نۇر-سۇلتاندا قازاقستان رەسپۋبليكاسى كاسىپتىك وداقتار فەدەراتسياسىنا قاراستى «كەا» (Kazakhstan En’bek Adamy) كورپوراتيۆتىك قورى «ەۋرازيالىق ديالوگ» الەۋمەتتىك-ەكونوميكالىق ىنتىماقتاستىقتى قولداۋ حالىقارالىق قورىمەن ءوزارا ءىس-ارەكەت جانە ىنتىماقتاستىق جونىندەگى مەموراندۋمعا قول قويدى.
قۇجاتقا سايكەس تاراپتار جەڭىستىڭ 75 جىلدىعىنا ارنالعان قوعامدىق باستامالاردى قولداي وتىرىپ, قازاقستان مەن رەسەي حالىقتارىنا ورتاق قۇندىلىق بولىپ سانالاتىن وتان ءۇشىن وت كەشكەندەردىڭ وشپەس ەرلىگىن ماڭگى ەستە ساقتاپ جانە جاس ۇرپاق بويىنا وتانسۇيگىشتىك رۋحتى ءسىڭىرۋ ماقساتىندا رەسەي فەدەراتسياسىنىڭ يۆانوۆ وبلىسىنداعى اسكەري قورىمدا جەرلەنگەن قازاقستاندىق جاۋىنگەرلەردى جانە ولاردىڭ تۋعان-تۋىستارىن ىزدەۋدى باستادى.
قازىرگى كەزگە دەيىن «ەۋرازيالىق ديالوگ» قورى رەسەي فەدەراتسياسىنىڭ يۆانوۆ وبلىسىنداعى اسكەري قورىمنان قازاقستاندىق 108 جاۋىنگەردىڭ زيراتىن تاپتى. جەرلەنگەن قازاقستاندىقتاردىڭ اتى-ءجونى كورسەتىلگەن العاشقى ءتىزىمدى قركف ءوزىنىڭ Facebook الەۋمەتتىك جەلىسىندەگى رەسمي پاراقشاسىندا جاريالادى. ءتىزىم سونىمەن قاتار وڭىرلەرگە مۇشەلىك ۇيىمدارى ارقىلى تاراتىلادى, رەسمي سايتى جانە فەدەراتسيانىڭ «QAZAQSTAN KÁSIPODAǴY» گازەتىندە جارىق كورەتىن بولادى.
قازاقستان رەسپۋبليكاسىنىڭ كاسىپتىك وداقتار فەدەراتسياسى مەن «ەۋرازيالىق ديالوگ» الەۋمەتتىك-ەكونوميكالىق ىنتىماقتاستىقتى قولداۋ حالىقارالىق قورى بۇدان بولەك جەڭىستىڭ 75 جىلدىعىنا وراي سۇراپىل سوعىستا كەۋدەسىن وتقا توسقان مايدانگەرلەردىڭ ەرلىگىن ۇلىقتاۋ ماقساتىندا قازاقستان مەن رەسەي اۋماعىندا بىرقاتار شارالاردى ۇيىمداستىرۋدى جوسپارلاپ وتىر.