بۇگىن نۇر-سۇلتان قالاسىنىڭ اكىمدىگىندە قوعامدىق دامۋ ىستەرى باسقارماسىنىڭ ۇيىمداستىرۋىمەن استانالىق جارناما اگەنتتىگى وكىلدەرىنىڭ قاتىسۋىمەن كەزدەسۋ ءوتتى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.
«قازىرگى ۋاقىتتا نۇر-سۇلتان قالاسىندا 2 مىڭنان استام جارناما قۇرىلىمى بار. ياعني ولاردىڭ قاتارىنا بيلبوردتار, افيشالار, LED ەكراندار, ايالداما كەشەندەرى كىرەدى. ناقتىراق ايتسام, قالادا 95 LED ەكران بار. ءبىر وكىنىشتىسى, سوڭعى ۋاقىتتا زاڭسىز نەمەسە ءتيىستى ورگانداردان كەلىسىم الماي ىلىنگەن جارنامالار كوبەيىپ بارادى», – دەپ قوعامدىق دامۋ ىستەرى باسقارماسىنىڭ باسشىسى تالعات راحمانبەردى قالاداعى نەگىزگى پروبلەمالاردىڭ ءبىرىنىڭ باسىن اشتى.
كەزدەسۋ بارىسىندا ءسوز العان نۇر-سۇلتان قالاسى اكىمدىگىنىڭ ونوماستيكالىق جۇمىس جانە مەملەكەتتىك رامىزدەر ءبولىمىنىڭ باسشىسى گۇلجان قۇرمانعاليقىزى زاڭسىز ءارى قاتەگە تولى جارنامالار ءۇشىن الداعى ۋاقىتتا سالىناتىن ايىپپۇل تۋرالى ءتۇسىندىرىپ بەردى.
ء«بىز جارناما اگەنتتىكتەرى بەرگەن ماتىندەردى تەكسەرىپ, كەلىسىم بەرەمىز. اكىمشىلىك-قۇقىقبۇزۋشىلىق كودەكسىنىڭ 455-بابىنا سايكەس ايىپپۇل سالۋ ءىسى قاراستىرىلعان. اتالعان باپتىڭ 3-تارماعى بويىنشا قر زاڭدارىنا جارناما تاراتۋ تىلدەرىنە بەلگىلەنگەن تالاپتاردى بۇزۋ جەكە تۇلعالارعا 20 اەك, لاۋازىمدى تۇلعالارعا 70 اەك, شاعىن كاسىپكەرلىك سۋبەكتىلەرىنە نەمەسە كوممەرتسيالىق ۇيىمدارعا 100 اەك, ورتا كاسىپكەرلىك سۋبەكتىلەرىنە 150 اەك, ال ءىرى كاسىپكەرلىك سۋبەكتىلەرىنە 400 اەك كولەمىندە ايىپپۇل سالىنادى. وسىعان وراي ءتىل تۋرالى زاڭنىڭ 21-بابىنا سايكەس كەز كەلگەن اقپارات (ونىڭ ىشىنە جارناما دا كىرەدى) مەملەكەتتىك تىلدە جانە ورىس تىلىندە بولۋى ءتيىس», – دەپ گۇلجان قۇرمانعاليقىزى جارناما اگەنتتىگىنىڭ وكىلدەرىنە ەسكەرتۋ جاسادى.
جيىن بارىسىندا ءسوز العان نۇر-سۇلتان قالالىق پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ ءبولىم باستىعى سەرگەي يلينىح سوڭعى ۋاقىتتا جارناما بيلبوردتارى ارقىلى ەسىرتكى ساۋداسى جارنامالانىپ كەتكەن ساتتەر بولعانىن جەتكىزدى.
«ەسىرتكى بيزنەسى ءوز قىلمىسىن جارنامالاۋ ءۇشىن اقپاراتتىق تەحنولوگيالاردى قولدانۋدا. وسى ماقساتتا ينتەرنەت رەسۋرستارىن, ءتۇرلى مەسسەندجەرلەردى پايدالانادى», – دەيدى سەرگەي يلينىح.
ول ءوز سوزىندە 2019 جىلدىڭ 27 جەلتوقسانىنان باستاپ ارنايى زاڭ جوباسى ەنگىزىلگەنىن, ونىڭ نەگىزىندە ەسىرتكى نەمەسە سوعان ۇقساس ونىمدەردى ناسيحاتتاعان, جارنامالاعان ازاماتتار ءۇش جىلعا دەيىن, ال باق بەتتەرىندە نەمەسە وزگە دە قۇرالداردا جاريالاعاندارعا 6 جىلعا دەيىن باس بوستاندىعىنان ايىرۋ جازاسى قاراستىرىلعانىن جەتكىزدى. باسقوسۋدا قوعامدىق دامۋ ىستەرى باسقارماسىنىڭ باسشىسى تالعات راحمانبەردى جارناما اگەنتتىكتەرىنە 2020 جىلدىڭ 3 ناۋرىزىنا دەيىن جارنامالىق نىسانداردىڭ ەستەتيكالىق ءتۇرىن قالپىنا كەلتىرۋ, سونداي-اق, «جارناما تۋرالى», ء«تىل تۋرالى» زاڭداردى, قر باسقا دا نورماتيۆتىك اكتىلەرىن ساقتاۋ تۋرالى تاپسىرما بەردى. كەزدەسۋ سوڭىندا قوعامدىق دامۋ ىستەرى باسقارماسىنىڭ باسشىسى تالعات راحمانبەردى مۇنداي قيىندىقتار, زاڭسىز ارەكەتتەردى بولدىرماۋ ءۇشىن بىرلەسىپ جۇمىس جاساۋعا شاقىردى.