن انىقتاۋ ءۇشىن ۇشار الدىندا ۇشاق قاناتتارىن فيزيكالىق (تاكتيلدىك) تەكسەرۋدىڭ مىندەتتى پروتسەدۋراسىن ساقتاۋىن قامتاماسىز ەتپەگەن.
«سول كەزدە-اق اۋە كومپانياسىنىڭ ۇشۋ قاۋىپسىزدىگىن باسقارۋ جۇيەسى زاڭناما تالاپتارىنا سايكەس كەلمەيتىندىگى انىق ەدى», - دەلىنگەن اقپاراتتا. جالپى, تەكسەرىس قورىتىندىسى بويىنشا اۋە كومپانياسىنىڭ سەرتيفيكاتتارىنىڭ قولدانىسىن توقتاتۋعا نەگىز بولا الاتىن باسقا دا كوپتەگەن ەلەۋلى بۇزۋشىلىقتار مەن كەمشىلىكتەر انىقتالعان. «ولاردىڭ قاتارىندا اۆياتسيالىق وقيعانى جاسىرۋ, اۋە كەمەسىنىڭ ۇلگىسىنە رۇقسات الۋ ءۇشىن ۇشقىشتاردى دايارلاۋ تۋرالى جالعان سەرتيفيكاتتاردى پايدالانۋ, ۇشاقتارعا تەحنيكالىق قىزمەت كورسەتۋدى ورىنداۋ تۋرالى جالعان قۇجاتتار جاساۋ سەكىلدى كەمشىلىكتەر بار.
اۋە كومپانياسى 2019 جىلدىڭ 25 جەلتوقسانىندا فوككەر-100 UP-F1017 اۋە كەمەسىمەن بولعان اۆياتسيالىق اپاتتىڭ ناقتى سەبەپتەرىن اتامادى», - دەپ حابارلادى كوميتەتتەن. ءمالىم ەتىلگەندەي, اۋە كەمەسىنىڭ كومانديرى «نۇر-سۇلتان» حالىقارالىق اۋەجايىنان شىمكەنت باعىتىندا ۇشىپ شىققاننان كەيىن №1 گيدروجۇيەنىڭ ىستەن شىعۋىن انىقتاعان. بۇل ولقىلىق گيدراۆليكالىق سۇيىقتىقتىڭ تولىعىمەن اعىپ كەتۋىنە بايلانىستى بولعان. ارتىنشا بۇل, جالعاسقاناتشانىڭ شىقپاي قالۋىنا, ءشاسسيدىڭ الدىڭعى تىرەگىن, بيىكتىك ءرۋلىن ەلەرونداردى, رەۆەرستى جانە ۇشۋ كەزىندەگى باسقا دا جابدىقتاردى باسقارۋ تەتىكتەرىنىڭ ىستەن شىعۋىنا الىپ كەلگەن.
كۇردەلى جاعدايعا قاراماستان, اۋە كەمەسىنىڭ كومانديرى №2 اۆاريالىق گيدروجۇيەنى قولدانا وتىرىپ ۇشۋدى جالعاستىرعان. شىمكەنت قالاسىنىڭ اۋەجايىنا قونعاننان كەيىن, اۋە قوزعالىسىن باسقارۋ ديسپەتچەرىنە ءشاسسيدىڭ الدىڭعى تىرەگىن باسقارۋ تەتىگىنىڭ ىستەن شىققانى تۋرالى جالعان اقپارات بەرگەن. بۇدان بولەك, اۋە كومپانياسى ۇشقىشتارعا اۆياتسيالىق قاۋىپسىزدىك جانە قاۋىپتى جۇكتەردى تاسىمالداۋ بويىنشا قايتا دايارلاۋ كۋرسىن اياقتاعانى تۋرالى فورمالدى سەرتيفيكاتتار بەرگەن. تەكسەرۋ بارىسىندا انىقتالعانداي, ساباق ۋاقىتىندا جانە سىناقتان ءوتۋ كەزىندە پيلوتتار ەلدىڭ باسقا وڭىرلەرىندە ۇشۋ تاپسىرماسىندا بولعان. سونداي-اق اۆياكومپانيانىڭ ەكى ۇشقىشى فوككەر 70/100 ۇلگىسىندەگى اۋە كەمەسىن باسقارۋ ءۇشىن قايتا دايارلاۋ سەرتيفيكاتتارىن قولدان جاساعانى بەلگىلى بولدى.
