بوشاي كىتاپباەۆ! بۇل ەسىمدى تانىستىرىپ جاتۋدىڭ قاجەتى جوق شىعار. شىعىس قازاقستان وبلىسىنىڭ, كاتونقاراعاي اۋدانىنىڭ قۇرمەتتى ازاماتى, سوتسياليستىك ەڭبەك ەرى, ۇلى وتان سوعىسىنىڭ مۇگەدەگى, ۇلكەن نارىن اۋدانىنداعى ميلليونەر ۇجىمشاردى 40 جىل باسقارىپ ابىر
بوشاي كىتاپباەۆ! بۇل ەسىمدى تانىستىرىپ جاتۋدىڭ قاجەتى جوق شىعار. شىعىس قازاقستان وبلىسىنىڭ, كاتونقاراعاي اۋدانىنىڭ قۇرمەتتى ازاماتى, سوتسياليستىك ەڭبەك ەرى, ۇلى وتان سوعىسىنىڭ مۇگەدەگى, ۇلكەن نارىن اۋدانىنداعى ميلليونەر ۇجىمشاردى 40 جىل باسقارىپ ابىرويعا بولەنگەن ابىز اقساقالدىڭ 90 جىلدىق مەرەيتويىن وبلىس جۇرتشىلىعى جامبىل اتىنداعى وبلىستىق قازاق دراما تەاترىندا اتاپ ءوتتى.
الدىمەن جينالعاندارعا قاريانىڭ ەڭبەك جولى, كىندىك قانى تامعان كاتونقاراعاي ءوڭىرىنىڭ ەلى مەن جەرىنە ارنالعان «توعىز تاڭبالى نايمان», «ءور التايدا وتكەن عۇمىر», «ايتا ايتا التايدى, بوشاي اتا قارتايدى» كىتاپتارى جايلى, ۇلى وتان سوعىسىنان قايتپاي قالعان بوزداقتارعا بوشەكەڭنىڭ ءوز قارجىسىنا سالعىزعان ەسكەرتكىشى, باسقا دا قىزىقتى دەرەكتەرگە تولى كينوفيلم كورسەتىلدى.
بۇدان كەيىن وبلىس اكىمى بەردىبەك ساپارباەۆ ساحناعا كوتەرىلىپ, ەلباسى ن.نازارباەۆتىڭ ابىز اقساقالدى 90 جىلدىق مەرەيتويىمەن قۇتتىقتاۋىن وقىپ بەردى. ءوڭىر باسشىسى بۇدان سوڭ قارياعا «وبلىسقا سىڭىرگەن ەڭبەگى ءۇشىن» توسبەلگىسىن, «شىعىس قازاقستان وبلىسىنىڭ قۇرمەتتى ازاماتى» كۋالىگىن, كاتونقاراعاي اۋدانىنىڭ جۇرتشىلىعى اتىنان تەمىر تۇلپاردىڭ كىلتىن تابىستادى.
قازاقستان رەسپۋبليكاسى مەملەكەتتىك سىيلىعىنىڭ لاۋرەاتى, بەلگىلى قالامگەر, قازاق ۇلتتىق اكادەميالىق كىتاپحاناسىنىڭ باس ديرەكتورى الىبەك اسقاروۆ ءسوز الىپ, قازاقستان رەسپۋبليكاسى مادەنيەت جانە اقپارات ءمينيسترى مۇحتار قۇل-مۇحاممەدتىڭ ارنايى ءجىبەرگەن قۇتتىقتاۋ حاتى مەن سىيلىعىن ابىز قارياعا تاپسىردى. مينيستر ءوز قۇتتىقتاۋىندا بوشاي اعانىڭ عۇمىرى جاستارعا ۇلگى-ونەگە ەكەنىن ايتىپ, 90-عا تولسا دا قاتاردان قالماي, قالامىمەن وقىرماندارىن قۋانتىپ وتىرعانىنا ريزاشىلىعىن ءبىلدىرىپتى.
توقسانعا تولعان ابىز اقساقالدى قۇتتىقتاۋعا ەلىمىزدىڭ تۇكپىر-تۇكپىرىنەن ىنىلەرى مەن تۋىستارى, «سامۇرىق-قازىنا» ۇاك ءتوراعاسىنىڭ ورىنباسارى سەرىك ابدەنوۆ, وبلىستىق اقساقالدار القاسىنىڭ توراعاسى ف.جاقسىلىقوۆ, سەناتور ت.ءابايدىلدين, كاتونقاراعاي, كۇرشىم اۋداندارىنىڭ ەل باسقارعان ازاماتتارى, ىنىلەرى جۇرەكجاردى لەبىزدەرىن ءبىلدىردى. بوشاي اعا وزىنە قۇرمەت كورسەتكەن ەلباسىنا, ءوڭىر باسشىسىنا العىسىن ايتتى.
وڭداسىن ەلۋباي,
«ەگەمەن قازاقستان».
وسكەمەن.