ازەربايجان ۇلتتىق عىلىم اكادەمياسىنىڭ مۋحاممەد فيزۋلي اتىنداعى قولجازبالار ينستيتۋتى بوسنيا جانە گەرتسەگوۆينا ۇلتتىق كىتاپحاناسىمەن, ساراەۆو ۋنيۆەرسيتەتتىك كىتاپحاناسىمەن, گازي حوسروۆ بەك كىتاپحاناسىمەن ىنتىماقتاستىق ورناتۋعا ۋاعدالاستى. بۇل تۋرالى حالىقارالىق تۇركى اكادەمياسىنىڭ ءباسپاسوز قىزمەتى حابارلادى.
بۇل ازەربايجان عالىمدارىنىڭ اتالعان كىتاپحانالاردا ساقتالعان يمامەددين ناسيمي, نيزامي گانجاۋي جانە مۋحاممەد فيزۋلي قولجازبالارىن زەرتتەۋىنە جول اشادى.
ساراەۆو ۋنيۆەرسيتەتىنىڭ بەلگىلى عالىمدارى پروفەسسور ادنان كادريچ, دوكتور امينا شيلياك-ەسەنكوۆيچ, فيلوسوفيا فاكۋلتەتىنىڭ پروفەسسورى الەنا چاتوۆيچ, پروفەسسور دوكتور ەلۆير مۋسيچ بىرلەسىپ ۇلى ويشىل يمامەددين ءناسيميدىڭ 85 ولەڭىن بوسنيا تىلىنە اۋدارعان.
وسى ورايدا, تۇركى الەمىنىن زەرتتەۋشى – جۋرناليست ايدا ەيۆازلى ازەربايجان رەسپۋبليكاسىنىڭ بوسنيا جانە گەرتسەگوۆيناداعى ديپلوماتيالىق وكىلدىگىنىڭ باستاماسىمەن ساراەۆو ۋنيۆەرسيتەتىنىڭ شىعىستانۋ ينستيتۋتىنداعى بەلگىلى عالىمدارمەن كەزدەسۋ وتكىزدى.
كەزدەسۋ بارىسىندا اتالعان ۋنيۆەرسيتەتتەگى شىعىستانۋ ينستيتۋتىنىڭ ديرەكتورى, دوكتور ادنان كادريچ ينستيتۋتتىڭ سوڭعى 70 جىلدا قول جەتكىزگەن جەتىستىكتەرى, سونداي-اق بوسنيا مەن گەرتسەگوۆيناداعى ءازىربايجان ديپلوماتيالىق وكىلدىگىمەن ىنتىماقتاستىق تۋرالى باياندادى. القالى جيىنعا «وسمان ءداۋىرىنىڭ تاريحىن زەرتتەۋ» ءبولىمىنىڭ دوكتورى الاددين نۋسيچ جانە پروفەسسور نيحاد دوستوۆيچ قاتىستى. ولار ءوز كەزەگىندە وسمان يمپەرياسىنىڭ بوسنيا مادەنيەتىنە, سوت تورەلىگىنە جانە ەلدىڭ ودان ءارى ازات ەتىلۋىنە ىقپالى تۋرالى قىزىقتى مالىمەتتەرمەن ءبولىستى.
سونىمەن قاتار كەزدەسۋدە ايدا ەيۆازلى جينالعاندارعا حالىقارالىق تۇركى اكادەمياسىندا اتقارىلىپ جاتقان جۇمىستار تۋرالى ايتىپ بەردى.