«لاتۆيانىڭ وقۋ ورتالىعىندا ولار پراكتيكالىق ەمتيحاندى تاپسىرا الماعان. وسىعان بايلانىستى ولارعا اتالعان كەمە ۇلگىسىن باسقارۋ قۇقىعى بەرىلمەي, تەك كۋرستى تىڭداعاندارى جونىندە انىقتاما تاپسىرىلعان», - دەلىنگەن تەكسەرىس قورىتىندىسىندا.
وسىلايشا, ليتسەنزياعا رۇقسات بەلگىسىن قويدىرۋ ءۇشىن ولار ۋاكىلەتتى ورگانعا كۋرستى ءساتتى اياقتاعانى تۋرالى جالعان سەرتيفيكات ۇسىنعان. وقۋ ورتالىعى سەرتيفيكاتتاردىڭ جالعاندىعىن راستادى. قازىرگى ۋاقىتتا اۆياتسيالىق پەرسونال كۋالىگىن قايتارىپ الۋ ماسەلەسى شەشىلۋدە.
««Bek Air» اق اۆياتسيالىق قوزعالتقىشتاردى وندىرەتىن زاۋىت - « Rolls Royce»-ءتىڭ قولداۋى جونىندەگى كەلىسىمشارتقا وتىرماعان. سونىمەن قاتار, ينجەنەرلىك پروتسەدۋرالار نۇسقاۋلىعىن بۇزا وتىرىپ, اۆياتسيالىق قوزعالتقىشتاردىڭ پايدالانۋ دەرەكتەرى ءوندىرۋشى زاۋىتقا ولاردى وڭدەۋ ءۇشىن جىبەرىلمەگەن. سونداي-اق ولاردى وزدىگىنەن «Bek Air» اق-دا وڭدەۋ جۇرگىزبەگەن. وسىلايشا اۋە كومپانياسى اۆياتسيالىق قوزعالتقىشتاردىڭ جاي-كۇيىنە مونيتورينگ جۇرگىزبەگەن. سايكەسىنشە ولاردىڭ سەنىمدىلىگى مەن ۇشۋ كەزىندەگى قاۋىپتەر تۋرالى اقپاراتى بولماعان. اۋە كومپانياسى ۋاكىلەتتى ورگاننىڭ بەكىتۋىنسىز ينجەنەرلەرگە رۇقسات ساناتىن ءوز بەتىنشە بەرىپ كەلگەن. سونداي-اق ءتيىستى رۇقساتى جوق ينجەنەرلەرگە اۋە كەمەلەرىندە تەحنيكالىق جانە پايدالانۋ جۇمىستارىن جۇرگىزۋگە رۇقسات بەرگەن», - دەپ حابارلادى كوميتەتتەن.
سونداي-اق الماتى اۋەجايىندا اۋە كومپانياسىنىڭ ەكى ينجەنەرى فوككەر-100 UP-F1014 ۇشاعىنا تەحنيكالىق قىزمەت كورسەتۋ تۋرالى قۇجاتتى جالعان راسىمدەگەنى انىقتالىپ وتىر. وسى جۇمىستار ورىندالاتىن كۇنى بورت اۋعانستان اۋماعىندا اۋە ساپارىن ورىنداۋ ۇستىندە بولعان. «Bek Air» اق-نىڭ قىزمەتىن جوسپاردان تىس تەكسەرۋ ناتيجەلەرى اۋە كومپانياعا جىبەرىلدى.
اۋە كومپانياسى 10 كۇن ىشىندە قازاقستاننىڭ اۆياتسيالىق اكىمشىلىگىنە بارلىق بۇزۋشىلىقتاردى جويۋ بويىنشا تۇزەتۋ ءىس-قيمىلدارىنىڭ جوسپارىن ۇسىنۋى ءتيىس. ەگەر بۇزۋشىلىقتار 6 اي ىشىندە جويىلماسا, پايدالانۋشى سەرتيفيكاتى مەن ۇشۋعا جارامدىلىق سەرتيفيكاتتارى كەرى قايتارىلىپ الىنادى», - دەپ ەسكەرتەدى ازاماتتىق اۆياتسيا كوميتەتى.