شىمكەنتتەن مەيمان كەلگەن. ادەيىلەپ ەمەس, ءاتۇستى. الدەبىر شارۋامەن كوكشەتاۋعا ات باسىن بۇرىپتى. اس قامداۋعا قاراتاتىن ەمەس. ورتالىقتاعى مەيرامحانالاردىڭ بىرىنەن وزەك جالعاسام بولعانى دەيدى.
اسقا قاراۋعا مۇرشاسى جوق جولاۋشىنىڭ ەتەگىنە جارماساتىن ەجەلگى ادەتىمىز ەمەس پە؟ جومارتتىعىمدى بايقاسىن دەپ, شاۋجايىنا جارماسىپ, قايتا-قايتا «ۇيگە سوقساڭشى, ساقتاۋلى سىباعاڭ بار», دەپ قويامىن.
– ەت پىسكەنشە نە زامان, كىدىرىپ قالامىن عوي, – دەيدى ول, – دەگەنمەن, سىرت جەردە كوكشەتاۋدىڭ ەتىنىڭ ءدامىن ماقتايدى. زايىرى جەگەن شوبىنەن, ىشكەن سۋىنان شىعار.
– مۇمكىن ول دا بار شىعار. ءبىزدىڭ پەيىلىمىزگە وراي ءتاتتى بولۋى دا عاجاپ ەمەس, – دەپ قويامىن مەن.
وبلىس ورتالىعىنداعى توبەسى كوك تىرەگەن ءزاۋلىم مەيرامحانالاردا تۇستىك اس تابىلا بەرمەيدى. ولار توي-دۋمان وتكىزۋگە عانا لايىقتالعان. شاعىن ءدامحانالاردىڭ ءبىرىن قولايلى كوردىك. قوناعىم ەت جەگىسى كەلەدى, دەمەك, سىباعالى اسى قايدان بۇيىرار ەكەن؟..
اۋەلى وزبەك ءدامحاناسى كەزىكتى. شىمكەنتتىڭ شىرايلى جىگىتىنە ولاردىڭ اس ءمازىرى تاڭسىق ەمەس. كەيىن كورەيدىكى. وعان دا كىدىرمەدىك. كەلەسىسى سىراحانا. شىنىن ايتقاندا, تابانىڭدى قانشا توزدىرساڭ دا, كوكشەتاۋدا ۇلتتىق تاعام ازىرلەيتىن ءدامحانانى كۇندىز قولىڭا شىراق الىپ ىزدەسەڭ دە تاپپايسىڭ. ونى ايتقان جوقپىن. ۇيات-تاعى.
جوق نارسەنى ىزدەگەننەن اس قامداعانىمىز دۇرىس ەدى. كارى جىلقىنىڭ شاندىرى ۋىلجىپ پىسەتىن ۋاقىت ءوتىپ كەتتى, ءبىز ءالى ءجۇرمىز. ءىشى سەزدى-اۋ دەيمىن, الدەنەشە ۋاقىتتا قوي مىنا بىرەۋىنە كىرە سالايىق دەدى. كىرە سالدىق. جاۋدان مال ايىرعانداي جۋساتىپ جاتىرمىز. ىشىنە ەل قونعان سوڭ تىلگە كەلگەن:
– باياعىدا جورىق جىلدارىندا بابالارىمىز وزەك جالعار اسىن قالاي دايىنداعانىن بىلەسىڭ بە؟ قازان قايناتىپ وتىراتىن ۋاقىت جوق. ءيى قانعان قوي تەرىسىنەن جاسالعان تورسىق پىشىندەس ىدىسقا جىلقىنىڭ كەسەك ەتىن سالىپ, ەر توقىمىنىڭ استىنا بايلاپ قويعان. كۇنى بويى قولتىعى جىرتىلىپ, جورتۋىلدا جۇرگەن جىلقىنىڭ ەتى ءبىر قىزىپ العان سوڭ, قازاننىڭ استىنداعى وتتان كەم بولماسا كەرەك. تاڭەرتەڭ بايلاسا تۇستە, تۇستە بايلاسا كەشكە دايىن بولعان. ال مۇندا ەل امان, جۇرت تىنىشتا ءسۇيسىنىپ اس ىشەر, ۇلتتىق تاعام دايىندايتىن ءدامحانا جوق ەكەن.
– بار, – دەدىم مەن داۋسىم ءسال قۇمىعىپ, – تۇنەۋكۇنى ىستەپ تۇرعان. جوندەۋگە جابىلىپ قالعان عوي. جوندەلەدى, جوندەيمىز.
جوندەيمىز دەگەنىم, سىراحاناسى كوپ بولعانىمەن, قىمىزحاناسى جوق ەلدەگى كاسىپكەرلەرگە سەنگەننەن ايتقان ءۋاجىم عوي.
كوكشەتاۋ