وبلىس ورتالىعىندا «قولجەتىمدى تۇرعىن ءۇي-2020» باعدارلاماسى اياسىندا كوپ قاباتتى تۇرعىن ۇيلەر تۇرعىزۋعا ەركە ەسىلدىڭ جاعاسىندا ورنالاسقان «نابەرەجنىي» شاعىن اۋدانى تاڭداپ الىندى. پەتروپاۆل قالاسى اكىمىنىڭ ورىنباسارى قايروللا عاليەۆتىڭ ايتۋىنشا, قۇرىلىس جۇمىستارىن جۇرگىزۋگە 10 گەكتار جەر تەلىمى ءبولىنىپ, جىلۋ جۇيەلەرى تارتىلعان. بولاشاقتا مۇندا 2-3 قاباتتى باسپانالار سالۋ بەلگىلەنىپ وتىر.
قۇرىلىس جۇمىستارىمەن «قازاقستاننىڭ تۇرعىن ءۇي-قۇرىلىس كورپوراتسياسى» اق اينالىساتىن بولادى. بۇل جونىندە قىزىلجار وڭىرىنە جۇمىس ساپارمەن كەلگەن اتالعان كومپانيا باسقارماسىنىڭ توراعاسى قايرات ايتەكەنوۆ مالىمدەپ, الداعى جۇمىس جوسپارلارىمەن ءبولىستى. سونداي-اق, ول كورپوراتسيانىڭ جۇمىسشى كەنتى شاعىن اۋدانىندا قۇرىلىس نىساندارىن سالۋعا قاتىساتىندارىن, جالپى كولەمى 11 مىڭ شارشى مەتردى قۇرايتىن 212 پاتەرلىك ەكى كوپ قاباتتى ءۇيدى سالۋ ءىسىن كۇزدە باستاپ, ءبىر جىلدىڭ ىشىندە پايدالانۋعا بەرۋدى مەجەلەپ وتىرعاندارىن جەتكىزدى.
قازىرگى قارقىنعا قاراعاندا قالانىڭ شىعىس, يۋجنىي شاعىن اۋداندارىندا دا جايلى دا قولجەتىمدى باسپانا سالۋ جۇمىستارىنىڭ قىزۋ ورىستەيتىن ءتۇرى بار.
سولتۇستىك قازاقستان وبلىسى.